Materaci: Paqe me Zizu, Balotelin e kam rrahur

[sabah]

TIRANE-Takim me Zidane? Po, ka ndodhur. Ai që e pohon një gjë të tillë është vetë Marko Materaci, mbrojtësi i Interit, që e ka emrin të lidhur ngushtësisht me atë të francezit që prej Botërorit të vitit 2006. Më 4 nëntor, Zidane ishte bashkë me Realin e Madridit në hotelin "Melia" të Milanos, në pritje të ndeshjes me Milanin një ditë më pas. Materaci kishte shkuar aty për të takuar mikun e tij Zhoze Murinjo dhe më pas, rastësisht, është takuar edhe me ish-yllin e kombëtares franceze. "Isha duke dalë nga hoteli, - tregon Materaci. - Dikush më ndaloi dhe më tha: ka një problem, Zidane po parkon makinën ngjitur me tënden. Iu përgjigja se nuk e kuptoja ku qëndronte problemi, dola jashtë dhe u gjenda përballë me Zidane. Shfrytëzova rastin për t'i thënë disa gjëra, gjëra që i dimë vetëm unë dhe ai, që mbeten mes nesh. Le të themi që isha unë i pari që i fola atij dhe kur ai më zgjati dorën, e shtrëngova dhe nuk ia lëshova derisa më shikoi mirë në sy. Ishte kjo ajo që doja. Shkoi kështu, për mua ishte një gjë e këndshme, nuk e di për të", shton mbrojtësi i Interit.
Milani
Në intervistën e dhënë për Premium Calcio, që do të transmetohet sonte në orën 21:00, Materaci ka treguar edhe një moment që lidhet me mundësinë e vajtjes te Milani, skuadra "armike" e Interit. "Në sezonin 2005-2006 isha shumë pranë firmosjes me Milanin, - ka thënë ai. - Mançini nuk më donte, doja që të largohesha. Ishte edhe Vilareali që më kërkonte, ndërsa unë doja që të luaja në një skuadër ku të fitoja një vend për në Botëror. Nuk kam probleme ta pranoj: isha shumë pranë firmosjes me Milanin, por më pas fola me Marçelo Lipin, që më tha të mos shqetësohesha, sepse një vend në 23-she për mua ekzistonte. Ai bashkëbisedim ishte fati im. Vendosa të qëndroj aty ku zemra më thoshte të qëndroja, Lipi e mbajti premtimin e tij, më mori në Gjermani dhe pastaj ndodhi ajo që dini", ka treguar më tej Marko Materaci.
Baloteli
Sezonin e shkuar, Materaci pati një përplasje me Mario Balotelin në fund të ndeshjes Inter-Barcelona, e vlefshme për gjysmëfinalen e Champions League. Episodi është treguar nga Ibrahimoviç më përpara. Zikaltërit fituan 3-1, por Baloteli në fund flaku fanelën në sytë e gjithë botës. "Një shpullë dhe një këpucë në fytyrë ia dhashë, por kur u operua dhe ishte në spital, në mesnatë isha unë me të duke i bërë shoqëri dhe duke i blerë ushqimet". Shigjeta edhe për Ibrahimoviç, i cili e goditi me shkelm në derbin e fundit Inter-Milan: "Unë thjesht ndalova për të mos e dëmtuar, ndërsa ai jo. Por, më mirë kështu. E vërteta është se ne të Interit duhet ta falënderojmë. Nëse një vit më parë do të ishim përballur me Barcelonën pa të në fushë, ndoshta nuk do të ishim kualifikuar dhe nuk do të fitonim Champions". Në fund, "Topi i Artë": "Në 2006 e meritoja të merresha në konsideratë, por pagova famën e të keqit për shkak të goditjes së Zidane. France Football nuk më futi as në 30 më të mirët".

(BalkanWeb)

[cuni]

Me sa kuptoj paska qene materaci fajtor per zenien e famshme!

[Rori]

kush e di sa te dhèmb,me kokè nè stomak apo jo si ne stomak duket

[cuni]

nuk ka qene ne stomak po ne gjoks, po edhe sikur te kish qene ne stomak, mos u boj merak se nuk e gje gjo materacin