Guardiola: I kemi treguar Spanjës se kush jemi

[Bruno]

Trajneri i Barcelonës nuk ndien keqardhje për barazimin kundër Sportingut të Gijonit

Trajneri i Barcelonës Pep Guardiola nuk ka mbetur i pakënaqur, pavarësisht se skuadra e tij u detyrua ta ndalë serinë e fitoreve pikërisht në javën e 16-të përmes një barazimi 1-1 që arriti ndaj Gijonit në transfertë.
Vendasit e Sporting Gijon kaluan të parët në avantazh vetëm pas 16 minutash lojë nëpërmjet një goli të David Barral dhe për pak u duk se fitorja do të ishte në duart e tyre, por shpresat u shuan teksa miqtë barazuan me një gol të David Vilës kështu që dy ekipet ndanë nga një pikë. “Kemi fituar në shumë fusha të vështira si ajo e Gijonit dhe nuk habitemi nëse në këto momente vrapimi ynë u ndal. Do të na duhet të luajmë në shumë transferta të tilla ku ekipet vendase do të luftojnë për mbijetesë.
Do të jetë një luftë e tmerrshme të ndeshesh ndaj tyre. Tek Barça ka ndodhur që lojtarët të luajnë një herë në tri ditë duke triumfuar në transferta dhe këtë janë të aftë ta bëjnë me miliona herë. Pak a shumë e di pse kjo ndeshje u paraqit e vështirë për ne. Ishte çështje lëvizjesh dhe ne u gjendëm të zhytur, në fund të fundit s’jemi të pamposhtur. Nuk kam pakënaqësira.
Kemi bredhur gjithë Spanjën duke i treguar se kush jemi dhe kjo është mëse e mjaftueshme”. Guardiola më pas vuri në dukje aftësitë e jashtëzakonshme të trajnerit kundërshtar Manuel Preciado që hodhi në fushë një taktikë fiktive: “Mendoj që Sporting luajti perfekt - tha ai. - Manuel e vlerësoi lojën siç duhej. Ne nuk fituam, por bëmë atë çka duhej të bënim.
Nuk është e lehtë të sulmosh kundër një mbrojtjeje me 10 lojtarë. E prisja një ndeshje të tillë. E dinim se na priste një kundërshtar i fortë. Nuk jam i zhgënjyer që lamë pikë. Nëse nuk fiton nuk merr një rezultat të mirë.
Do të zhgënjehesha nëse gjërat nuk do shkonin siç i prisnim. Fakti që jemi Barça s’do të thotë që gjithmonë duhet të fitojmë. Edhe ne mund të humbim ose barazojmë”.