Futbolli në rrezik, klubet në vendnumëro për sh.a.-të

[sabah]

Mbeten vetëm 6 ditë nga përfundimi i afatit të vendosur nga Federata Shqiptare e Futbollit për shndërrimin e klubeve në shoqëri aksionere, por duke parë shenjat, nisja e kampionatit duket në rrezik serioz. Gjatë këtyre ditëve, vetëm Teuta ka qenë ajo që ka lëvizur për shndërrimin e klubit në sh.a., sipas kërkesave të UEFA-s, ndërsa pjesa tjetër ka qëndruar në vendnumëro.

Një gjë e tillë konfirmohet nga burime zyrtare në Federatën Shqiptare të Futbollit, e cila u detyrua të shtynte kampionatin për plotësimin e këtij kushti. Afati i fundit për shndërrimin në sh.a. është 31 gushti, por një afat i tillë duket se nuk do të respektohet sërish.

"Dëgjojmë shumë zëra, se janë marrë vendimet, se nuk po mblidhet Këshilli Bashkiak, se do bëhet regjistrimi në QKR këto ditë, por neve nuk na kanë ardhur dokumente zyrtare", bën të ditur shefi i Zyrës së Licencimit të klubeve, Elton Gjipali. Në Federatë ndërkohë përsërisin se ata e kanë shumë seriozisht ultimatumin e vendosur dhe në rast se shndërrimi në shoqëri aksionere nuk do të bëhet, atëherë ai klub nuk do të pranohet në kampionat.

"Më mirë një fund i tmerrshëm, se një tmerr pafund", deklaroi pak ditë më parë sekretari i përgjithshëm i FSHF-së Eduard Prodani. Sipas tij, kjo është një kërkesë e UEFA-s dhe askush nuk do të tolerohet, pasi ekzistenca e klubeve nuk mund të vazhdojë në formën "as i shtetit dhe as i privatit".

SITUATA
Duke parë se afati po përfundon, situata në futbollin shqiptar nuk duket aspak premtuese. Deri më tani, në Superligë kanë nisur shndërrimin në shoqëri aksionere vetëm 6 klube, ndërsa pjesa tjetër duket shumë e ngadaltë në zhvillimin e procedurave. Duke parë se është edhe kohë pushimesh, nuk duket çudi që një pjesë e madhe e tyre të mos arrijë në kohë ndryshimin e statusit juridik.

Burime jo zyrtare bëjnë të ditur se edhe Luftëtari apo Vllaznia janë shumë pranë procesit të kthimit në shoqëri aksionere, por asgjë nuk ka përfunduar. Pyetja që shtrohet është se çfarë do të ndodhë në një situatë të tillë aspak premtuese dhe a do ta mbajë FSHF premtimin për të mos regjistruar klubet në kampionat? "Ne jemi seriozë, askush nuk do të regjistrohet", thonë zyrtarët e Federatës. Gjithsesi, në fund FSHF mund të jetë e detyruar të vendosë një afat tjetër, pasi mosregjistrimi i klubeve do të çonte në dështimin e aktivitetit.

Komiteti Ekzekutiv pritet të ketë një tjetër mbledhje më 29 gusht, ku do të diskutohet edhe çështja e shndërrimit të klubeve në sh.a. E ndërkohë, në FSHF presin që në ditët e mbetura, të merret të paktën vendimi nga këshillat bashkiakë, ndërsa procedurat e tjera juridike të bëhen me kalimin e kohës.