Mrekulli e Mesit, Argjentina mposht Brazilin pas 5 vjetësh

[sabah]

Lionel Mesi i ka dhënë Argjentinës fitoren e parë pas 5 vjetësh kundër Brazilit, duke shënuar një gol deciziv në minutat shtesë të miqësores së luajtur në Katar. Derbi latin është fituar nga skuadra e Serxhio Batistës, që mund për herë të parë Seleçaon, që prej 8 qershorit të vitit 2005. Në fakt, ka qenë një ndeshje e barabartë mes dy superfuqive të futbollit amerikano-jugor, por një veprim prej gjeniu i Lionel Mesit në fund, i ka dhënë triumfin Argjentinës. Për Mano Menezes ishte humbja e parë në stolin e 5 herë kampionëve të botës, ndërsa atij i mungonte vetëm Aleksandre Pato.

Në krahun tjetër, Batista vinte në këtë sfidë pa futbollistë si Diego e Gabriel Milito, Samuel, Gago, Tevez e Aguero. Për Brazilin ka qenë në fushë për herë të parë prej prillit 2009 edhe Ronaldinjo, që ka luajtur në krah të dyshes Neimar-Robinjo. Zaneti ishte i pari që rrezikoi në portën e Brazilit, me një goditje të minutës së 5-të që u prit nga Viktor. Në të 18-tën, Dani Alvesh godet traversën, ndërsa pak minuta më pas Ronaldinjo provon me takë. Njeriu më i rrezikshëm gjithsesi ka qenë Higuain, që në minutën e 28-të ka shënuar edhe gol, por që u anulua për pozicion jashtë loje. Në pjesën e dytë, për t’u theksuar një rast i Lavecit në minutën e 11-të, por që ndalohet nga Viktor, si edhe një gjuajtje e Robinjos pas aksionit të Neimar. Ndeshja po shkonte drejt 0-0, por në minutën e parë shtesë, Mesi ka penetruar në mbrojtjen braziliane dhe ka mposhtur Viktor. Në fund, Leo shkëmbeu fanelën me Ronaldinjon, ish-shokun e tij te Barcelona.
(BalkanWeb)