Luis Suarez: Liverpuli i përket katërshes kryesuese

[Bruno]

Sulmuesi i ri i Liverpulit flet për klubin e ri dhe për ambiciet në Premier Ligë
Klubi i Liverpulit ka qenë aktiv në merkato gjatë janarit dhe do të jetë në qendër të vëmendjes deri në fund, pasi pritet të konkludohet shitja e Torres drejt Çelsit. Por ndërkohë që pritet largimi i spanjollit, është një tjetër sulmues që pret të nisë aventurën e tij në Angli.
Luis Suarez, uruguajani i blerë nga Ajaksi, e sheh kalimin te të kuqtë si një shans të madh që do t’i japë një shtysë më të fuqishme karrierës së tij si futbollist dhe insiston se Liverpuli i përket një nga katër vendeve të para në Premier Ligë.
Drejtuesit e Liverpulit kanë arritur para disa ditësh akordin me skuadrën holandeze duke derdhur në arkat e tyre plot 22.8 milionë stërlina për të marrë shërbimet e uruguajanit, i cili ka mbërritur dje për të kryer vizitat mjekësore në Liverpul.
Talenti amerikanojugor ka besimin se shkëlqimi i Liverpulit do ta rikthejë shumë shpejt në elitën e futbollit anglez duke zbehur paratë e Sitit dhe euforinë e Totenhamit. “Jam mëse i lumtur” deklaroi Suarez. “Më është dhënë një shans gjigand për të luajtur në një klub me emër.
Liverpuli ka një histori të madhe mbi supe, ka një ekip të shkëlqyer dhe gjithmonë marrin pjesë në Champion Ligë apo Europa Ligë kështu që do jetë një nder të luaj për këtë klub.” Lojtari duket se ka pasur shumë vështirësi gjatë transferimit të janarit.
“Ka qënë shumë e vështirë procedura për kalimin tim tek Liverpuli, ka pasur shumë negociata saqë as vetë se dija nëse do realizohej transferimi apo jo. Unë isha duke u përgatitur për takimin me Nac Bredën kur më vjen lajmi që akordi ishte arritur të shtunën”, përfundoi Suarez.
Drejtori i përgjithshëm i Ajaksit, Van der Bog, deklaroi se ky lojtar do ta ndihmojë shumë klubin anglez që të ringrihet aty ku i takon. “Ai është një luftëtar që do ta ndihmojë shumë Liverpulin. Kur erdhi tek ne ai nuk ishte një lojtar i madh, por menjëherë sa mbërriti në dhomat e zhveshjes Suarez shfaqi shenja lideri.”
Arsenali
Venger i trembet dëmtimit të Nasri
Trajneri i “topçinjve” Arsen Venger dyshon se Nasri me shumë mundësi do të mungojë në ndeshjen, që Arsenal do të luajë përballë Barcelonës, pas dëmtimit që ai mori gjatë ndeshjes për Kupën e Anglisë kundër Hadersfildit.
“Nasri duket se ka marrë një dëmtim serioz në këmbë që duket se do ta mbajë të paralizuar për disa kohë”, u shpreh Venger. “Në fakt kisha menduar që këtë lojtar për ndeshjen e kupës ta lija pushim dhe në vend të tij të aktivizoja Rosiçkin, por ky i fundit ishte i sëmurë. Për ne një humbje e tillë do të jetë e vështirë. Dëmtimi i lojtarëve kryesorë na i komplikon planet”, përfundoi drejtuesi i stolit të Arsenalit.
Anglia
Kapelo: Bejl është lojtari i sezonit
Trajneri i kombëtares angleze Fabio Kapelo beson se talenti i Totenhamit, Garet Bejl e meriton të quhet lojtar i sezonit aktual. “Për mendimin tim ai është lojtari i sezonit, tha Kapelo për të përditshmen “The Guardian”.
Për mua është një lojtar fantastik sepse nëse përgatitesh për një ndeshje kundër Totenhamit duhet të marrësh parasysh që ke përballë një mesfushor të fuqishëm. Prandaj duhet të forcosh mbrojtjen. Ai është një teknik i madh dhe një lojtar shpërthyes që me shpejtësinë e tij mund të lërë mbrapa çdo mbrojtës. Çdo pasim, çdo kros, çdo veprim që bën është i rrezikshëm për ekipi kundërshtar”.
Çelsi
Abramoviç, merkato me 100 milionë stërlina
Skuadra e Çelsit ka në plan të shpenzojë plot 100 milionë paundë për merkaton e janarit, duke filluar me blerjen e bujshme të Torres nga Liverpuli. Roman Abramoviç i ka premtuar një shpenzim të tillë trajnerit Ançeloti dhe sulmuesi potencial i kombëtares spanjolle pritet të jetë një goditje e fortë.
Sipas Lampardit, një lojtar i nivelit botëror sikurse është Torres do ta ndihmojë ndjeshëm skuadrën prandaj ai i ka uruar mirëseardhjen personale kujdo lojtari që do të vijë në ekip.
Kupa e Anglisë
Arsenali kalon turin, Siti barazon
Arsenali ka mundur të kalojë në turin tjetër pas fitores së vështirë 2 1 që kanë arritur në shtëpi përballë Hudersfildit. Goli i Fabregasit në minutën e 86 të e ka çuar takimin në shifrat 2 1.
Mançester Siti zvarrit kualifikimin teksa barazon në transfertë me Nots Kauntrin falë një goli të Edin Dzekos dhe do t’i duhet të presë ndeshjen e kthimit, ndërkohë që konfirmohet se Xhonson do të jetë tre muaj larg fushave i dëmtuar.
Stok Siti arrin një fitore 1 0 në transfertë përballë Volves, duke iu bashkuar skuadrave që kalojnë në turin tjetër falë golit të Huth në minutën e 81 të. Fulhemi ka shpartalluar Totenhemin 4-0, kurse Uest Hemi, që ka huazuar deri në fund të sezonit Robi Kin nga Totenhemi, ka mundur Notinghemin 3-2.
Raundi i pestë do të vendosë përballë ekipin modest të Kroulei Taun përballë Mançester Junajtid. Leiton Orient do të ndeshet me Arsenalin, ndërsa Çelsi nëse fiton në shtëpi përballë Evertonit do të ndeshet me Redingun!