Lamtumirë Kupave të Europës për edicionin 2010-2011.

[sabah]

Skuadrat shqiptare i kanë dhënë lamtumirë Kupave të Europës për edicionin 2010-2011. Të fundit që kanë larë duart me këto evente kanë qenë Tirana dhe Besa, pjesëmarrëse në “Europa League“. Natyrisht, janë skualifikuar për më tej, por kanë pësuar nga “një thes“ me gola secila. Tirana, plot 5 të tillë me FC Utrecht-in, 4 në transfertë dhe 1 në shtëpi (me hungarezët e ZTE kishte barazuar 0-0 në Tiranë dhe fituar 1-0 në kthim, në kohën shtesë, në raundin e parë), ndërkohë që vetë ka “firmosur“ golin e nderit, ndërsa Besa është shpartalluar tërësisht në dy sfidat me grekët e Olympiacos-it. Nëse ndeshjen e parë e ka humbur 5-0 në “Qemal Stafa“, kurse ne sfidën e kthimit, në Athinë, është ndëshkuar edhe më thellë, me shifrat 6-1. Ashtu si bardheblutë, të paktën edhe verdhezinjtë e Kavajës kanë realizuar të ashtuquajturin “gol nderi“. Por ama kanë pësuar plot 11 të tillë. Më shumë se shkatërrim, turpërim i tyre! Ndërkohë, para pak ditësh, ishte Dinamo, kampionia në fuqi e Shqipërisë, që u eliminua që në turin e parë të Ligës se Kampioneve, nga Sherif Tirapol i Moldavisë. Humbja në sfidën e parë, në Tiraspol, 3-1, nuk u rikuperua dot në sfidën e kthimit, në “Qemal Stafa“, sepse Dinamo nuk shkoi më tej se një fitore minimale 1-0. Gjithsesi, të paktën e fitoi njërën ndeshje, pavarësisht se nuk siguroi dot kualifikimin. I pari që e nisi dhe e bistisi me turp pjesëmarrjen në Kupat e Europës, ishte Laci, debutues në kësi eventesh. Ndaj Dnepr Mogilev, kurbinasit barazuan 1-1 në sfidën e parë, luajtur në “Niko Dovana“ të Durrësit, por u mundën thellë 7-1 në kthim, në Bjellorusi, cka u pasua me zëra për shitje të ndeshjes nga lojtarët, të cilët edhe u përjashtuan nga presidenti Pashk Laska. Zëra për shitje të ndeshjes në Utrecht pati edhe nga trajneri i Tiranës, Starova, që akuzoi lojtarët e vet, por më pas iu vu kapak kësaj historie, si edhe shumë të tjerave, duke bërë “mea culpa“.
Sikurse shihet, duke bërë një llogaritje të thjeshtë, golaverazhi i skuadrave shqiptare në Kupat e Europës, për edicionin 2010-2011, është mëse negativ:
Gola të shënuar: 7
Gola të pësuar: 27

Ja edhe rezultatet e skuadrave tona në Kupat e Europës, për këtë edicion:
“Champions League“
FC Sherif Tiraspol – Dinamo 3-1
Dinamo – FC Sherif Tiranspol 1-0

“Europa League”
Laci – Dnepr Mogilev 1-1
Dnepr Mogilev – Laci 7-1

Besa – Olympiacos 0-5
Olympiacos – Besa 6-1

Tirana – ZTE 0-0
ZTE – Tirana 0-1

FC Utrecht – Tirana 4-0
Tirana – FC Utrecht 1-1

……………………………………………………………………………………………………………………..

Utrechti i Holandës, “kafshatë e pakapërdishme” për Tiranën
“Europa League”, turi i dytë
22.07.2010, ora 19:30
Stadiumi Kombëtar “Qemal Stafa”, Tiranë

TIRANA – UTRECHT 1-1 (0-4)
Rezultati total: 1-5
Shënues: A.Lila 11’ / Van Wolfswinke 3’

TIRANA
1 Blendi Nallbani (GK)
2 Elvis Sina
5 Entonio Pashaj (Migel Metani 69’)
6 Andi Lila (C)
9 Sebino Plaku
10 Vilfor Hysa (Enco Malindi 63’)
13 Erando Karabeci
19 Tefik Osmani
22 Pero Pejić
23 Sabien Lilaj (Blerti Hajdari 83’)
28 Julian Ahmataj
Zevendesues
31 Klajdi Kuka (GK)
7 Blerti Hajdari
11 Ergys Sorra
17 Afrim Taku
18 Enco Malindi
24 Gerald Tushe
25 Migel Metani
Trajner: Sulejman Starova


UTRECHT
19 Khalid Sinouh (GK)
2 Tim Cornelisse
3 Mihai Nesu
9 Rickyvan Wolfswinkel
11 Dries Mertens
15 Nana Asare
17 Alje Schut (C)
18 Barry Maguire
20 Jacob Lensky (Gianluca Nijholt 79’)
24 Jacob Mulenga (Löic Loval 60’)
25 Ismo Vostermans
Zevendesues
28 André Krul (GK)
5 Francis Dickoh
7 Löic Loval
10 Thomas Oar
14 Markvander Maarel
27 Gianluca Nijholt
30 Adam Sarota
Trajner: Ton Du Chatinier
Gjyqtarë: Radek Matejek, Martin Wilczek, Ivo Chytil(Ceki)
Kartonë të verdhë: Karabeci (T)

Pasi ka humbur në ndeshjen e parë, në Holandë, me FC Utrecht, me rezultatin e thellë 4-0, Tirana nuk ka shkuar dot më larg se barazimi edhe në ndeshjen e kthimit, luajtur të enjtën në “Qemal Stafa“. Duke treguar se është jo vetëm larg emrit të vet, si skuadra 24 herë kampione e vendit, por edhe shumë larg nivelit të kundërshtarit holandez. Në këtë mënyrë, me një tur të kaluar, të parin, ndaj ZTE së Hungarisë (barazoi 0-0 në tiranë dhe fitoi 1-0, në kohën shtesë, me gol të Karabecit, në kthim, në fushën e hungarëzevë), Tirana i ka larë duart me Europën, për të nisur përgatitjet për sezonin e ri kombëtar. Ndeshja e kthimit, me FC Utrecht, ka nisur si mos më keq për bardheblutë, sepse janë ndëshkuar që në minutën e 3-të me gol. Miqtë nga Holanda kanë realizuar me anë të Van Wolfswinkel, në minutën e tretë, duke e nisur sfidën e kthimit me Tiranën, praktikisht, me avantazh, pa llogaritur pokerin e sfidës së parë në shtëpi. Kjo i ka shokuar jo pak bardheblutë, të cilët duhej të luanin për nderin e tyre, pasi nuk kishin asnjë shans për të përmbysur disavantazhin e ndeshjes së parë dhe për të shpresuar kualifikimin. Mirëpo, në ndeshjen e parë debutuese si kapiten i Tiranës, kavajasi Andi Lila ka barazpeshuar ndeshjen, në minutën e 11-të, me anë të golit të tij. Duke risjellë ekuilibrat në këtë 90 minutësh, i cili nuk do të kishte më gola të tjerë, pavarësisht përpjekjeve të të dyja skuadrave, vecanërisht të bardhebluve, që treguan dëshirë të madhe, por jo mundësi e kualitet të duhur. Nga ana e tyre, holandezët e trajtuan sfidën e “Qemal Stafës” si një ndeshje kontrolli, në prag të turit të tretë të “Europa League”, falë fitores 4-0 në Utrecht, i cili u jepte komoditetin e duhur për të mos u shqetësuar për asnjë cast. Tirana kaq mundësi kishte, sidomos në ndeshjen e kthimit, sepse krahasuar me kundërshtarin, në të gjithë komponentët, ishte tejet larg, sikurse është në fakt edhe futbolli shqiptar, krahasuar me atë holandez. Kësisoji, ajo lloj frike, ose më mirë të themi vlerësimi maksimal që i bëri Utrechti skuadrës bardheblu, duke e konsideruar ballafaqimin në kuadrin e “Europa League”, si një “sfidë ndaj Ajaksit të Shqipërisë”, u konvertua në një rezultat total, të përgjithshëm, 5-1 në favorin e miqve. Duke shtuar kësisoji numrin e golave të shumtë që pësojnë skuadrat shqiptare në Kupat e Europës.

……………………………………………………………………………………………………………….

Besa poshtërohet nga grekët e Olympiacos-it
“Europa League”, turi i parë
22.07.2010, ora 19:30
Stadiumi “Karaiskaqi”, Athinë

OLYMPICOS – BESA 6-1 (5-0)
Rezultati total: 11-1
Shënues: Dudu 46′, 78′, Derbyshire 53′, Maresca 75′, 90′, Fetfatzidis 89′ / Dimitrija Lazarevski 48′

OLYMPIACOS
78 Urko Pardo (GK)
4 Olof Mellberg
5 Giorgos Galitsios
6 Óscar González (Kostas Mitroglou 46’)
8 Dudu (C)
10 Diogo (Ioannis Fetfatzidis 70’
11 Jaouad Zairi (Matt Derbyshire 46’)
14 Kevin Mirallas
15 Raúl Bravo
20 José Holebas
25 Enzo Maresca
Zevendesues
71 Antonis Nikopolidis (GK)
3 François Modesto
9 Matt Derbyshire
18 Ioannis Fetfatzidis
22 Kostas Mitroglou
26 Denis Epstein
33 Giannis Papadopoulos
Trajner: Ewald Lienen

BESA
12 Edvan Bakaj (GK)
4 Betim Aliju
6 Semir Hadzibulic
7 Sokol Cikalleshi (Bazjon Tragaj 85’)
8 Minas Osmani
9 Edin Ferizovic
13 Artion Poçi (C)
17 Marco dos Santos
20 Paulin Dhëmbi (Ariel Shtini 72’)
21 Hakil Jakupi (Erand Hoxha 76’)
29 Dimitrija Lazarevski
Zevendesues
1 Orges Shehi (GK)
11 Saimir Celhaka
15 Erand Hoxha
16 Bazjon Tragaj
19 Gezim Krasniqi
30 Ariel Shtini
Trajner: Shpetim Duro
Gjyqtare: Lee Probert, Stephen Child, Scott Ledger (Angli)
Kartone te verdhe: Osmani, Aliju, Poci, Jakupi (B)

Po në kuadrin e “Europa League“, po të enjten e 22 korrikut 2010, një tjetër skuadër shqiptare ka pësuar humbje, madje shokuese, që referuar shifrave totale, në të dyja sfidat, është poshtëruar. Fjala është për Besën e Kavajës, që ka luajtur në Athinë, ndaj skuadrës së njohur greke, Olympicos, nga i cili është mundur 6-1. Dhe po të kesh parasysh se të gjashtë golat i ka pësuar në pjesën e dytë, del në pah amatorizmi i verdhezinjve kavajas përballë grekëve të Olympiacos, por edhe lënia e të gjitha llogarive për 45 minutat e dyta. Mesa duket, pjesa e parë duhej të mbyllej në barazim, madje me shifra të bardha, pa u shënuar asnjë gol. Kushedi se përse kështu, ndoshta për “nxehje“. Për të shpërthyer në gola që në startin e pjesës së dytë, 6 nga të cilët në portën e Besës, lojtarët e së cilës vetëm kanë shëtitur fanellën verdhezi në fushën e blertë, por grekët kanë pasur një pikë mëshirë, sepse u kanë lejuar të bëjnë golin e nderit. Madje “flakë për flakë“ me golin e parë të tyre, si me “magji”. Në fakt nuk ia vlen të komentohet më tej kjo ndeshje, sepse rezultati dhe mënyra e shënimit të golave flet më shumë se asgjë, por rezultati total, 11-1 (ndeshjen e parë në Tiranë, Besa e kishte humbur 5-0), përbën një njollë të madhe negative për klubin kavajas, që do ta kujtojnë gjatë tifozët e saj.
11 gola të pësuar dhe vetëm një i shënuar, më shumë se futboll, tregon mjerimin e kësaj loje në skuadrat shqiptare, në të gjitha komponentët. Në rastin e Besës, mesa duket nuk ka bërë fare punë as rivaliteti i egër që ka ekzistuar gjithnjë në ndeshjet mes skuadrave, apo kombëtareve, të dy vendeve tona fqinje. Nëse gjithmonë është bërë fjalë për derbe të zjarrta dhe “jetë a vdekje”, Besa kësaj here ka ndryshuar “kurs”. Ndoshta është edhe punë mundësish, ndoshta më tepër se kaq.