Juve, “senatorët” rebelohen kundër klubit

[Bruno]

Një skuadër pa fytyra kampionësh, mjafton të shihet merkato. Del Piero e Bufon: Jemi një skuadër bosh
Pavarësisht nga dita e fundit e merkatos (dje në orën 19:00), Juventusi duhet të mbajë qëndrim për momentin e vështirë që po kalon, që është ai i një skuadre, që mund të synojë për një vend në Ligën e Europës ose maksimumi të shpresojë në një mrekulli që ta çojë në ndeshjet paraeliminatore të Championsit, siç ndodhi vitin e shkuar me Sampdorian.
“Nuk kemi më forcën e dikurshme, -sintetizon Bufon. - Shpresoj që të mos përfundojë si në sezonin e shkuar. Madje, nuk besoj se do të ndodhë, sepse dëmtimet po ndikojnë vërtet shumë. Por nuk mund të mohohet që dikur ky klub mund të shiste Zidanen për 150 miliardë dhe me ato para më blinte mua, Turamin e Nedvedin”.
Sot Juvja duhet të paguajë shumë, sepse disa lojtarë duhet të largohen: ndodhi në verë me Kamoranezin e Trezegenë, vazhdoi dje me Amaurinë dhe deri te Legrotalje: gjithçka është brenda një liste gratis, për të kursyer pesë muaj rroga të majme. Mbrojtësi shkoi falas te Milani. Dhe ndoshta fiton titullin.
“Por ne jemi një skuadër boshe”, - rebelohet Del Piero. Alibia e të dëmtuarve qëndron, në mënyrë të padiskutueshme: Del Neri nuk ka sulmues shpëtimtarë, që mund t’i ndryshojnë gjërat gjatë ndeshjes, por kjo emergjencë nuk mund të jetë një surprizë totale, sepse ka tre vjet që dëmtimet ndikojnë në rendimentin e skuadrës dhe sepse disa lojtarë (Iakuinta), kanë treguar prej kohësh se janë aspak të besueshëm në aspektin fizik.
Ishte për t’u përgatitur që do të mungonin rreth 20-të ndeshje, sepse bën pjesë në historinë e tyre fizike. Kështu, te Juvja emergjenca dhe kriza kanë një emërues të përbashkët dhe renditja po fillon të bëhet e frikshme, para së gjithash në prespektivë të asaj që po ndodh: nesër Juvja do të jetë në Palermo, të shtunën në Kaljari dhe të dielën që vjen do të presë Interin.
Për këtë skuadër, janë tri “male Everest” për t’u kapërcyer. “Momenti është shumë i keq, - pranon Del Neri. Por këtyre lojtarëve nuk mund t’u them asgjë në aspektin e përkushtimit. Ajo që na mungon, përveç shëndetit, është edhe përqendrimi: disa gabime duhet t’i shmangim”
Por janë gabime që varen nga cilësia mesatare e dobët e skuadrës, që në aspektin e mirëfilltë teknik është më e dobëta mes tetë të parave në renditje. “Kur vendosëm të qëndrojmë, - tregon Bufon, - e dinim që ekzistonte rreziku se mund të hasnim sezone të tilla, edhe pse nuk mund t’i lejojmë vetes një tjetër dështim si ai i viit të shkuar.
Por nuk jam penduar që ndodhem akoma këtu: nëse duhet të fitojmë titullin në tre vitet e ardhshme, do të ishte sikur të fitoja 1 milionë e 200 mijë euro në çdo vend tjetër”.

Merkato
Matri bardhezi, Amauri shkon te Parma
Juventusi ka zyrtarizuar ardhjen e Alesandro Matrit. Klubi bardhezi e ka marrë sulmuesin në formë huazimi nga Kaljari për 2.5 milionë euro, me të drejtë blerjeje, që është caktuar në 15.5 milionë euro për t’u paguar në tre vjet.
Në operacion përfshihet edhe Ariaudo: zgjidhet marrëveshja për bashkëpronësinë e mbrojtësit, që kalon me titull përfundimtar te sardët për 2.5 milionë euro. Amauri ndërkohë ka gjetur një destinacion: shkon te Parma që zyrtarizon blerjen e tij në formë huazimi.
Ish-trajneri
Fabio Kapelo i thotë “jo” Juventusit
Si një ish i mirë, Fabio Kapelo flet për krizën e Juventusit: “Për Andrea Anjelin ky është një vit i rëndësishëm kthese, do të jetë një përvojë e rëndësishme për të. Ky është viti zero, nga viti i ardhshëm besoj se Juvja do të riniset”.
Ish-trajneri bardhezi shpjegon: “Kur tentohet rindërtimi dhe rithemelimi i një klubi, duhet kohë. Edhe në nivelin e merkatos diçka nuk ka shkuar si duhet. Ndihma që duhej të jepnin disa lojtarë nuk ishte siç prisnin klubi dhe trajneri”.
Kapelo tregon recetën e një skuadre fituese: “Unë gjithnjë e kam thënë: nuk dua shtatë lojtarë, por dy të mirë. Kur do të rithemelosh një ekip, duhet vetëm cilësi. Te Milani erdhën Ibra e Robinjo. Më në fund i thashë Galianit, që keni marrë dy lojtarë të shkëlqyer. Duhen lojtarë që bëjnë ndryshimin, jo që bëjnë numra.
Unë në stolin bardhezi? Nëse Andrea Anjeli më propozon për në qershor? Unë dua të qëndroj në Angli deri në fund të Europianit, kam bërë një premtim dhe dua ta respektoj marrëveshjen e bërë”.
Kriza
Edhe tifozët juventinë humbasin durimin
Durimi ka mbaruar. Edhe tifozët, që deri tani e kishin mbështetur Juven në këtë janar të zi, janë lodhur. “Nuk fitojmë asnjëherë”, - ishte kori në fund të ndeshjes me Udinezen. Në shënjestër janë të gjithë, nga drejtuesit, te trajneri, duke kaluar përmes lojtarëve.
Nga ana tjetër numrat janë dramatikë: dy fitore, një barazim në shtatë ndeshje, përfshirë dhe Kupën e Italisë. Nëse pastaj konsiderohet se buzëqeshjet e vetme kanë ardhur nga Bari e Katania, dy skuadra në vështieësi dhe me Sampin (barazim 0-0), kuptohet sesi në Torino kanë rënë në një ankth, nga ku nuk duket fundi.
Ata që besonin në një fillim të mirë sezoni dhe shpresonin që viti i shkuar ishte një kujtim i largët, janë rikthyer në “origjinë”. Dhe tani ka një problem më shumë, sepse skuadra, nëse deri dje kishte mbështetjen e tifozerisë, tashmë i ka të gjithë kundër. Tashmë edhe presidenti Anjeli nuk është më imun nga kritikat, sepse ishte ai që i dha besim dyshes Marota-Del Neri.

Napoli

Ruiz: Laveci-Kavani? Më mirë se Ibra-Mesi
Viktor Ruiz ka mbetur i kënaqur nga Napoli: “Përshtypja e parë ishte ajo e një skuadre fenomenale dhe e një publiku të madh”. Blerja e re, që do të veshë fanellën numër 4, u prezantua dje, duke shpjeguar zgjedhjen e tij:
“Kishte skuadra të tjera që më ndiqnin, por zgjedhja ime e parë, ka qenë gjithnjë Napoli, sepse është një klub që ka një histori të madhe dhe është një ekip i ndërtuar për objektiva të rëndësishëm”. Mbrojtësi 21-vjeçar iberik, që vjen nga Espanjoli, kërkon të luajë menjëherë: “Unë jam gati, sapo trajneri të më thërrasë.
Unë besoj se luaj mirë dhe kam një rol specifik në fushë. Jam i ri, kam shumë për të mësuar. Këtu kam ardhur për të dhënë ndihmën time”. Ruiz lëshon edhe një batutë mbi sulmuesit e Napolit: “Laveci e Kavani? Janë shumë të fortë, më mirë t’i kesh shokë, sesa kundërshtarë. Madje them se kjo dyshe është më e fortë se Ibra dhe Mesi së bashku".