Bufon: Objektivi i Juves vendi i katërt

[Bruno]

Portieri bardhezi ka pranuar se dëmtimet e shumta kanë kushtëzuar sezonin e bardhezinjve...

Xhixhi Bufon ka provuar të fshijë janarin e zi të Juventusit, duke shikuar me optimizëm drejt pjesës së mbetur të sezonit. Që, sipas portierit bardhezi, ka një objektiv të vetëm: Ligën e Kampionëve. “Nëse nuk do të kishim pasur një numër kaq të madh dëmtimesh, Juventusi do të mund të kishte synuar objektiva të ndryshëm.
Sot duhet të synojmë vendin e katërt në renditje dhe jemi të vetëdijshëm se është një objektiv i arritshëm nga ana jonë”, ka thënë portieri juventin. Sigurisht, fitorja ndaj Interit ka karikuar të gjithë ambientin. “Të dielën në mbrëmje, -ka shtuar Bufon, - kemi fituar një ndeshje shumë të vështirë.
Të mposhtësh një skuadër që në sezonin e kaluar ka fituar gjithçka dhe këtë vit nuk është dobësuar është një rezultat i rëndësishëm që të bën të mendosh për potencialin tonë…”. “Jam i kënaqur veçanërisht për tifozët tanë që na kanë mbështetur gjithmonë në këto muaj dhe që meritojnë të përjetojnë emocione si ato të së dielës së kaluar”, ka përfunduar Bufon.
Ndërkohë, edhe Del Piero ka shprehur entuziazmin e tij pas fitores kundër zikaltërve. “Jam me të vërtet i kënaqur për fitoren e së dielës në mbrëmje. Para së gjithash sepse kishim nevojë për një ndeshje të tillë, për të vazhduar rritjen e nisur me tri pikët e marra në Kaljari, por mbi të gjitha pas humbjes në Palermo.
Sipas mendimit tim, pikërisht në “Barbera”, për shkak të zhgënjimit për humbjen e pamerituar, ka ardhur kthesa që na ka lejuar të ringrihemi, dhe të marrim një rezultat të madh kundër Interit”. Eshtë kthyer të flasë për derbin e Italisë, Alesandro Del Piero.
“Natyrisht nuk duhet të kënaqemi me faktin se kemi mundur Interin. Bëhet fjalë vetëm për një etapë, por rruga është akoma e gjatë. Tani duhet të gjejmë vazhdimësinë në ndeshjet e ardhshme për të siguruar një pozicion në renditje të denjë për ambiciet tona. Sigurisht, ndeshja e “Olimpikos” duhet të rrisë besimin në forcat tona.
Për sa më takon jam i kënaqur për atë që kanë bërë shokët e mi. Më ka ardhur mirë edhe për faktin se stadiumi ka qenë i mbushur dhe tifozët juventinë ishin entuziastë: ka qenë një ndjesi e bukur, uroj që të mund t’i dhurojmë tifozëve tanë shumë gëzime në të ardhmen”, ka thënë kapiteni i Juventusit.

Merkato:
Juventusi kërkon Andrea Pirlon

Rinovimi me Milanin nuk po vjen dhe sinjalet nuk janë pozitivë, mjafton të rilexohen deklaratat e Adriano Galianit: “T’i deklarosh dashurinë klubit me fjalë është një gjë, me fakte një tjetër”. Një mesazh për Andrea Pirlon që në fundin e sezonit mund të largohet nga kuqezinjtë. Të shumta skuadrat që duan mesfushorin.
Përveç ekipeve të Premier Ligës tani është edhe Juventusi, edhe pse pengesa është rroga shumë e lartë: 4 milion euro në sezon. Eshtë e qartë se operacioni nuk është i lehtë. Ndikon, siç thamë më sipër, rroga e lojtarit. Por nuk është vetëm kjo.
Kryesorja është të kuptohet gjendja fizike e mesfushorit. Tani Pirlo do të kurohet në Barcelonë nga mjeku që ka punuar edhe me Pipo Inzagin. Gjithsesi, talenti i fantazistit kuqezi mund të përfaqësojë “regjizorin” e vërtetë të kursit të ri të Juventusit të Del Nerit dhe Marotës.

Mbrojtësi:
Sorensen: Nuk më besohet që ndalova Etonë

Lojtari i ri i Juventusit, Sorensen, ka bërë një paraqitje shumë të mirë të dielën e kaluar kundër Interit. Ai ka folur për vështirësitë, që ka pasur për të markuar Etonë: “Më ka shmangur dy herë, kam pasur frikën se mos na ndëshkonte.
Markimi i Etosë ka qenë i vështirë, duhej të shikoja më shumë topin se sa këmbët e tij duke parë se është shumë i shpejtë dhe nëse ikën nuk e kap më. Ka qenë ndeshje më e rëndësishme dhe më e vështirë e karrierës sime të deritanishme, shpresoj që Juventusi në fundin e sezonit të më mbajë, do të isha shumë i lumtur.
Nuk të ndodh çdo ditë të stërvitesh në krah të kampionëve të mëdhenj: shtatë muaj më parë, nëse do të më kishin thënë që do të markoja Etonë, nuk do ta kisha besuar”, ka thënë mbrojtësi.

Kapiteni:
Juventus-Del Piero, rinovimi çështje ditësh

Del Piero është shumë afër rinovimit të kontratës me Juven. Mungojnë vetëm detajet (një milionë euro diferencë midis kërkesës dhe ofertës) për zgjatjen e kontratës bardhezi të “Pinturikios”, që do të jetë deri në 2012-ën.
Pas mbylljes së kësaj çështjeje klubi bardhezi duhet të mendojë për blerjen përfundimtare të lojtarëve që janë marrë borxh: në ditët në vazhdim Marota do të udhëtojë drejt Liverpulit për çështjen Akuilani (çmimi 16 milionë euro), më pas i duhen dhënë 7,5 milionë Udinezes për Pepen, 10.5 Napolit për Kualjarelën dhe mbi të gjitha 15 Kaljarit për Matrin.
Ndërsa, për sa i takon Motës dhe Rinaudos, duket se drejtuesit bardhezi nuk janë bindur nga paraqitjet e tyre dhe nuk do të kërkojnë t’i blejnë përfundimisht lojtarët.

Sulmuesit:
Matri-Toni, dyshja e artë bardhezi

Brinja i dhemb shumë, por Alesandro Matri është gati të shtrëngojë dhëmbët për të qenë në fushë të dielën e ardhshme kundër Leçes në kampionat. “Do të duhet të jemi të përqendruar në maksimum, - ka thënë sulmuesi i Juventusit. - Të harrojmë Interin dhe të mendojmë për ndeshjen e ardhshme”.
Me Tonin është përshtatur menjëherë: “Ai është një lojtar i madh dhe karakteristikat tona përputhen shumë mirë. Kur nuk e di se kujt t’ia kalosh topin ai është gjithmonë i gatshëm dhe e di si ta mbrojë atë. Dhe ka marrë goditje nga mbrojtësit kundërshtarët edhe për mua.
E falënderoj, edhe për këshillat që më ka dhënë. Është një sulmues i madh, një kampion që kushdo donte ta kishte në krah”, ka thënë ish-sulmuesi i Kaljarit!