Ançeloti: Ky është vetëm fillimi!

[Bruno]

Trajneri i Çelsit beson në suksese të mëtejshme me grupin e futbollistëve blu
Karlo Ançeloti ka paralajmëruar skuadrat e tjera se puna e tij në futbollin anglez sapo ka filluar, teksa po shijon titullin e Premier Ligës që në debutimin e tij. Çelsi i Ançelotit e fitoi titullin për herë të parë që prej dy titujve të fituar në kohën e Hoze Mourinjos, më 2005 dhe 2006. Në ndeshjen e luajtur të dielën, Çelsi mundi 8-0 Uiganin dhe u shpall kampion i Anglisë.
Kjo fitore i dha mundësinë bluve të Londrës ta mbyllnin kampionatin me një pikë më shumë se Mançester Junajtid, që nuk arriti ta merrte titullin për herë të katërt radhazi. Blutë e Ançelotit shënuan 103 gola këtë sezon, duke u bërë skuadra e parë që e kalon shifrën e 100 golave në sezonin e Premier Ligës. Didië Drogba shënoi 29 gola këtë sezon falë 3 golave të shënuar kundër Uiganit, duke marrë trofeun “Këpuca e Artë”.
Ançeloti beson se skuadra e tij ka shanse të jetë edhe më e suksesshme, edhe pse ka një numër jo të vogël lojtarësh mbi 30 vjeç. “Unë mendoj se ky klub do të ketë një të ardhme sepse këta lojtarë nuk janë të moshuar, ndaj do të kemi një skuadër të mirë edhe për vitin që vjen si dhe për disa sezone radhazi”, ka thënë ai.
Trajneri italian ka shprehur kënaqësinë e tij për mënyrën se si reagoi skuadra e tij ndaj presionit që ushtrohej nga opinioni para ndeshjes së fundit, edhe pse do të luante kundër Uiganit që kishte mungesa dhe një bilanc shumë negativ në transferta. “Ne bëmë një ndeshje të mirë dhe ky ishte synimi ynë. Donim të fitonim ndeshjen dhe titullin.
Ne jemi shumë të lumtur dhe dua të falënderoj para së gjithash pronarin e klubit, Roman Abramoviç, pastaj klubin dhe këdo që ka punuar me mua këtë sezon, që më ka përkrahur çdo ditë. Mbi të gjitha falënderoj lojtarët e mi. Gjeta një skuadër fantastike që punonte pa u lodhur çdo ditë, duke pasur një atmosferë të mirë në grup. E fituam këtë titull si skuadër e jo si individë. Eshtë një moment fantastik. Jam shumë i lumtur që fituam titullin që në sezonin tim të parë. Gjeta një klub të mirë dhe ishte më e lehtë për mua të jepja maksimumin”, ka thënë Ançeloti, i cili ka shtuar se fitoret kundër Junajtid kanë qenë themeli i triumfit.
“Fitoret kundër Junajtid kanë qenë themelore, sepse na e shtuan besimin dhe e ulën moralin e Junajtid”, ka thënë ai. Tani Çelsi do të fokusohet në ndeshjen e fundjavës kundër Portsmuthit në finalen e Kupës së Federatës, pasi mund t’i fitojnë për herë të parë këto dy trofe. Më pas do të nisin bisedat me Roman Abramoviçin për planet e merkatos. “Për momentin, ka kohë për këtë. Vendimet do të merren së bashku në të ardhmen.
Nuk mendoj se do të ndryshojmë shumë gjëra.” Për Frenk Lampard ky titull ishte shumë i rëndësishëm: “Ka qenë e jashtëzakonshme se si e fituam titullin dhe e mbyllëm sezonin. E merituam titullin. Dy titujt e parë me Mourinjon janë fituar relativisht lehtë dhe ishin specialë sepse ishin të parët, por ky ishte shumë special sepse ishte shumë i vështirë”, ka thënë Lampard!


Lajmet Nga Futbolli Anglez - AlbStation.Com