Van Gal: E merituam fitoren dhe vendin e tretë

[Bruno]

Luis van Gal ndihet krenar për lojtarët e tij pasi fitoi ndaj Verder Bremenit, të shtunën
Tekniku i B.Mynihut, Luis van Gal, mendon se skuadra e tij e meritoi fitoren ndaj Bremenit, në sfidën e Bundesligës të shtunën. Kampionët e Gjermanisë po vazhdojnë lojën e tyre të mirë, pasi regjistruan për këtë vit të ri fitoren 3 1, duke e bërë Van Galin të ndihet krenar.
“Bremeni shfaqi një lojë më të mirë në 20 minutat e para, por ne ndryshuam taktikë dhe situata u kthye në favorin tonë, - shpjegoi holandezi pas ndeshjes, në uebsajtin zyrtar të Bajernit. -Ne pësuam një gol në fillim të pjesës së dytë, por ekipi im e përballoi presingun dhe si rrjedhojë luajtëm më me agresivitet.
Mendoj se e merituam fitoren. Ndihem shumë krenar për ekipin tim”. Mbrojtësi Filip Lahm, shprehu fort fjalë entuziazuese: “Mendoj se ishte e kuptueshme për të gjithë se ne ishim të vendosur të fitonim dhe se nuk do ta pranonim kurrë barazimin.
Luajtëm një lojë të mirë, tërhoqëm Bremenin në lojën tonë dhe krijuam raste të sigurta. I luajtëm 90 minutat si një minutë të vetme, e meritonim të fitonim. Pikësynimi ynë është vëndi i dytë, por është ndryshe ta thuash me ta realizosh, pra na duhet të vazhdojmë të fitojmë. Por nëse luajmë ashtu si sot, do të arrijmë atje ku duam”, tha kapiteni.
Minimizohet incidenti - Mesfushori i krahut, Arjen Roben, ka minimizuar dje incidentin e tij me bashkëlojtarin Tomas Myler, në ndeshjen e Bundesligës, atëherë kur presioni po rritej për kampionët në fuqi. “Është e papranueshme t’i bësh gjeste shokut të skuadrës, kur në fakt duhet të jemi shembuj.
Këto gjëra ndodhin në fushë, ne fitojmë dhe humbasim së bashku. Nuk mendoj se ishte një problem i madh.” Edhe trajneri Van Gal u mundua ta zvogëlonte incidentin në fjalë. “Nuk e kuptova. Në përgjithësi e shoh si një gjë të mirë kur lojtarët kërkojnë më shumë përgjegjësi dhe komunikim ndaj njëri tjetrit, - tha holandezi.
Por duhet të kryhet me respekt të përbashkët. Në Holandë, është e zakonshme të debatosh me një lojtar tjetër dhe të shprehësh mendimin tënd, por është tjetër kulturë në Gjermani”. Megjithë humbjen Bremeni ruan vendin e 15 të në ligë, dhe i duhet të luftojë fort për të mos rënë nga Bundesliga.
Kapiteni i Verderit, Torsten Frings, aludoi se arbitri ‘faqezi’, Torsten Kinhofer bëri shumë gabim kur nuk dha penallti për ta pasi Luis Gustavo e preku topin me dorë në zonën e Bajernit. Rezultati ishte 1-1 dhe nëse Verderi do të kishte kaluar në epërsi, ndeshja mund të kishte marrë tjetër drejtim.
Rikthimi
Balak shpreson të jetë kundër Italisë
Kapiteni i Gjermanisë, Mikael Balak, shpreson të grumbullohet për ndeshjen miqësore kundër Italisë më 9 shkurt. Ai është rikthyer në fushë për Leverkusenin dhe ka qenë në formë të mirë në fitoren 2-0 kundër Hanoverit të premten. “Ende duhet të bëj shumë punë, që të jem në formë të mirë fizike”, ka thënë Balak.
“Ndoshta Zoti më jep një shans të dytë dhe më largon dëmtimet. Shpresoj shumë te rikthimi.” Balak ka thënë se nuk ka pasur kontakte me trajnerin Lëv, i cili e ka bërë të qartë se Balak duhet të kthehet në formë që të fitojë vendin e vet në përfaqësuesen gjermane. Balak nuk luajti as në Kupën e Botës 2010 për shkak të dëmtimit.
Java e 20-të
Fitojnë Fraiburgu dhe Mynshegladbahu
Vazhdojnë problemet e Shtutgartit pas humbjes në shtëpi 1 0 me Fraiburgun dje, duke rrezikuar që të bien nga Bundesliga. Johanes Flum, i dha fitoren vizitorëve pas 24 minutash. Fraiburgu është në vend të gjashtë, ndërsa Shtutgarti në të parafundit me 16 pikë.
Shtutgarti dominoi në pjesën e parë, por nuk shënoi dot, duke mos pasur as fat, kur Martin Harnik goditi shtyllën një minutë para mbarimit të ndeshjes. Edhe skuadre tjetër mike ka fituar me të njëjtin rezultat minimal. Mynshengladbahu ka mundur Frankfurtin me golin e Kamargos, duke shkaktuar befasinë e kësaj jave, teksa kjo skuadër mban vendin e fundit në renditje.
Shorti i Kupës
Bajerni pret Shalken në gjysmëfinale
Shorti i gjysmëfinaleve të Kupës së Gjermanisë, i hedhur dje, ka vënë përballë Bajernin e Mynihut kundër Shalkes dhe Duisburgun përballë Energjisë së Kotbusit.
Ky short bën që nëse njëra nga skuadrat e Bundesligës 1, Bajerni ose Shlake, do të zinin vendin e pestë e lart në kampionat, atëherë pavarësisht rezultatit të finales, Duisburgu ose Kotbusi të Bundesligës 2 mund të luajnë sezonin që vjen në Ligën Europa.
Bajerni i Mynihut dhe Shalke janë përballur edhe vjet në gjysmëfinalen e kësaj kupe dhe bavarezët fituan falë një goli të Arjen Roben. Më pas Bajerni fitoi edhe finalen e Kupës, krahas Bundesligës!