Emilio Zotka, historia me aktoren greke të telenovelave, Vasiliki Aggeli.

[Bruno]

Deri tani është komentuar si një natyrë aventurieri dhe pa komplekse në lidhje me femrat. Por duket se Emiljo Zotka i “Big Brother 4”, më shumë i ka kushtuar rëndësi lojës brenda shtëpisë, sesa rrëfimeve për të shkuarën e tij. Gjatë ditëve të para të hyrjes në shtëpi, ai u komentua për një intimitet mes tij dhe banores tjetër, Ermelës, një afrimitet që banorët e tjerë e etiketuan si një “lidhje të krijuar brenda dy ditëve”. Ndërkohë që zbulojmë, se edhe jashtë shtëpisë ka qenë jo pak i suksesshëm me femrat e bukura. Në profilin e tij në Facebook, ai ka pasur të publikuara foto intime me aktoren greke bukuroshe të telenovelave greke, Vasiliki Anggeli, me të cilën ka përjetuar një lidhje të bukur në Greqi. Sipas burimeve tona, thuhet se 28-vjeçari nga Korça, Emiljo Zotka, ish-futbollist i skuadrës së “Skënderbeut”, ka pasur një flirt me Anggelin, një nga aktoret shumë të kërkuara në Greqi dhe të pëlqyer në telenovelën më të ndjekur në televizionet greke me titull “I zoi tis alis”. Duket se Emiljo ka afeksion për vajzat bionde, pasi edhe pse jo aq bionde sa Ermela, edhe Vasiliki mund të quhet e tillë. Nuk dihet se si është njohur Emiljo me aktoren greke dhe sa konkretisht ka zgjatur kjo lidhje, ndërkohë që me hyrjen në BB ai është kujdesur t’i heqë të gjitha fotot nga profili i tij në Facebook. Ndërkohë, brenda lojës së BB-së, ai është shfaqur më mospërfillësi, duke tentuar madje të hyjë në të njëjtin shtrat me Ermelën. Ai kishte pranuar se e pëlqente Ermelën dhe që nga hyrja e saj në shtëpi të dy qëndrojnë pothuajse gjithë kohën bashkë. Ermela dhe Emiljo kanë fjetur në të njëjtin shtrat dhe kanë shkëmbyer puthje dhe përkëdhelje gjatë gjithë kohës, duke lënë përshtypjen e një çifti të vërtetë brenda shtëpisë së vëzhguar. Ata kanë qëndruar shumë afër, ndërsa shquhen për përkëdheljet që i kushtojnë njëri-tjetrit, sikur njihen prej vitesh. Nuk dihet se si do vazhdojë më tej, gjithsesi në lidhje me veten ai ka pohuar se : “jam i aftë të sfidoj veten përballë karaktereve të ndryshme që ofron shtëpia e “Big Brother”. Jam ironik dhe bëj humor me gjithë njerëzit që më rrethojnë”. Ai ka hyrë në “Big Brother” për të ndryshuar realitetin që po jeton, nga i cili është i pakënaqur. Shumë gjëra në jetë i kanë mbetur përgjysmë, ndaj me këtë eksperiencë synon ta çojë deri në fund. I pasionuar pas futbollit dhe sporteve të tjera, ai nuk rri pa spikatur në karakterin e tij të hedhur dhe pasionin për sportet, ashtu siç e pamë para disa ditësh në ambientin rreth pishinës, ndërsa i mësonte banores tjetër, Elisa, si të bënin ushtrime gjimnastikore!