Ançeloti: Nuk e njoh për “të veçantë”, dua Europën!

[Bruno]

Trajneri italian nis aventurën te Çelsi: Nuk jam si Mourinjo, por kam ardhur për të fituar gjithçka
Në konferencën e parë për shtyp në “Stamford Bridge” Ançeloti flet anglisht dhe imponon ligjet e tij. “Dua të flas anglisht”, e nis ai konferencën, madje edhe gazetarët italianë duhet t’i bëjnë pyetjet anglisht. Ja cila ka qenë intervista e tij…
‑ Xhon Terri kërkohet me ngulm nga Mançester Siti. A do ta humbë Çelsi kapitenin e vet?
‑ Terri është simbol i Çelsit, por nuk e di a do të qëndrojë kapiteno… (në sallë shihet pasiguri në fytyrat e gazetarëve). Më pëlqen të bëj shaka në konferencë për shtyp. Unë jam pak ironik, futbolli duhet të jetë zbavitës për mua dhe për ju.
‑ Po Terri?
‑ Nuk ka dëshirë të largohet dhe Çelsi, ka dëshirë që të qëndrojë. Siti flet për çmimin, por Xhoni nuk ka çmim. Do të jetë kapiten i Çelsit përjetë. I ngjan shumë Maldinit.
‑ Dita e parë që jeni te Çelsi. Si ju duket në krahasim me ditën e parë te Milani? Çfarë ju thotë zemra?
‑ Milani më ka dhënë tetë vite të paharrueshëm. I falënderoj të gjithë dhe i uroj fat Milanit.
‑ Si do t’ia dalin pa Kakànë?
‑ Kakà është lojtar i madh, por kur largohet një lojtar i tillë, mund të ndodhë që të dalin në pah të tjerë lojtarë të mëdhenj.
‑ Leonardo?
‑ Ka qenë dhe mbetet mik i imi. I është dhënë një mundësi e madhe, e njeh mirë punën. Me Tasotin mund të bëjnë një punë shumë të mirë. ‑ Berluskoni, a ju ka telefonuar kohët e fundit?
‑ Kam folur dy herë me të. Më telefooi javën që shkoi dhe më uroi për detyrën e re.
‑ Pasi keni provuar Berluskonin, do ta keni më të lehtë me Abramoviçin?
‑ Berluskoni është mbi të gjitha një tifoz i madh i Milanit, ashtu siç është Abramoviçi i Çelsit. I duan skuadrat e tyre dhe kjo ka rëndësi për ata që punojnë në klub.
‑ A mund t’u thuhet jo këtyre?
‑ Berluskoni dhe Abramoviç janë inteligjentë, nuk bëjnë pyetje delikate.
‑ Abramoviç ju ka kërkuar të fitoni menjëherë Ligën e Kampionëve me Çelsin?
‑ Besomëni, për këtë jam këtu, për të fituar Ligën e Kampionëve. Çelsi i ka shkuar shumë pranë në sezonin 2008. Me pesë gjysmëfinale në 6 vjet i ka cilësitë e duhura për të bërë hapin vendimtar.
‑ Po Premier Liga?
‑ Çelsi duhet të japë maksimumin kudo, për të fituar çdo kompeticion ku merr pjesë.
‑ Atëherë duhet të jeni edhe më i veçantë se “I Veçanti”…
‑ Nuk e njoh “Të Veçantin”… Nuk bëj krahasime me trajnerë të tjerë, i respektoj kolegët, por ndjek metodat e mia.
‑ Që kur është larguar “I Veçanti”, Çelsi ka ndërruar tre trajnerë, por asnjëri nuk e ka mbyllur sezonin të plotë.
‑ Dua të jap maksimumin me përvojën time. Shpresoj të qëndroj shumë vite te Çelsi. Vij pas tetë sezonesh te Milani. Do të bëj gjithçka për të qëndruar këtu, e ndiej që mund të bëj një punë shumë të mirë.
‑ Reali i Madridit po blen gjithçka. Çelsi rri e sheh?
‑ Kemi blerë Zhirkovin, mesfushorin e majtë të CSKA së Moskës, krahas dy të rinjve të talentuar, Starrixh dhe Turnbull. Po e ndjekim me kujdes merkaton, ka kohë deri më 31 gusht.
‑ Pato? Pirlo?
‑ Janë të Milanit. Nuk dua të përmend emra, por nëse na dalin përpara lojtarë kreativë dhe të rëndësishëm, do t’i blejmë. Sidoqoftë, Çelsi im do të jetë kreativ edhe pa blerje të tjera. Do ta dizenjoj skuadrën me këtë synim.
‑ Riberi? Ksabi Alonso?
‑ Riberi është për momentin i Bajernit. Reali mund ta marrë edhe atë, madje edhe Alonson. Janë shpenzime të nevojshme për Realin, pasi kohët e fundit nuk shkonte mirë.
‑ Shevçenko?
‑ Do të vijë me nisjen e fazës përgatitore, më 9 korrik. Më pas do të bisedojmë për të ardhmen e tij.

Zhirkov kalon vizitat mjekësore
Juri Zhirkov ka pohuar se ka kaluar me sukses vizitën mjekësore te Çelsi dhe ndihet në formë të përkryer. Skuadra londineze ka pohuar të hënën se ka arritur marrëveshjen për blerjen e mesfushorit rus të CSKA-së së Moskës, i cili kushton plot 18 milionë stërlina. Zhirkov, 25 vjeç, lojtar i përfaqësueses ruse, ka theksuar: “Ekzaminimet mjekësore zgjatën tri orë”, tha ai për gazetarët anglezë. “Së pari kalova ekzaminimin e përgjithshëm dhe më pas mjekët më vendosën në një dhomë speciale për të studiuar trupin tim me hollësi. Nuk e kam parë ende qendrën stërvitore të Çelsit dhe as stadiumin, por së shpejti do t’i shoh. Do të prezantohem edhe me stafin e trajnerëve dhe me lojtarët, pasi do të bëj edhe seancën e parë stërvitore me skuadrën. Jam në formë të përkryer dhe më pëlqen mënyra se si më kanë mirëpritur në klub. Edhe pse sapo kam ardhur, shoh një atmosferë miqësore karshi meje. Mezi pres ta nis karrierën te Çelsi”, ka përfunduar Zhirkov.
Çelsi: Xhon Terri nuk ka çmim
Shefi ekzekutiv i Çelsit, Piter Kenion, ka theksuar edhe një herë se Xhon Terri është i përkushtuar ndaj skuadrës londineze. Mançester Siti, kohët e fundit, bëri një tjetër ofertë për të blerë mbrojtësin e shquar të Çelsit, por oferta u refuzua nga Blutë, edhe pse oferta ende është në tavolinë. Trajneri i ri i Çelsit, italiani Karlo Ançeloti, e ka bërë të qartë se Xhon Terri mbetet pjesë integrale e planeve të tij. Kenion ka mbështetur fjalët e italianit dhe ka pohuar se spekullimet për Terrin do të marrin fund së shpejti. “Ai nuk është në shitje cilado qoftë oferta e bërë”, ka thënë Kenion për “The Independent”. “Ai ka kontratë trevjeçare me klubin tonë. Na ka thënë se nuk dëshiron të largohet dhe ne nuk duam që të largohet. Këtu mbaron kjo histori”.

Obi Mikel, një hap pranë rinovimit
Mesfushori i Çelsit, Xhon Obi Mikel, pritet t’u japë fund spekullimeve për të ardhmen e tij, duke firmosur një kontratë të re afatgjatë brenda kësaj jave. Lajmi konfirmohet nga menaxheri i tij. Kontrata aktuale e tij skadon vitin që vjen, ndërkohë ka fjalë se Hoze Mourinjo dëshiron ta marrë këtë verë 22-vjeçarin nga Nigeria te Interi. Por menaxheri Xhon Shitu ka thënë se Mikel është i gatshëm të nënshkruajë kontratën pesëvjeçare, që i kanë ofruar në “Stamford Bridge”. “Ai do ta nënshkruajë këtë kontratë këtë javë. Disa nga zyrtarët e klubit nuk kanë qenë në klub, prandaj nënshkrimi i kontratës ka mbetur për këtë javë. Sapo të vijnë, ai do të nënshkruajë kontratën e re. Eshtë një kontratë shumë e favorshme për të dhe do ta barazaojë me lojtarët më të paguar të klubit”.

Sulmuesi
Didië Drogba beson te suksesi në Champions
Didië Drogba ka paralajmëruar rivalët në Premier Ligë dhe në Ligën e Kampionëve se jo vetëm që ai do të jetë në formë shumë më të mirë sezonin që vjen, por edhe Çelsi i tij do të jetë skuadër shumë më e mirë, që do të pretendojë për trofe. Sulmuesi nga Bregu i Fildishtë është i vendosur se mund ta ndihmojë skuadrën e tij për të fituar trofe. Ai nuk synon vetëm Premier Ligën dhe Kupën e Anglisë, por do të donte të fitonte Ligën e Kampionëve, që po u rrëshqet nga duart Bluve me gjithë harxhimet e mëdha të bosit Abramoviç. “Kam besim se mund të sfidojmë të tjerët në luftë për trofe në Angli, por dua të fitoj gjithashtu edhe Ligën e Kampionëve. I kemi shkuar shumë pranë në të shkuarën, kështu që nuk ka arsye që të mos ia dalim mbanë këtë herë. Të jesh fitues i Ligës së Kampionëve është nder i madh. Më kanë kritikuar shpesh në të shkuarën dhe me të drejtë. Sjellja ime në ndeshjen kundër Barcelonës më ka mbetur peng, pasi nuk ishte e mirë. Por me ndihmën e shokëve të skuadrës dhe të stafit të klubit, do të fokusohem te loja ime dhe do të kontribuoj për një sezon të madh. Tani ndihem më mirë te Çelsi. Do ta shlyej dënimin tim dhe më pas do të rikthehem edhe më i fortë”, ka thënë Drogba!