Reali i dorëzon titullin Barçës!

[Bruno]

Merengesit humbasin ndaj Osasunës, duke i lënë rrugë të lirë Barçës për titullin kampion
“Los Blancos” nuk kanë mundur të ngushtojnë diferencën prej 7 pikësh nga kryesuesit e Barcelonës, pasi janë mundur 1-0 dje nga Osasuna. Havier Kamunas shënoi golin e vetëm të ndeshjes së luajtur në “Reyno de Navarra” në minutën e 62-të, pas asistit të Karlos Arandas, i cili e kaloi topin përmes mbrojtësve madrilenë.
Sulmuesi i ri, Emanuel Adebajor, u aktivizua si zëvendësues në minutën e 65-të së bashku me Ksabi Alonson dhe Kakà. Reali dështoi t’i kundërpërgjigjej fitores së arritur nga Barça të shtunën, duke humbur ndeshjen e dytë në këtë sezon. Pas kësaj humbjeje, Reali i largohet ndjeshëm garës për titullin kampion në La Liga.
Ndërkohë, Gaicka Tokuero ka shënuar 2 gola për t’i dhënë Atletik Bilbaos fitoren 2-0 ndaj Atletikos së Madridit të mbetur me 10 vetë, duke përforcuar pozitat e baskëve drejt një vendi për në Ligën e Europës. Në të dy rastet e shënimit të golave, në minutat 45′ dhe 64′, Tokuero ka shfrytëzuar krosimet e Andoni Iraolës.
Bilbao mund të kishte kaluar në avantazh që në minutën e 40-të nga pika e bardhë e penalltisë, por Fernando Lorente e gjuajti keq 11-metërshin. Më parë ishte nxjerrë me karton të kuq Luis Perea i madrilenëve, pasi kishte rrëzuar sulmuesin spanjoll, Lorente, në çastin kur ndodhej përballë portierit.
Fitorja e 3-të e Bilbaos, që gjendet aktualisht në vendin e 6-të të klasifikimit, përbën ecurinë më të mirë të baskëve gjatë këtij sezoni, teksa i ngjit ata me vetëm 5 pikë diferencë ndaj vendit të 4-t të Valencias dhe 5 pikë larg vendit të 7-të të Atletikos së Madridit.
Pavarësisht fillimit të mirë të baskëve, të cilët dominuan mesfushën, Atletiko e Madridit rrezikoi dy herë me anë të Forlan, por mungoi konkludimi. Në pjesën e dytë, teksa gjendeshin në disavantazh numerik dhe rezultativ, madrilenët u hodhën në sulm, duke lënë hapësira në mbrojtje, ndaj dhe pësuan edhe golin e dytë.
Dopieta e Tokueros është e para në këtë sezon për të. Atletiko vazhdon me ecurinë e dobët gjatë 2011-s, teksa ekipi i Kike Sançez Floresit ka fituar vetëm 1 nga 7 ndeshjet e fundit, në të gjitha kompeticionet.
Mourinjo pranon humbjen ndaj Osasunës
Trajneri i Realit të Madridit, Hoze Mourinjo, nuk e fsheh faktin se lufta për titull ka marrë të përpjetën, teksa tha: “Në kampionat edhe mund të humbasësh pikë. Nuk mund të themi se këto të sotmet ishin më të rëndësishme sesa ato ndaj Levantes apo Almerias, por problem mbetet grumbullimi i tyre në total.
Sot humbëm 3 pikë, gjë që nuk e dëshironim, por edhe impenjimi i kundërshtarëve në limitin e fuqive të tyre, meriton gjithashtu lëvdata. Ndaj lojtarëve të mi nuk kam asgjë, ata kanë bërë detyrën me dinjitet, ndërsa arbitri ka gjykuar në mënyrë të tmerrshme.”
Atletiko konteston vendimin e arbitrit
Momenti më polemizues i pjesës së parë të takimit Atletiko M. -Atletik B. ishte ndëshkimi me karton të kuq i mbrojtësit qëndror Perea, pas akordimit të penalltisë nga gjyqtari Fernando Tekseira Vitienes.
Kolumbiani Perea rrëzoi brënda zonës së rreptësisë Fernando Lorenten, por sipas vendasve, sulmuesi bask ishte i drejtuar me shpinë nga porta madrilene, ndaj dhe nuk kishte asnjë arsye pse mbrojtësi duhej ndëshkuar me karton të kuq. Sipas lojtarëve vendas, arbitri ka gjykuar me tendencë, sa i përket këtij episodi!