Davosi dominohet nga kërkesa shqiptare për energji bërthamore

[King_Arthur]

Në takimet me kryeministrat e Danimarkës, Singaporit dhe Austrisë, si dhe me filantropistin Soros, kryeministri Sali Berisha ka shpallur ambicien e Shqipërisë për ta orientuar ekonominë drejt shfrytëzimit të energjisë bërthamore, më e lirë dhe më e sigurtë sesa hidroenergjia. Fuqitë më të mëdha pranojnë ftesën për të testuar kapacitetet e Shqipërisë, ndërkohë që Agjencia Ndërkombëtare do të nisë procedurat për të ndihmuar në hartimin e legjislacionit përkatës

Në ditën e dytë të punimeve të Forumit Ekonomik të Davosit, kryeministri Sali Berisha ka shndërruar domosdoshmërinë e orientimit të ekonomive evropiane kah energjia bërthamore në temë kryesore të takimeve të shumta me homologët ndërkombëtarë, apo personalitete të tjera të ftuara në samit. Gjatë një paneli ku merrnin pjesë edhe kryeministrat e Danimarkës, Singaporit dhe Austrisë, kryeministri Berisha u ndal gjerësisht në pasojat që po shkaktonin për ekonominë evropiane ndryshimet e klimës. “Këto pasoja u paguan shtrenjtë nga ekonomia shqiptare, theksoi ndër të tjera kryeministri shqiptar, pasi ajo ishte e orientuar në 99 përqind nga hidro-energjia, një prodhim që gjatë viteve të fundit po shënon një rënie prej më shumë se 50 përqind të tij. “Mbetet më e mundshmja, më e afërta, më e suksesshmja orientimi i ekonomive nga energjia bërthamore, tha kryeministri shqiptar, e cila është e sigurtë dhe shkenca mund ta bëjë edhe disa herë më të sigurtë në të ardhmen”. Mundësia e prodhimit të energjisë bërthamore në vendin tonë është një tezë e artikuluar shumë gjatë ditëve të samitit të Davosit. Këshilltarja e kryeministrit Berisha, Zana Guxholli, gjatë një deklarate për mediat tha dje se qeveria shqiptare po bënte ç’ishte në dorë të saj që të përafronte këtë moment. “Po përgatitet kuadri i duhur ligjor, tha Guxholli, i cili shumë shpejt do t’i nënshtrohet një debati publik, para se ai të shkojë si paketë ligjore në Parlament”. Por qeveria shqiptare ka të gjithë interesin që fazat e këtij procesi të ecin shumë shpejt, prandaj në kalendarin e takimeve e konsultimeve të afërta është vendosur edhe një vizitë e pritshme e një përfaqësuesi të Drejtorisë së Përgjithshme të Agjencisë së Kombeve të Bashkuara për Energjinë Bërthamore, i cili edhe do të vlerësojë gatishmërinë e Shqipërisë për të pritur instalimin në vendin tonë të teknologjisë bërthamore.
Ndryshimet e forta të ekonomisë shqiptare dhe kursi reformator i kabinetit qeveritar kanë qenë në qendër të vëmendjes në takimet që kryeministri Berisha pati me personalitete të fushës ekonomike. Kryeministri Berisha zhvilloi dje pasdite një takim me mikun e madh të Shqipërisë dhe shqiptarëve, George Soros, financier dhe filantrop i njohur botëror. Gjatë bisedës me George Soros, Kryeministri Berisha u ndal në ecurinë e reformave në Shqipëri, si dhe bëri një panoramë të arritjeve në fushën arsimit, kulturës, shëndetësisë, etj. Kryeministri Berisha u shpreh se qeveria që ai kryeson mbetet e angazhuar në një luftë të vazhdueshme dhe pa kompromis kundër korrupsionit, informalitetit, krimit të organizuar dhe trafiqeve, rezultatet e të cilave, kanë forcuar sigurinë në vend dhe konsoliduar stabilitetin ekonomik. Kryeministri Berisha i prezantoi zotit Soros projektet e ndërmarra në bashkëpunim me kompani të njohura botërore në sektorin energjetik, me qëllim shfrytëzimin jo vetëm të burimeve hidrike, por dhe atyre termike. Në këtë takim, Zoti Soros e përgëzoi Kryeministrin Berisha për progresin ekonomik, social e kulturor të Shqipërisë, si dhe vlerësoi punën e qeverisë shqiptare për të realizuar me sukses reformat. Më pas, biseda u përqendrua në çështje sociale, ku Kryeministri Berisha, në mënyrë të veçantë u ndal në problematikën e shtresave rome dhe egjiptiane në Shqipëri, për të cilat kërkoi mbështetjen e zotit Soros në projekte të ndryshme në ndihmë të kësaj popullsie. Nga ana e tij, Zoti Soros u shpreh i gatshëm për të ndihmuar në realizmin e projekteve të tilla. Ndër të tjera, George Soros u shpreh se do te zgjerojë bashkëpunimin me qeverinë shqiptare në projekte për zhvillimin e arsimit dhe sistemit universitar në Shqipëri.