Rikthehet Premier Liga

[Bruno]

Junajtid pret Aston Vilën, Arsenali pret Evertonin, Çelsi drejt Sandërlendit!

Sot në mbrëmje luhen disa nga takimet e javës së 24 të të Premier Ligës angleze. “Topçinjtë” e Vengerit do të presin ekipin nga Liverpuli. Në ndeshjet e fundit Arsenal ka marrë në “Emirates Stadium” 10 nga 12 pikët e mundshme ndërkohë që Everton ka 3 ndeshje radhazi që nuk e njeh shijen e humbjes.
Skuadra e Ançelotit, Çelsi, do të ketë përballë një ekip të frikshëm si Sunderland që është vetëm 4 pikë larg zonës së Champions Ligës dhe në takimet e fundit ka marrë 10 nga 12 pikë të mundshme. “Djajtë e kuq” të Fergusonit kanë fituar 8 ndeshjet e fundit në “Old Traford” duke mos njohur humbje që prej prillit të shkuar kur mundeshin 2 1 nga Çelsi.
Ata do të presin sot ekipin e Aston Vilës që sezonin e shkuar u ka rrëmbyer një fitore në “Old Traford”, ndërsa fazën e parë morën një barazim 3 3 në “Vila Park”. Uest Brom, që ka humbur 4 nga 6 takimet e fundit, do të presë Uiganin, i cili ndodhet në kufinjtë e rënies nga kategoria me vetëm 22 pikë.
Të mërkurën kemi gjashtë 6 takime të tjera. Mançester Siti do të ketë një përballje të vështirë në transfertë ndaj Birmingemit ndërsa Spursat udhëtojnë drejt Blekbërnit. Njukasëll do të përballet jashtë fushës së vet me Fulhamin, ndërkohë që Liverpuli pret Stok Sitin në “Anfield”.
Uest Hem Junajtid pas fitores për kupë do të kërkojë pikë në shtëpi përballë Blekpulit, ndërsa Volverhempton udhëton drejt Bolton. Siti nesër në mbrëmje do të kërkojë 3 pikët. Blekburn që vjen pas një fitoreje në shtëpi do të ruajë serinë e rezultateve pozitive, teksa do të presë pretendentët për titull të Totenhamit, të cilët fazën e parë kanë fituar 4 2 ndaj tyre në “White Hart Lane”.
Blekpul do të synojë fitoren e parë në transfertë kundër Uest Hemit që nga viti 1966. Volves që në tri ndeshjet e fundit ka shijuar vetëm humbje do të udhëtojë drejt Boltonit. Fulhem që ndeshjet e fundit ka mundur të korrë 7 pikë nga 9 të mundshmet do të presë Njukastëll Junajtid.
Stok Siti do të udhëtojë drejt Liverpulit në një transfertë të vështirë. Në ndeshjen e fazës së parë që kanë zhvilluar në shtëpi ata kanë fituar me rezultatin 2 0 falë golave të Xhons dhe Fuler, ndërkohë që Liverpuli do të tentojë hakmarrjen. Sezonin e parë ata e kanë fituar ndeshjen ndaj Stok Sitit me rezultatin 4 0.
Italiani nuk lë pa përmendur replikat ndaj Mesit
Mario Baloteli: Rikthehem në derbin e Mançesterit
Sulmuesi italian i Mançester Sitit, Mario Baloteli, ka lënë të kuptohet se ai do të jetë i aftë të rikthehet përpara ndeshjes së kthimit me Junajtid në derbin e Mançestërit. I riu 20-vjeçar i është rikthyer stërvitjes, teksa ka lënë pas një dëmtim në gju, por ende s’ndihet gati për në fushën e lojës.
Ai është i kënaqur me rezultatet dhe ecurinë e ekipit. Italiani nuk ka luajtur me Sitin që prej dhjetorit të shkuar teksa fitonin 4 0 ndaj Aston Vilës. Ai po përgatitet intensivisht për derbin e 12 shkurtit. “Mançester Siti janë një ekip i fortë, gjithssi unë mezi po pres të rikthehem në ekip.
Bëra një punë të mirë në Amerikë dhe tashmë jam gati të rikthehem para derbit me Junajtid. Më pëlqen futbolli anglez. Sa për të ardhmen time mbetet për t’u parë”, u shpreh ai në një intervistë për Sky Sport. Baloteli nuk anashkaloi një “goditje” tjetër ndaj Mesit teksa ironizoi duke thënë: “Kë do të zgjidhja mes meje dhe Mesit? Në Playstation mbase Mesin, por në futbollin real normalisht veten time.”

Çelsi blen Davi Luiz nga Benfika
Çelsi ka rënë dakord me Benfikën për mbrojtësin David Luiz. Çelsi do të paguajë 21 milionë stërina për brazilianin, 17 prej të cilave menjëherë. Çelsi do të japë edhe mesfushorin serb Nemanja Matiç si pjesë e marrëveshjes.
Luiz është nisur dje drejt Anglisë për të biseduar për termat personale me Çelsin. Skuadra e Abramoviçit ka qenë e qetë deri në ditën e fundit të merkatos, kur bëri dy blerje të mëdha.
Xhimi Karrager rikthehet ndaj Stok Sitit
Pas një dëmtimi të gjatë që prej nëntorit të shkuar Liverpulit do t’i rikthehet në ekip një nga mbrojtësit më të mirë sikurse është Xhimi Karrager. Lojtari do të jetë titullar mbrëmjen e nesërme në takimin ndaj Stok Sitit.
“Për ndeshjen e ardhshme ndaj Stok Sitit kemi një ekip të kompletuar. Rikthimi i Xhimit është një fitore për ne. Ai ka fituar respektin e tifozëve tanë, ndërsa sa për ekipin mendoj se do të kërkojë fitoren”, ka thënë trajneri Dalglish.

Hulier: Eshli Jang nuk do të largohet
Trajneri i Aston Vilës, Zherard Hulier, konfirmon lajmin se Eshli Jang nuk do të largohet nga “Vila Park”. Lojtari i kombëtares ka edhe 18 muaj të tjerë kontratë me klubin e Aston Vilës. “Jang është një lojtar i rëndësishëm dhe i pëlqyer për ne prandaj nuk shoh asnjë mundësi largimi për të”, u shpreh ai.
Kohët e fundit këtij lojtari i kishin ardhur oferta të vazhdueshme nga Liverpuli dhe Mançester Siti. Para 4 vjetësh ai erdhi në “Vila Park nga ekipi i Vatfordit për 10 milionë paundë duke u bërë një lojtar i rëndësishëm për skuadrën që prej 3 vjetësh e sheh veten në vëndin e gjashtë të klasifikimit.

Liverpuli konfirmon blerjen e Endi Keroll nga Njukasëlli
Liverpuli ka konfirmuar dje blerjen e sulmuesit të Njukasëll Junajtid për 35 milionë stërlina. Blerja e tij i hapi rrugë shitjes së Fernando Torresit te Çelsi. Njukasëll refuzoi dy ofertat e para në vlerën e 30 milionë stërlinave nga ana e Liverpulit, por Keroll kërkoi të largohej nga klubi dhe më pas Njukasëll e pranoi kërkesën e tij pasi Liverpuli shtoi edhe 5 milionë stërlina të tjera. Sulmuesi tani do të diskutojë termat personale të kontratës me Liverpulin!