OKB, Asambleja e Përgjithshme debaton për Kosovën

[sabah]

NJU JORK- Asambleja e Përgjithshme e Kombeve të Bashkuara sonte e fillon shqyrtimin për propozim rezolutën e Serbisë për Kosovën, të cilën Beogradi e ka paraqitur mbrëmë, pas konsultimeve dhe harmonizimit me Bashkimin Evropian.

Për propozim teksin e ri, shefja e politikës së jashtme të Bashkimit Evropian, Ketrin Eshton, tha se tash është tekst i 28 vendeve, që do të thotë i 27 shteteve të BE-së dhe i Serbisë.

Ndryshimet pasuan bisedimet e zhvilluara të martën dhe të mërkurën ndërmjet presidentit serb, Boris Tadiç dhe shefes së politikës së jashtme të Bashkimit Evropian, Catherine Ashton.

Presidenti serb Boris Tadic, autorizoi ministrin e Jashtëm serb që të paraqesë tekstin e ri të rezolutës për Kosovën prej nga janë hequr pjesët e debatueshme që kishin nxitur kundërshtimin e Shteteve të Bashkuara dhe vendeve kryesore të Bashkimit Evropian.

Në propozim tekstin e ri përshëndetet gatishmëria e BE-së për lehtësimin e “dialogut ndërmjet palëve” dhe konstatohet se procesi i dialogut, vetëvetiu, do të ishte faktor i paqes, i sigurisë dhe i stabilitetit në rajon.

Në Asamblenë e Përgjithshme, më së shpeshti, miratohen rezolutat me shumicën e thjeshtë, por për aprovimin e rezolutave për “çështjet e rëndësishme”, duhet të votohet nga dy të tretat e vendeve anëtare të OKB-së.

Këto rezoluta nuk janë obliguese për vendet anëtare, por vlerësohet se kanë peshë të madhe politike.
REZOLUTA E MODIFIKUAR
1 – Jemi të vetëdijshëm për qëllimet dhe parimet e Kombeve të Bashkuara;

2 - Kemi parasysh funksionet dhe autorizimet mbi bazën e Kartës së Kombeve të Bashkuara;

3 – Pranojmë me respekt mendimin këshillëdhënës të GJND-së më 22 korrik 2010 nëse shpallja e njëanshme e pavarësisë është në harmoni me të drejtën ndërkombëtare

4 – Përshëndesim gatishmërinë e Bashkimit Evropian që ta lehtësojë procesin e dialogut ndërmjet palëve. Ky do të ishte faktor paqeje, sigurie e stabiliteti në rajon.

5 - Ky dialog do të kishte për qëllim avancimin e bashkëpunimit, në rrugën drejt Bashkimit Evropian dhe përmirësimin e jetës së njerëzve
(balkanweb)