Pëllumbi: Destabilizim nëse krizën e zgjidh populli

[sabah]

Politikani i vjetër socialist, Servet Pëllumbi sapo është kthyer në Shqipëri, vizitoi dje grevistët e urisë në çadrat para Kryeministrisë. Me një tufë lule në dorë, të cilën ia ka dhuruar këngëtares Elsa Lila, Pëllumbi foli me deputetët dhe mbështetësit e PS-së që prej 16 ditësh vijojnë grevën në pritje të një zgjidhjeje për transparencën e zgjedhjeve. Pëllumbi i bëri thirrje dje kryeministrit që të gjejë kurajë dhe të lëshojë për të arritur një kompromis për të mirën e vendit. Në të kundërt, ka bërë të qartë Pëllumbi, "ka një limit gjithçka, ka një limit greva, ka një limit durimi, ka një limit demokracia dhe vjen një moment që e merr në dorë populli. Po u shndërrua populli në turmë, destabilizohet vendi". "Tani ka ardhur një moment që duhet të mendohet me pjekuri, me maturi, pasi ka një limit pakënaqësie, mosfunksionimi i demokracisë dhe institucioneve dhe vjen një moment kur populli nuk e zgjidh më politikën, por e zgjidh vetë si turmë, dhe ndaj duhet shmangur kjo, por duhen bërë lëshime", - tha profesori socialist për gazetarët pas vizitës në brendësi të çadrës. "Palët të gjejnë mundësitë të zgjidhin problemet dhe të mos lejojnë agravim të situatës politike në Shqipëri", - u shpreh Pëllumbi. "Unë e quaj të pafalshme që është dita e 16-të e grevës dhe forcat nuk janë ulur ende në tavolinën e bisedimeve. Nuk mendoj se çështja ka ngecur në detaje, por në mentalitet, në kulturën demokratike. Në demokraci duhet të lëshojnë të dyja palët, pra duhet gjetur një zgjidhje e mesme. Duhet të tërhiqen nga pozicionet fillestare dhe në rastin konkret, PS-ja më duket se është tërhequr, pasi kërkon thjesht hapjen e materialeve zgjedhore dhe jo të kutive", - theksoi Pëllumbi. Tashmë, vijoi ai, "edhe kryeministri Berisha duhet të bëjë tërheqjen e tij". Ish-kreu i Kuvendit shtoi gjithashtu se PD-ja duhet të tërhiqet nga pozicioni fillestar, pasi kjo situatë rrezikon vendin. Duke folur për ndarjen e intelektualëve, Pëllumbi tha se "intelektualët që mendojnë për të ardhmen, duhet të thonë me forcë mendimin e tyre, t'i përkushtohen kësaj situate. Realisht, ajo që duket humbje e njërit ose e tjetrit, është fitore e demokracisë dhe historia për këtë do t'i vlerësojë", - përfundoi Pëllumbi.
(GazetaShqiptare)