Mourinjo ëndërron rikthimin në Angli

[Bruno]

Portugezi i Realit të Madridit, Hoze Mourinjo, afron kohën e largimin nga “Bernabeu”
Hoze Mourinjo ka shtuar spekulimet rreth të ardhmes së tij tek Reali i Madridit, teksa ka deklaruar në një intervistë se mund të rikthehet për të punuar në Angli “më shpejt nga sa pritet”. Mourinjo, i cili është përfshirë në një “armiqësi” me drejtorin sportiv të Realit, Horge Valdano, tha për “Sunday Mirror” se gjithmonë ka parashikuar një rikthim në Angli, pas largimit nga Çelsi në vitin 2007.
“Për mua dhe familjen time ka qenë gjithmonë e rëndësishme të qenit të lumtur dhe të gëzuar. Unë e adhuroj kampionatin anglez, ndërsa familja ime preferon Anglinë,” tha ai për “Mirror”. “Gjithmonë e kam menduar rikthimin tim, por mesa duket dita e realizimit mund të jetë më afër nga sa e kisha parashikuar.
” Mourinjo erdhi në Madrid verën e kaluar, pasi kishte udhëhequr Interin drejt një “triplete” të paarritur ndonjëherë, duke përfshirë edhe Ligën e Kampionëve. “Nuk kam jetuar asnjëherë me iluzione,” tha portugezi. “E kuptova shumë mirë personalitetin e Romanit dhe kulturën e njerëzve përreth tij.
Thjesht e dija se ajo nuk ishte punë që mund të zgjaste për 10 vite. Roli im ishte që t’i ofroja atij njeriu atë që kërkonte, fitoren, duke ditur se herët ose vonë kohës time do t’i vinte fundi, sepse kishte shumë gjëra që nuk shkonin rreth e qark meje.”
Çerezo: Nuk e mendoj largimin e Agueros
Enrike Çerezo, presidenti i Atletikos së Madridit, ka deklaruar se futbollistët luajnë aty ku dëshirojnë, ndaj dhe argjentinasi Aguero dhe uruguajani Forlan janë duke luajtur për ekipin madrilen, duke nënvizuar se “në këto momente nuk e mendon largimin e Kun Agueros” nga klubi bardhekuq.
“Lojtarët luajnë aty ku kanë dëshirë. Kun dhe Diego preferojnë të luajnë për Atletikon. A kemi patur oferta? Ne nuk jemi një klub që shesim, duam të vazhdojmë me këta futbollistë që na kanë shërbyer deri më tani, me të cilët kemi arritur suksese dhe mbi të gjitha që janë futbollistë të mrekullueshëm,” deklaroi presidenti, gjatë përvjetorit të 100-të të fanellës bardhekuqe, me të cilën luajnë aktualisht kryeqytetasit (në 8 vitet e para luanin me fanellën bardheblu).
Çerezo u pyet edhe për vazhdimësinë e trajnerit Kike Sançez Flores. “Kike është trajneri i Atletikos, ka kontratë deri në fund të sezonit dhe do të respektojmë kushtet kontraktuale. Nuk ka asnjë arsye pse të mendojmë shkarkimin e tij. Ai është trajneri ynë dhe është shumë i mirë,” përfundoi ai.
Emeri: Nevojitet freski fizike dhe mendore
Trajneri i Valencias, Unai Emeri, tha se ekipi i tij do të vuajë shumë për të arritur fitoren ndaj Santanderit, një ekip që sapo ka ndërruar pronar. “Ata janë një ekip që meritojnë një renditje më të mirë në klasifikim, pavarësisht se ndodhen pranë zonës së rënies nga kategoria, dhe mbi të gjitha luajnë në shtëpi.
Do ta kemi të vështirë, por vuajtjet do të minimizohen në rast se fitojmë,” tha ai. Pavarësisht mungesës së Huan Matës, trajneri kërkon nga ekipi që të imponojnë ritmin e tyre ndaj kundërshtarëve. “Mata nuk është grumbulluar, edhe pse zhvilloi stërvitjen e fundit me ekipin.
Ne kemi nevojë për lojtarë që janë 100% të përgatitur fizikisht dhe nga ana e mentalitetit. Do të doja që ai të luante, por edhe ai vet e pranoi se nuk mund të luante.” Emeri kërkon të motivojë edhe më tepër të besuarit e tij, pas ecurisë pozitive prej 6 fitoresh radhazi.
“Është diçka që na motivon, një sfidë shumë e bukur, por që do të jetë e vështirë ta vazhdojmë, pasi ndeshja e radhës është shumë e komplikuar,” tha Emeri!

[cuni]

histrikisht e ka shprehur hapur nostalgjine per vitet e kaluara tek Chelsea