Reshjet e shiut, Durrësi zhytet nën ujë

[Hot_Babe]

nuk e di a mund ta postoj kete artikull ketu por nuk gjeta ven tjeter loool

DURRES -Kishte 15 vjet që në Durrës nuk ishin regjistruar sasi të tilla reshjesh si ato të 24 orëve të fundit, kur rrëketë e shiut nuk patën të sosur. Një situatë e tillë meteorologjike shkaktoi përmbytje në disa zona të Durrësit. Ndërprerja e energjisë elektrike vetëm për një orë mbrëmjen e së premtes, pasoi me ndërprerjen e funksionimit të hidrovorit të Porto-Romanos e për pasojë 25 banesa dhe rruga automobilistike u përmbytën. Të njëjtin fat me to pësuan edhe dy shkolla të qytetit, disa rrugë dhe një garazh i madh makinash. Një situatë e tillë paralizoi pothuajse fare punën në portin detar të Durrësit, duke mos lejuar qoftë edhe për një orë të vetme hapjen e hambarëve të anijeve.
Shtabi i emergjencës në nivel prefekture ka qenë në gatishmëri gjatë natës dhe në disa raste ka dërguar mjete pune për pompimin e ujërave nga katet e para të disa objekteve si dhe nga garazhi i përmbytur.
RESHJET
Gjatë ditëve të fundit Durrësi është përfshirë nga reshje shiu, të cilat arritën kulimin gjatë 24 orëve të fundit. Të premten në orën 21:00, reshjet u kthyen në rrebesh dhe vazhduan gjatë gjithë natës. Vetëm në mëngjes intensiteti i shiut u pakësua, duke lejuar banorët të bëjnë bilancin e dëmeve të shkaktuara prej tij. Bilanci ishte 2 shkolla të përmbytura nga uji, i cili pushtoi oborret dhe katet e para të tyre. Bëhet fjalë për shkollën e mesme “Olsi Lasku” në Shkozet dhe për atë 9-vjeçare në Porto- Romano. Gjithashtu u përmbyt rruga e Spitallës (e cila është në proces riparimi) si dhe 25 banesa në zonën e ish-Kënetës në zgjatim të kësaj rruge. Shkak për përmbytjen e banesave ishte dalja jashtë funksionit e hidrovorit të Porto-Romanos për mungesë të furnizimit me energji elektrike. Ujërat e kanalit kryesor të Durrësit dolën nga shtrati i tyre dhe vërshuan në rrugë e nëpër oborret e banesave.
HIDROVORI
Në mëngjes u sqarua se hidrovori pushoi së funksionuari për shkak të ndërprerjes së furnizimit me energji elektrike të të gjithë Durrësit për më shumë se 1 orë. Atë e shkaktoi një avari në HEC-in e Vaut të Dejës, por që për Durrësin rezultoi me pasoja. Ujërat “pushtuan” edhe rrugën “Skënderbej” deri te stacioni hekurudhor, rrugët te ish-URT-ja si dhe atë që lidh urën e Dajlanit me pjesën tjetër të qytetit. Ndërkohë, një garazh i përmasave të mëdha në lagjen nr.4, i ndërtuar në katin e nëndheshëm të një pallati, u mbush me ujë duke shkaktuar përmbytjen e 40 makinave luksoze. Kanë qenë zjarrfikëset që për orë të tëra pompuan ujin duke e çliruar garazhin prej tij, por megjithatë makinat përfunduan nëpër servise. Një numër i madh banesash në katet përdhese të pallateve si dhe lokale e dyqane u mbuluan nga uji. Vetëm në orët e mesditës një pjesë e tyre u kthye në normalitet. Ndërkaq, në portin detar funksionoi vetëm terminali i trageteve në një kohë që sektorët e tjerë mbetën të paralizuar.