Edisoni, djali që josh me fizikun (Big Brother Albania 4)

[Bruno]

Banori më i ri i BB4, duket se që kur ka hyrë brenda shtëpisë së vëzhguar në “Top Channel”, ka menduar të përdorë si armë të fortë të suksesit, joshjen. Pikërisht me fizikun e tij të palestruar, siç e shohim në këto foto, djali nga Vlora që prej vitesh jeton në Itali, ka vendosur të sfidojë djemtë e tjerë brenda shtëpisë me trupin e tij. Me një eksperiencë televizive në spektaklin e njohur italian “Uomini e Donne”, Edisoni është bërë brenda shtëpisë objekt diskutimi i vajzave në këtë reality, të cilat e gjykojnë për faktin pse ai preferon të rrijë gjithmonë i zhveshur. Edhe momenti i hyrjes së tij ishte shumë i veçantë, i menduar nga Vëllai i madh si një surprizë për vajzat, në ambientin e pishinës.

Prezantuesja Arbana Osmani i ftoi vajzat të shkonin pranë pishinës, aty ku ndodhej pikërisht Edisoni që kërcente dhe bënte striptizë për to, skenë që djemtë e lojës e ndoqën nga ekrani. Vajza e parë që ai përqafoi ishte Ermela dhe më pas prezantimi i Edisonit u bë nëpërmjet disa fotove. Ai u shpreh se kishte pasion fotografinë, modën dhe futbollin, prej të cilit i ishte dashur të hiqte dorë pas një dëmtimi fizik. Edisoni pohoi se ishte shumë i lidhur me familjen, veçanërisht me motrën. Ndërkohë që për shkak të viteve të tij jashtë vendit, ai duket se ka shumë probleme me njohjen e gjuhës shqipe. Prej disa ditësh, vajzat po bëjnë të pamundurën t’i mësojnë Edisonit “Himnin e flamurit”.