Dështimi, Fergusoni vetë pyet dhe po vetë përgjigjet!

[Bruno]

Trajneri i Mançesterit: A kam zgjedhur taktikën e duhur? A duhet të futemi në merkato?
Dështimi i Mançester Junajtid për të fituar titullin e katërt radhazi e ka bërë trajnerin Alek Ferguson të mendohet nëse skuadra e tij është dobësuar pas largimit të Kristiano Ronaldos apo faji qëndron te gabimet taktike gjatë sezonit. Junajtid e dorëzoi kurorën të dielën pas fitores 4-0 kundër Stok Sitit, pasi Çelsi fitoi 8-0 kundër Uiganit dhe mori titullin me një pikë më shumë.
Ajo që fitoi Fergusoni në sezonin e tij të 24-ët te Junajtid është Kupa e Ligës, e fituar në muajin mars kur mundi Aston Vilën. “A kam bërë përherë zgjedhjet e duhura në formacion ose strategjinë e duhur taktike?
A kemi një skuadër të fortë sa duhet?” kanë qenë disa nga pyetjet, që Fergusoni i ka bërë vetes në një moment të rrallë të kthimit të kokës pas. “Më duhet të peshoj mundësinë e futjes në merkato, duke pasur parasysh lojtarët që kemi. Duhet të marrim masa kundër dëmtimeve, fatit të keq dhe sidomos rritjes së standardit në Premier Ligë.
Eshtë një ligë shumë e fortë, që kërkon shumë fitore prej skuadrave të forta.” Njëra ndër humbjet më të kushtueshme për Junajtid ka qenë ajo kundër Bërnleit në javën e tretë. Fergusoni është ende i zemëruar për humbjen 1-0 kundër Çelsit në nëntor, kur Xhon Terri shënoi me kokë pas një goditjeje të lirë që nuk duhet të ishte dhënë sipas tij.
“Ndoshta ajo humbje ka qenë vendimtare për titullin”, ka thënë Fergusoni. Junajtid doli në vend të dytë edhe pse nuk shpenzoi më shumë se 20 milionë stërlina në merkato pas shitjes së Kristiano Ronaldos te Real Madridi për 80 milionë stërlina, ndërsa Mançester Siti doli në vend të pestë edhe pse shpenzoi 200 milionë stërlina. Mesfushori Antonio Valencia qe blerja e vetme që luajti mirë vazhdimisht për Junajtid, pasi Majkëll Ouen u dëmtua, kurse mesfushori Gabriel Obertan ka ende punë për të bërë që të përmirësohet.
“E kam ditur përherë se do të na mungonte Kristiano Ronaldo”, ka thënë trajneri skocez, i cili nuk është penduar që ka lënë të shkojë Karlos Tevezin, i cili shënoi 29 gola për Mançester Sitin këtë sezon. Ai shënoi 17 gola më shumë se Dimitar Berbatov i Junajtid, që nuk shkëlqeu këtë sezon. Varësia te Uejn Runi, autor i 34 golave në sezon, ishte shumë e madhe, por ai u dëmtua në fund të sezonit. “Mënyra se si Uejni zuri vendin e Ronaldos, tregoi se ai jo vetëm që e zëvendësoi atë, por e çoi lojën e skuadrës dhe të tijën në një nivel më të lartë”, ka thënë Ferguson.
“Sigurisht që kontributi i tij ka qenë ndër gjërat më pozitive të sezonit.” Ferguson u ka kujtuar tifozëve të “gërmojnë” pak në të shkuarën e Junajtid. Kur erdhi ai në vitin 1986, Junajtid nuk kishte fituar titull prej 20 vitesh. Në vitin 1993, Junajtid fitoi titullin e parë dhe më pas edhe dhjetë të tjerë. “Ne duhet t’i vemë sukseset përballë dështimeve dhe mendoj se jemi në anën pozitive. Nuk është vetëkënaqësi, por është logjike të pranosh se bëmë një sezon të mirë që nuk është se nuk na është shpërblyer. Mund të kishim dalë më mirë, por jemi në formë të mirë gjithsesi”, ka përfunduar Fergusoni!


Lajme Nga Futbolli Anglez - AlbStation.Com