Japoni,zhvillohet kampionati boteror i xhudos

[sabah]

Kampionia e botës për U-20, Majlinda Kelmendi, ka pasur një fat të keq në tërheqjen e shortit në Kampionatin Botëror të xhudos, që zhvillohet nga data 9-12 shtator në Tokio të Japonisë.

Majlinda përballë do të ketë fituesen e medaljes së bronztë në Lojërat Olimpike në Kinë.

“Është short shumë i vështirë për Majlindën, për faktin se për rivale do të ketë garuesen nga Algjeria, Haddad Soraja.

Vetë suksesi i kësaj garuese është dëshmia më e mirë se Majlindën çfarë sfide e vështirë e pret gjatë ditës së diel, që sipas kohës sonë në orën 04:00 mëngjesit”, ka thënë përzgjedhësi i kombëtares së Kosovës, Driton Kuka.

Në kombëtaren e Kosovës është atmosferë e shkëlqyeshme, por të gjithë të rezervuar si në deklarata, po ashtu edhe të matur në synime.

Në Tokio ekspedita është vendosur nga dita e mërkurë.

“Majlinda do të jep tërë energjinë që ka. Presim të dëshmojë formë jashtëzakonisht të mirë, por vërtet do të jetë shumë vështirë të mposhtet rivalja algjeriane. Në fakt, nëse Majlinda e mposhtë Sorajën, atëherë do të ketë shumë më lehtë në xhirot e radhës dhe pse edhe mos të presim rezultate”, ka thënë Kuka.

Përveç Majlindës në botëror janë edhe xhudisja Nora Gjakova e Fatos Tabaku. Dy garues mjaft të dëshmuar.

“Nora ishte më fat, e cila rrethin e parë e kaloi pa luftë. Në rrethin e radhës Nora pret fituesin e ballafaqimit në mes garueses gjermane e australiane. Ndërsa të shtunën edhe Fatos Tabaku do të përballet në botëror me një garues nga Uzbekistani”, theksoi Kuka.

Duele të vështira për garueset tanë në Tokio, por secili me shpresë se mund të arrijë diçka nga një konkurrencë shumë e fortë.

Kuka thotë se Majlinda është e përgatitur në të gjitha aspekte, por shumë është i rezervuar.

“Të gjithë garuesit janë të përgatitur e sidomos Majlinda, por realisht është shumë për të menduar sesa mund të arrijmë suksese. Nuk është lehtë të përballesh me garues më një bagazh të madh që kanë në sferën ndërkombëtare, si dhe me medalje olimpike”, ka thënë Kuka. Nga ana tjetër, Agron Kuka, kryetar i Federatës së Xhudos së Kosovës, në Tokio është takuar me shumë kryetar të federatave të ndryshme të botës në xhudo si dhe me anëtarë të Komitetit Olimpik ndërkombëtar.