Regjistrimi i popullsisë, RROSH: Kundër përkatësisë etnike

[sabah]

TIRANË- Rrjeti i Organizatave Shqiptare nëpërmjet një deklarate për mediat shprehet kundër variantit të fundit të regjistrimit të popullsisë mbi baza etnike. Sipas RROSH, përkatësia etnike dhe kombëtare nuk mund të jetë një zgjedhje e lirë individuale, por është e përcaktuar nga trashëgimia e gjithsecilit, e cila është e regjistruar në regjistrat themeltarë të gjendjes civile. “Përkatësia etnike një fakt historik i vulosur prej brezave njerëzorë të shkuar dhe nuk përcaktohet me vetëdeklarim”,- thuhet në deklaratë.

Në deklaratë theksohet se, vetëdeklarimi i etnisë në regjistrimin e ardhshëm të popullsisë do të krijonte një precedent të rrezikshëm për të zyrtarizuar manipulimet e paligjshme që janë kryer deri tani, me qëllimin për të zmadhuar artificialisht pakicat etnike e kulturore në përgjithësi dhe numrin e pakicës greke në veçanti për të zgjeruar padrejtësisht shtrirjen gjeografike dhe historike të kësaj pakice në territorin e Republikës së Shqipërisë.

Duke i kërkuar qeverisë shqiptare të mbrojë interesin kombëtar, RROSH kërkon heqjen nga pyetësori i regjistrimit të popullsisë pyetjen për vetëdeklarimin e etnisë. “Eshtë detyrim i qeverisë së Shqipërisë që të mbrojë interesin kombëtar dhe në këtë frymë i bëjmë thirrje që të heqë nga pyetësori i regjistrimit të popullsisë dhe të banesave pyetjen për vetëdeklarimin e etnisë”,- përfundon deklarata.

Rrjeti i Organizatave Shqiptare është një forum i organizatave shoqërore shqiptare nga Republika e Shqipërisë, Republika e Kosovës, Republika e Maqedonisë, Republika e Malit të Zi, Lugina e Preshevës për të bashkërenduar përpjekjet për një jetë sa më të mirë dhe me dinjitet të shqiptarëve kudo ku janë. Rrjeti i Organizatave Shqiptare-Dega e Shqipërisë: Klubi Kombëtar, ASAN, Tifozat Kuq e Zi, Shoqata Çamëria, Klubi i Patriotëve të Rinj, Lëvizja Mjaft!, Instituti Antonio Gramshi, Shoqata Patriotike Tepelena.
(BalkanWeb)

[cuni]

edhe vota ime kunder eshte!