Holande-Uruguaj 3-2

[sabah]

Holanda është skuadra e parë finaliste e kampionatit botëror, pas fitores 3-2 ndaj Uruguait në ndeshjen e zhvilluar në Kejp Taun. Në një sfidë të mbushur me emocione, tulipanët kanë siguruar një kualifikim të vështirë përballë një ekipi që me emra qëndron më poshtë, por aspak në zemrën dhe kurajon e treguar në fushë. Amerikano-jugorët nuk janë dorëzuar deri në çastet e fundit, duke i dhënë emocione të shumta një sfide që në dukej mendohej e lehtë. E megjithatë, Holanda ka mundur të kalojë në finale të Kupës së Botës pas 32 vjetësh, duke treguar një nivel të lartë organizimi. Pavarësisht kurajos së djemve të Tabarez, tulipanët kanë merituar gjithçka në këtë takim.

Në pjesën e parë ishte Xhovani Van Bronkhorst që hapi serinë e golave me një goditje nga 40 metra që përfundoi në rrjetën e portës së mbrojtur nga Muslera. Një silurë e vërtetë e kapitenit holandez, që zhbllokoi ndeshjen në një moment qetësie. Por, 4 minuta nga përfundimi i pjesës së parë, Diego Forlan ka barazuar shifrat me një tjetër goditje nga larg, që e ka bërë të kotë hedhjen e portierit Stekelenburg.

Skuadrat kanë shkuar në dhomat e zhveshjes me këtë rezultat, ndërkohë që pjesa e dytë ka nisur më e mirë për holandezët. Uruguai është kthyer i tëri në mbrojtje, duke lënë përpara vetëm Forlan e Kavanin, ndërsa tulipanët kanë krijuar shumë përpara Muslerës. Minuta e 70-të ka rezultuar fatale për amerikano-jugorët. Pas një aksioni të gjatë, Shnajder godet lehtë në zonë dhe topi përfundon në rrjetë, duke i dhënë jetë gëzimit holandez. Pas 3 minutash, një tjetër aksion i nisur nga Shnajder dhe Roben finalizon me kokë krosin e Dirk Kajt. 3-1 dhe çdo gjë duket e mbyllur, por Uruguai hidhet i tëri në sulm dhe në minutën e dytë shtesë gjen golin e dytë, këtë herë me anë të Maksi Pereirës.

Dy minutat e mbetura kanë qenë një makth i vërtetë për holandezët, pasi Uruguai ka qenë i tëri në sulm dhe për pak arriti të barazonte. Gjithsesi, skuadra e Tabarez largohet nga Kupa e Botës me kokën lart dhe me shijen e një futbolli të bukur të dhuruar në 6 ndeshjet e zhvilluara deri më tani. Tashmë Uruguai do të presë edhe finalen për vendin e tretë e të katërt që do të luhet të shtunën, ndërkohë që Hollanda do të ketë shansin të luftojë për Kupën e parë të Botës në historinë e saj.