Merkata ne futbollin shqiptar

[sabah]

Klodian Duro: Do të kthehem te Tirana

Klodian Duro është pranë rikthimit te Tirana. Mesfushori i Kombëtares shqiptare, pranon në një intervistë për “Panorama Sport” se ka folur me drejtuesit e klubit bardheblu dhe, me shumë mundësi, do të luajë për 24-herë kampionët në sezonin e ri. Megjithatë, ai pret një sinjal nga klubet austriake dhe nëse deri të dielën, kur nis grumbullimi i Kombëtares, nuk ka diçka konkrete, atëherë shanset për rikthimin te Tirana janë të mëdha. “Po nuk firmosa në Austri, besoj se do të luaj për bardheblutë. Me rikthimin në Shqipëri, sigurisht që edhe karrierën do ta mbyll te Tirana,”- ka thënë, ndër të tjera, futbollisti 33-vjeçar. “Aktualisht po stërvitem te skuadra ku mbylla sezonin, Lask Linz, megjithatë, ende nuk kam vendosur për të ardhmen. Por, do pres edhe pak ditë dhe do ta ndajë mendjen përfundimisht. Kam marrë disa oferta këtu në Austri, por asnjëra nuk më ka bindur dhe nuk kam gjetur akordin. Në fundjavë do vendos për të ardhmen dhe gjasat janë që të vishem bardheblu”, deklaroi futbollisti i kombëtares së Shqipërisë. “Kam folur me drejtuesit e Tiranës. Do të ulemi për të biseduar më konkretisht për kontratën që mund të nënshkruaj, por unë jam optimist se gjërat do të shkojnë si duhet”. Në fakt, Duro është përfolur për një konflikt në të shkuarën me presidentin Halili, por e mohon një gjë të tillë. “Nuk kam asnjë problem me Halilin. Kur kam qenë në Tiranë jemi takuar dhe sigurisht kemi folur për mundësinë e rikthimit tim. Gjithçka i përket së kaluarës. Unë kam luajtur disa vite për Tiranën, kam fituar trofe dhe e njoh mirë ambientin aty”, përfundoi deklaratën e tij Klodian Duro, duke lënë të nënkuptohet se sezonin e ardhshëm do e shohim me fanellën e bardhebluve.

[sabah]

Flamurtari mbyll merkaton me Draganov

Skuadra e Flamurtarit sipas të gjitha gjasave i ka dhënë fund merkatos së afrimeve të futbollistëve. Dje, për vlonjatët ka firmosur edhe sulmuesi Bullgar, Dragomir Draganov, i cili do të jetë i dyti futbollist i huaj në radhët e skuadrës, pas nigerianit, Abraham. Mendohet se Draganov do të përfitojë një shumë prej 30 mijë eurosh në sezon dhe firma e tij ka ardhur menjëherë pas seancës stërvitore të ditës së djeshme, ku presidenti Shpëtim Gjika i shoqëruar edhe nga Shefi i Klubit, Geri Çipi, kanë biseduar me futbollistin dhe kanë arritur akordin, duke e bërë atë edhe në mënyrë zyrtare. Draganov është afruar te skuadra e Flamurtarit me miratimin e trajnerit Edmond Lutaj.

[sabah]

Tirana.Ikën Etogo, vjen keniani Moses Arit


Sulmuesi Etogo i ka dhënë fund aventurës së tij me Tiranën, pasi nuk arriti të dhurojë atë paraqitje që pritej. Lojtari ishte në një nivel nën mesatar dhe kjo bëri që trajneri Hulian Rubio të kërkojë një tjetër përforcim për repartin e avancuar. Dje, klubi bardheblu ka arritur marrëveshjen me një sulmues të talentuar. Bëhet fjalë për 19-vjeçarin kenian, Moser Arita. Deri para pak ditësh ka luajtur te skuadra e Thika Junajtid në kampionatin vendas duke qenë jo vetëm golashënuesi më i mirë i kësaj skuadre, por edhe ndër më të mirët në Premier Ligën e Kenias. Në 14 ndeshje Arita ka shënuar plot 10 gola duke u konsideruar si një sulmues me një të ardhme të sigurt.