Udineze vlen 100 milionë euro më shumë

[Bruno]

Nga Handanoviç dhe Isla e Armero, te Zapata e Sançez. Kuotat e friulanëve janë shtuar frikshëm!

Trajneri i Udinezes, Françesko Guidolin në fund të ndeshjes me Çezenën u shpreh qartë: “Duam Europën”. Tashmë duhet të qartësohet vetëm kompeticioni që ky ekip do të aderojë: Do të jetë Championsi apo Europa Ligë?
Dikur në prag të festave të fundvitit presidenti Xhianpaolo Poco thoshte: “Dua patjetër që ekipi të mbijetojë në Serinë A, pastaj nëse lojtarët duan të arrijnë më shumë…”. Por po ndodh që tashmë lojtarët e Guidolin e kanë renditur skuadrën në vendin e pestë një pikë larg vendeve që të çojnë në Champions (kompeticion që i ka munguar që prej vitit 2005) dhe me këmbë të vendosura plotësisht në Europa Ligë.
Dje Poco në prezantimin e projektit për stadiumin e ri, deklaroi se çfarë ëndërron nga kjo skuadër, e cila ka shumëfishuar vlerat e saj komerçiale. Pothuajse të gjithë lojtarët, që dikur janë blerë me shifra qesharake tashmë kanë kuotime të çmendura.

AMERIKA E JUGUT Për punën e bërë nga vëzhguesit e Udinezes janë thënë shumë gjëra, por mbetet diçka për t’u shtuar: Ernesto Vanier, i cili pati një karrierë në Torino që fatkeqësisht u ndërpre, Roberto Poliçano, ish-lojtar i një niveli të lartë dhe Valentino Anxheloni janë 3 njerëzit që po thithin “ajkën” e lojtarëve nga vendet e Amerikës Latine, kryesisht nga Kili dhe Kolumbia dhe jo nga Argjentina apo Brazili.
“Kjo bëhet për arsye ekonomike: Në Brazil dhe Argjentinë, të cilat janë vendet që nxjerrin lojtarët më të mirë, kostot janë të larta”, - shpjegon përgjegjësi i vëzhguesve, Andrea Karnevale. “Ne na pëlqejnë zgjedhjet e dorës së dytë. Për momentin po monitorojmë talentet në Peru. Na pëlqen të shkojmë t’i shohim vetë lojtarët dhe jo t’u referohemi pamjeve me dvd”.

SA SHUMË ÇESHTJE - Duke parë skuadrën e sotme, bizneset dhe shpenzimet më të rëndësishme janë bërë për portierin Handanoviç, që është marrë për shifrën 40 mijë euro nga sllovenët e Domzales plot 7 vjet më parë dhe që tani vlerën e ka 10-12 milionë euro, po ashtu edhe Sançez, i cili është blerë për 2 milionë euro nga Kolo Kolo dhe që në qershor nuk do të largohet nga ekipi nëse për të nuk derdhen plot 30 milionë euro.
Po mbrojtësit Benatia dhe Zapata, të marrë përkatësisht nga Klermont në Francë dhe Kali në Kolumbi, që janë marrë për 500 mijë euro? Skuadra që do kërkojë shërbimet e tyre i duhet të shpenzojë 6 milionë për të parin dhe 10 milionë për të dytin. Armero, të cilin Parma nuk deshi ta merrte dikur për 200 mijë euro, sot ka vlerën 10 milionë euro.
Janë tre klube të Premier Ligës, të cilat po e ndjekin me imtësi ndërkohë që Interi s’e vë re. Ganezi Asamoah, ka kushtuar 1 milionë, ndërsa tani mund të largohet vetëm nëse ofrohen 12 milionë. Dhe këtë verë duket se do ketë një betejë të fuqishme me Napolin për lojtarin Inler, zviceriani që ka ardhur për 2 milionë nga Zyrihu tani kushton 14 milionë.

STRATEGJIA - Udineze është një shoqëri që arsyeton mbi gjithçka, madje edhe mbi lojtarët, që nuk e kalojnë shifrën e 1 milionë eurove (veç Di Natales). Çdo dy javë programohet të bëhet një mbledhje. Nga jashtë vijnë drejtues të shumë klubeve që interesohen të shohin modelin friulian.
Familja Poco që konsiderohet si Granada (ekziston dhe një marrëdhënie e mirë me Espanjolin), ka plot 70 lojtarë në mbikqyrje. Kur merr një lojtar presidenti i ofron një kontratë 5-vjeçare. Të vetmit që u ka skaduar kontrata janë Korradi dhe Denis i Napolit që është huazuar ndërsa të tjerëve u skadon pas vitit 2013.
Ndërsa Pinci, që mbetet i pazëvendësueshëm për Guidolin, ka një kontratë deri në vitin 2012, por pritet ta rinovojë. Në Udine janë në pritje për të parë se çfarë ka rezervuar ky kampionat, teksa vetë Guidolin ka një kontratë deri në vitin 2012.

DIKUSH DO TË NISET - Lojtarët që pritet të largohen janë Sançez (Çelsi), Inler (Napoli) dhe Isla, që e kërkon Lokomotiva e Moskës. Zapata do të jetë në ankand për merkato, ndërkohë që Handanoviç mund të jetëpjesë e një klubi të madh si Roma apo Mançester Siti.
Lojtarët që janë të palëvizshëm janë Armero, Benatia dhe Asamoah, ndërkohë që lideri Di Natale mbetet flamuri i ekipit. Një talent i ri është dhënë hua tek Empoli, Fabrini. Duhet vlerësuar edhe Kandreva që po jep shumë tek Parma.
Portieri Kopriveç pritet të zërë një vend në formacion, ndërkohë që edhe mbrojtësi Anxhela pritet të luajë shanset e tij. Të tjerë talente priten të vijnë. Një prej tyre është marrë që në janar, mbrojtësi suedez Zhoel Ekstrand, që për qendrën e këtij sektori përbën një të ardhme të sigurt.

Uruguajani ka shënuar 20 gola në kampionat, 50% e atyre të shënuara nga Napoli
Kavani, më rezultativ se Mesi dhe Ronaldo

Ndoshta dikush, në vënd të Maxarrit, do e merrte Kavanin, do ta blindonte në një kuti xhami, dhe do ta dërgonte në muzeun e më të famshmëve, tamam si një vepër arti.
Kjo sepse “El Matador” është me të vërtet një vepër arti, sot për sot figura më popullore e Napolit. Vendi i dytë në klasifikimin e Serisë A i dedikohet pikërisht 20 golave të realizuar nga uruguajani. Sulmuesi ka shënuar këtë sezon gjysmën e golave në total (40) që ka shënuar ekipi.
Me këtë saktësi dhe vazhdimësi ky sulmues është një konglomerat ku bashkohen dëshira, sakrifica dhe grinta. Është një element unik dhe perfekt kur është në aksion, që e finalizon me gol. Duket se po japin frutet e veta ato 18 milionë euro, që De Laurentisit i janë dashur të shpenzojë verën e kaluar për të marrë shërbimet e uruguajanit nga Palermo.
Duke hedhur një sy rreth situatës në kontinent, me qetësinë më të madhe mund të pranohet se vlera e “El Matadorit”, në këto momente është e paçmueshme. Askush nga golshënuesit më të mirë të kampionateve të tjera në Europë nuk ka një nivel të shënuari si ai, kur dihet se 50% e golave të realizuar nga Napoli i përkasin firmës së Kavanit.
Mes golashënuesve më të mirë të Europës ai zë vendin e parë, ndërkohë që pasohet nga Kristiano Ronaldo me 45% (24 gola nga 53 mbajnë firmën e tij), Mousa Sou i Lilës me 40% (16 gola nga 40)
Mario Gomez i Bajern Mynih me 37% (17 gola nga 46), Berbatov dhe Mesi që janë në nivele të barabarta me 33% (për bullgarin 19 gola nga 57 tek Mançesteri, ndërsa për argjentinasin 24 gola nga 71 që Barcelona ka realizuar). Ky Kavan është tamam një vepër arti që të lë me gojë hapur sa herë që e sheh.

Napoli
Maxhio sfidon Milanin: Ne jemi më të fortë
Napoli po pret me padurim supersfidën e 28 shkurtit kundër kryesuesve të Milanit, teksa një nga protagonistët kryesorë të kësaj skuadre magjike, Kristian Maxhio, deklaron: “Shtypi na nënvlerësonte? Për mua kjo s’ka vlerë fare.
Ne përballemi me ndeshjet sikur të ishin finale dhe pa ia hedhur sytë klasifikimit. Ka një kënaqësi dhe entuziazëm në klub. Është sezoni im i tretë me Napolin dhe të them të drejtën kam parë nga të gjitha, por entuziazmi i tifozerisë sonë është i papërshkrueshëm. Dhe bëjnë mirë duke qënë se ne kemi ambicie të mëdha.
Mezi presim të shkojmë në Milano për t’u përballur me kuqezinjtë. Milani ka lojtarë me shumë kualitet, por edhe ne nuk mbetemi prapa, madje unë do thoja që Napoli është më lart… Rivalët e tjerë për titull? Është ende herët, thjesht jam i lumtur që Inter humbi pasi duke fituar ndaj Juventusit do na afrohej shumë”.