F1.Fetel dominon në Belgjikë, tani është thuajse kampion

[sabah]

Edhe gara e SPA-së dominohet nga Red Bulli. Me dopietën në Çmimin e Madh të Belgjikës, ku triumfoi Sebastian Fetel, i ndjekur nga shoku i skuadrës Mark Veber, ka bërë që skuadra austriake të hipotekojë dy titujt botërorë në Formula 1. Tashmë Fetel ka 259 pikë në klasifikim, 92 më shumë se Veber, kur mungojnë edhe 7 gara nga mbyllja e sezonit. Me këtë rezultat shuhen edhe shpresat e MekLarenit dhe Ferrarit, që konfirmohen si forca e dytë dhe e tretë e kampionatit. Xhenson Baton, që u nis nga vendi i 13, u klasifikua në mënyrë surprizë në vendin e tretë. Ndërkohë, Fernando Alonso zhgënjehet edhe në këtë garë: edhe pse ka qëndruar gjatë në krye me makinën e tij Ferrari, në fund spanjolli u rendit vetëm i katërti. Ai humbi mjaft terren në momentet e fundit të garës, kur montoi gomat e mesme, me të cilat “kokëkuqja” tregoi se nuk arrin të përshtatet. Vend i pestë për Mikael Shumaker, me një garë spektakolare dhe të mbushur me parakalime. Gjermani 7 herë kampion i botës u nis nga vendi i fundit, por kjo nuk e ndaloi që ta rendiste Mercedesin mes më të mirëve, në garën ku festoi 20-vjetorin në F1. Pas Shumit, u rendit shoku i tij i skuadrës, Niko Rosberg, protagonist i një paraqitjeje të kënaqshme. Në vendin e shtatë u rendit Adrian Sutil me Fors India, ndërsa “Top 10” plotësohet nga Ferrari tjetër i Felipe Masës, që u penalizua nga një problem në xhirot e fundit, Vitali Petrov me Reno dhe Pastor Maldonado me Uilliams.

Gara ka qenë mjaft zbavitëse me SPA-në që konfirmohet si një cirkuit që favorizon spektaklin në pistë. Mjaft parakalime, mbi të gjitha në vijën e drejtë pas kthesës “Eau Rouge”. Prej startit të garës, Fetel u ngacmua nga Niko Rosberg, por kampioni i botës në fuqi arriti të rikthehej në krye. Gjithsesi, në xhiron e katërt, u konfirmua ajo që dyshohej përpara garës: makinat Red Bull kishin një problem në balancimin e amortizatorëve, gjë që ndikonte në konsumimin më të shpejtë të gomave në krahun e majtë. Alonso përfitoi nga kjo situatë, duke marrë kryesimin, por vetëm pas nëntë xhirove ai u detyrua të dorëzonte stafetën për shkak të “pit-stop”-eve. Ndoshta gara në Belgjikë do të kishte qenë edhe më e bukur, nëse Luis Hemilton nuk do të ishte i pafat. Në xhiron e 13, piloti i MekLarenit është bërë “viktimë” e Kobajashit, që e ka nxjerrë nga pista. Britaniku ishte mjaft i shpejtë dhe natyrisht që synonte podiumin. Nga futja e “safety car”, pas aksidentit të Hemilton ka përfituar Fetel, që ndryshoi gomat dhe në xhiron e 18 parakaloi pa vështirësi Veber dhe Alonson. Prej atij momenti, piloti gjerman u arratis dhe e mbylli garën i pashqetësuar. Me diferencat e krijuara në pistë, dy makinat Red Bull arritën të administronin avantazhin me setin e fundit të gomave (të mesme), ndërsa Alonso nuk arriti t’u rezistonte sulmeve të Xhenson Baton. Ky i fundit u tregua mjaft i zoti, së bashku me inxhinierët e MekLarenit, që të hartonte një strategji mjaft inteligjente: e nisi garën me goma të mesme dhe e mbylli me goma të buta, duke qenë më i shpejtë se rivalët.