Bajerni i Mynihut, “kantier ndërtimi”

[Bruno]

Merkato është në kulmin e saj dhe deri tani bavarezët kanë qenë një nga klubet më aktivë në shitblerje
Bajerni i Mynihut ka nisur prej një jave përgatitjet për sezonin e ri, që do të nisë zyrtarisht në muajin gusht me ndeshjen e parë të Bundesligës. Nëntë lojtarë të rinj janë vënë në dispozicion të trajneri Luis van Gal, i cili erdhi në “Allianz Arena” pas titullit të fituar në Holandë me Alkmarin. Teksa Ze Roberto, Odo dhe Podolski janë larguar nga Mynihu, merkato e Bajernit mbetet ende e hapur. Riberi kërkohet me ngulm nga Reali, Tim Borovski dhe Luçio i kanë bërë valixhet gati, ndërsa Nojer, Bosingua dhe Srna janë disa nga objektivat e drejtuesve bavarezë. Ja cilat kanë qenë shtatë blerjet e Bajernit gjatë merkatos së verës, duke konsideruar se Holger Badstuber dhe Tomas Myler kanë ardhur nga ekipi i të rinjve…

1.Mario GOMEZ
30 milionë eurot e shpenzuara nga bavarezët tregojnë cilësinë e sulmuesit të ardhur nga Shtutgarti. 24-vjeçari është bërë futbollisti më i shtrenjtë i të gjitha kohërave në Bundesligë. Mario Gomez fitoi titullin me Shtutgartin në vitin 2007, duke u shpallur golashënuesi më i mirë. Ai ishte pjesë e kombëtares gjermane, që luajti në Euro 2008.
Karriera
Sezoni Skuadra Nd. Gola
2003‑2005 Shtutgart II 43 24
2005‑2009 Shtutgart 121 63
2007‑…. Gjermania 25 10
“Futbollisti i vitit në Gjermani” 2007

2.Anatoli TIMOSHUK
Bajerni u eleminua nga Zeniti dy vjet më parë në gjysmëfinalen e Kupës UEFA dhe menjëherë pas ndeshjes drejtuesit bavarezë firmosën një parakontratë me ukrainasin Anatoli Timoshuk, kapitenin kundërshtar, që u la mbresa të jashtëzakonshme. 30-vjeçari ka ardhur “gratis” pasi Bajerni e priti për 18 muaj. Ai do të jetë titullar përkrah Mark Van Bomelit.
Karriera
Sezoni Skuadra Nd. Gola
1997‑2007 Shakhtjor 227 32
2007‑2009 Zenit 67 10
2000‑…. Ukraina 83 1
“Futbollisti ukrainas i vitit” 2002, 2006, 2008
“Futbollisti i vitit në Rusi” 2007

3.Daniel PRAJNIÇ
Daniel Prajniç kaloi te Bajerni i Mynihut, pasi bavarezët i paguan shtatë milionë euro Herenvenit. Ai është mesfushori i majtë i kombëtares së Kroacisë dhe në moshën 27-vjeçare ka firmosur për klubin e gjashtë në karrierën e tij. Prajniç u kërkua me ngulm nga Luis van Gal, i cili e ka pëlqyer gjatë paraqitjeve të tij në kampionatin holandez.
Karriera
Sezoni Skuadra Nd. Gola
2004‑2005 Dinamo Z 29 2
2005‑2009 Herenven 128 39
2004‑…. Kroacia 20 0

4.Edson Brafheid
Edson Brafheid është një mbrojtës i majtë dhe shihet si alternativa e Filip Lahmit, sa herë që ky i fundit të ketë nevojë për pushim. Brefhied luajti në sezonin e kaluar me nënkampionët e Holandës, Tvente, dhe është një tjetër njohje e mirë e Van Galit. 26-vjeçari ishte pjesë e kombëtares U-21 të Holandës, e cila fitoi kampionatin europian në vitin 2005.
Karriera
Sezoni Skuadra Nd. Gola
2003‑2007 Utreht 80 2
2007‑2009 Tvente 76 1
Kampion Europe U-21 2005

5.Ivica OLIÇ
Oliç mund të luajë si sulmues ose si mesfushor i majtë i avancuar. 29-vjeçari ka ardhur me parametër zero, pasi mbylli kontratën e tij me Hamburgun. Pjesë e rregullt e kombëtares kroate, Oliç, mund të jetë partneri ideal për të tre sulmuesit e tjerë Klose, Toni dhe Gomez. “Bajerni është ëndrra e çdo futbollisti dhe ka ardhur në momentin ideal të karrierës sime” - ka thënë ai.
Karriera
Sezoni Skuadra Nd. Gola
2002‑2003 Dinamo Z 72 16
2003‑2007 CSKA 78 35
2007‑2009 Hamburg 70 26
2002‑…. Kroacia 62 13

6.Aleks BUMJOHAN
22-vjeçari Aleksandër Bumjohan shihet si e ardhmja e mesfushës së Bajernit, duke parë moshën e madhe të Van Bomelit dhe Timoshukut. Drejtuesit e Shalkes janë akoma duke vajtuar largimin e tij për te Borusia e Myshengledbahut, ku shkëlqeu në sezonin e kaluar. Gjithashtu, ai ka qenë pjesë e rregullt e kombëtares U-21 të Gjermanisë në dy vitet e fundit.
Karriera
Sezoni Skuadra Nd. Gola
2007‑2008 Borusia M II 8 2
2008‑2009 Borusia M 32 3

7.Andreas Gërlitc
Gërlitc është rritur tek të rinjtë e Mynih 1860, por debutimin në Bundesligë e shënoi me fanellën e Bajernit. Pasi qëndroi dy vjet në stolin e bavarezëve, mesfushori u huazua për dy sezone te Karlsruhe. Van Gal ka vendosur ta mbajë 27-vjeçarin në skuadër, pavarësisht nga interesimi i Hanoverit dhe Këlnit. Gërlitc do të zëvendosojë Ze Roberton.
Karriera
Sezoni Skuadra Nd. Gola
2004-2007 Bajern M 18 0
2007-2009 Karlsruhe 49 1

Të larguarit…
Luçio, Borovski, Lehl dhe ndoshta Luka Toni nuk bëjnë pjesë në planet e trajnerit Van Gal. Klubi ia ka komunikuar diçka të tillë, por këta lojtarë ende nuk e kanë gjetur klubin e ardhshëm. Në pritje të largimit të tyre, ja cilët kanë qenë tre lojtarët që i dhanë “lamtumirën” Bajernit…
1.Lukas Podolski
Podolski u rikthye te Këlni, atje ku u lind dhe u rrit, pas dy sezoneve në hije me fanellën e Bajernit. I ardhur si talenti më i madh i futbollit gjerman, Lukas u zbeh me kalimin e kohës. Në 71 ndeshje që luajti me fanellën e bavarezëve shënoi 15 gola.
2.Ze Roberto
Ze Roberto la Bajernin për të luajtur me rivalët e Hamburgut, pasi bavarezët nuk i ofruan një kontratë dyvjeçare, ashtu si donte braziliani. 35-vjeçari luajti 169 ndeshje për Bajernin, në të cilat shënoi 15 gola.
3.Masimo Odo
33-vjeçari Masimo Odo do të rikthehet te Milani, pasi mbylli gjashtë muajt e huazimit. Drejtuesit e Bajernit vendosën të mos e shfrytëzojnë klauzolën për blerjen përfundimtare të italianit, pasi nuk u bindën nga paraqitjet e tij në sezonin e kaluar!