Në më pak se një javë nga njoftimi i martesës së tyre, çifti Kate dhe William kanë bërë dje të ditur edhe datën dhe kishën në të cilën do të vënë kurorë. Sikundër prisnin të gjithë, bëhet fjalë për një ditë pranvere

[Rori]

Brenda një jave nga njoftimi se kishin vendosur për të kaluar jetën bashkë, dje çifti mbretëror Kate dhe William bënë të ditur edhe datën e martesës. Por pati shumë spekulime gjatë këtyre ditëve. Kishte nga ata që thoshin se çifti do të lidhte kurorë në verë, e të tjerë që mendonin se data e rëndësishme do të ishte shumë më afër, në pranverë. Dhe në fakt, dje çifti ka konfirmuar se do të martohet në 29 prillin e ardhshëm dhe sipas vetë Kryeministrit të vendit, Cameron, kjo do të jetë një festë për të gjithë dhe një ditë pushimi për britanikët, ndërsa kisha ku do të mbahet ceremonia dhe Kate e William do të shpallen burrë e grua është Wastminister Abbey, kisha historike e Londrës ku u organizua funerali i Dianës në vitin 1997. Sipas burimeve të pallatit mbretëror, çifti e zgjodhi një vend të tillë për bukurinë e veçantë të tij, për intimitetin që u krijon njerëzve dhe për lidhjet historike mbretërore që ajo ka. Në fakt, për sa i përket 29 prillit, ajo është edhe dita e Shën Katerinës së Sienës dhe Kate emrin e saj të gjatë e ka Katerinë. Ndryshe nga tradita e deritanishme e dasmave mbretërore që janë organizuar të mërkurave, apo të enjteve, 29 prilli i ardhshëm është ditë e premte. Sekretarja personale e princit William tha se çifti e zgjodhi abacinë 1000-vjeçare në qendër të Londrës, për shkak se ajo mbi të gjitha të krijon një ndjesi privatësie. Kjo edhe pse mund të zërë 2000 veta. Në të gjithçka të jep përshtypjen e një kishe fshati. Të thjeshtë dhe pa shumë ekzagjerime e zbukurime, që janë karakteristike për katedralet e mëdha. Dhe siç e thamë më sipër, sigurisht që ajo mbart edhe një histori të gjatë mbretërore. Gjyshja e William-it, Mbretëresha Elisabetë II, dhe mamaja e saj janë martuar të dyja në atë kishë. Në po atë kishë janë kurorëzuar dhe mbretërit e mbretëreshat britanike dhe madje aty janë varrosur edhe 17 monarkë. William dhe Kate vendosën që të mos zgjidhnin për këtë datë të shënuar katedralen e Shën Palit, edhe pse ajo ishte katedralja ku vunë kurorë prindërit e Mbretit të ardhshëm, Diana dhe Çarls në vitin 1981.

Familja mbretërore dhe familja e Kate do të mbulojnë shpenzimet e dasmës, të pritjeve para ceremonisë dhe të muajit të mjaltit, përveç sigurisë. Ndërkaq, janë të shumta dilemat në lidhje me organizimin e një ceremonie luksoze në një kohë kur britanikët janë në mesin e një krize të thellë ekonomike dhe qeveria ka ndërmarrë paketën më të madhe të reduktimeve të buxhetit që nga Lufta e Dytë Botërore. Sekretarja e princit ka deklaruar se të gjitha palët e përfshira në këtë ceremoni, pra familja mbretërore dhe familja e Kate janë të ndërgjegjshëm për situatën dhe do të zhvillojnë të gjitha ceremonitë konform kësaj situate të përgjithshme në vend. Lista e të ftuarve ende nuk ka përfunduar, por shumë shpejt ajo do të plotësohet dhe do t’u dërgohet personave përkatës për të përgatitur kohën në axhendat e tyre. Ajo çka është e veçantë në këtë martesë, ose më mirë në këto përgatitje paramartesore, është përfshirja e drejtpërdrejtë e dy të fejuarve në të gjitha detajet e dasmës. Kjo, sepse ata e dinë që e gjithë bota në 29 prillin e ardhshëm do t’i ketë sytë tek ata dhe se të dy janë shumë të preokupuar që kjo ceremoni të jetë një shembull klasik i vetive më të mira të Britanisë. Burime të brendshme të pallatit mbretëror flasin për një lumturi të madhe që po përjeton çifti i parë i vendit.

Kryeministri Cameron konfirmoi se dasma do të shënonte edhe një ditë feste për vendin. “Dasma e Kate dhe William do të jetë një moment shumë i lumtur për ata të dy personalisht dhe për kombin tonë e për këtë arsye atë datë do ta shpallim edhe festë kombëtare, në mënyrë që në këtë festim të marrin pjesë sa më shumë njerëz”, ka deklaruar Kryeministri Cameron disa ditë më parë. Hera e fundit që William ka marrë pjesë në një ceremoni të madhe në kishën ku do të vërë kurorë, ka qenë ceremonia funebër e të ëmës, në shtator të vitit 1997. Ndërkohë, edhe pse ogurzeza, të gjitha martesat e familjes mbretërore që janë zhvilluar në këtë kishë janë përfunduar me divorc. E tillë ishte martesa e princeshës Anë në vitin 1973 dhe ajo e princit Andre në vitin 1986.
Gazeta Shqip