Tifozet e Chelsit

[King_Arthur]

CHELSEA FC

[King_Arthur]

Çelsi, duarbosh në Athinë
Çelsi nuk arriti të shkonte më shumë se një barazim pa gola në fushën e Olimpiakosit në takimin e parë të 1/8﷓ave të finaleve në Champions League, në Athinë. Xhon Terri dhe Frenk Lampard u lanë në pankinë, por Blutë nuk hasën thuajse asnjë shqetësim në pjesën e parë, në të cilën Rikardo Karvaljo pati shansin më të mirë. Miqtë treguan më shumë ambicie pas pushimit, por pa krijuar shumë. Gjuajtja e Salomon Kalu përfundoi në trupin e portierit grek në fund të takimit, duke lënë Çelsin të shpresojë për më shumë në takimin e kthimit. Dhe, me rekordin e tij të shkëlqyer në fushën e vet, Blutë e Avram Grantit do të jenë favoritë për të kaluar në çerekfinale për herën e katërt në pesë sezonet e fundit. Në fakt, të martën në mbrëmje armiku kryesor i spektaklit ishte moti i keq, pasi temperaturat në Athinën me dëborë ishin shumë të ulëta, aq sa lojtarët e kishin të vështirë edhe të merrnin frymë. Olimpiakosi vuri në përdorim të gjithë eksperiencën e akumuluar vitet e fundit në Champions League, duke mos lejuar Çelsin të dilte në lojën e tij të zakonshme me pasime të shkurtra, por pa qenë shumë i rrezikshëm në sulm, ku Darko Kovaçeviç u duk i izoluar. Blutë ia lejuan topin më shumë grekëve, teksa Predrag Xhorxheviç dhe Luciano Galeti vunë në punë gjatë gjithë kohës mbrojtësin e Anglisë, Eshli Kol, por vetëm kaq sepse Olimpiakosit i mungoi pasimi i fundit, ose më mirë asisti që mund ta kishte zhbllokuar takimin. Në krahun tjetër Blutë u dukën se ishin të lëvizshëm dhe me qarkullim të mirë topi, por edhe ata nuk patën më shumë se raste sporadike të parrezikshme. Tani gjithçka i mbetet duelit të dytë në “Stamford Bridge” pas dy javësh, por të gjitha gjasat janë që në Londër Çelsi do t’i bjerë një tjetër muzike, i shtyrë edhe nga tifozët e vet të zjarrtë.

[King_Arthur]

Pronari i Çelsit, Roman Abramoviç, u shfaq në selinë e përgjithshme të Çelsit pas humbjes së pësuar në finalen e Kupës së Ligës ndaj Totenhamit për të rikonfirmuar besimin e tij në trajnerin Avram Grant. Rusi shoqërohej në këtë vizitë edhe nga shefi ekzekutiv i klubit, Piter Kenion. Sipas të përditshmes angleze “Daily Express”, Abramoviç i premtoi trajnerit izraelit një fond prej 100 milion stërlinash (130 milion euro) për të përforcuar skuadrën në verë mekusht që të fitojë ndonjë titull në këtë sezon, ose të paktën të sigurojë pjesëmarrjen për në edicionin e ardhsghëm të Champions League.

I pari në listën “e shpenzimeve” të Grantit është milanisti Kaka, për të cilin është gati një ofertë prej 25 milion stërlinash (33 mln euro) dhe sulmuesi i Valencias, David Vija, i vlerësuar me 15 milion stërlina (20 mln euro). Përsa i përket futbollistëve që do të largohen duket pothuajse e sigurt që Lampardi dhe Drogba do të braktisin skuadrën në fundin e sezonit. Gjithashtu, Granti ka të qartë që edhe ai do të largohet në fund të sezonit nëse nuk do të arrijë të përmbushë objektivat që i janë fiksuar skuadrës. Nëse kjo do të ndodhë, izraeliti do të rikthehet në detyrën e drejtorit teknik që mbajti gjatë kohës së Murinjos, ndërsa Frenk Rajkard është alternativa numër një për stolin e Çelsit nëse ai do të lirohet.

Granti vazhdon të shihet me antipati nga tifozeria e dashuruar pas paraardhësit të tij, Hoze Murinjo. Një mendm i tillë reflektohet edhe në mesazhet e publikuaa në forumin e tifozëve të Çelsit, “Chelsea Chart”, në të cilin është i zakonshëm të lexosh mesazhe të tipit: “Me Grantin vetëm mund të përkeqësohemi”. Në të njëjtin formun nuk mungojnë as sulmet ndaj ndihmëstrajnerit Henk Ten Kate, i cili pati një konflikt verbal me kapitenin Xhon Terri përpara finales me Totenhamin. “Patëm një konflikt mbi mendimet tona për llojin e përshtatshëm të stërvitjes”, deklaroi 53﷓vjeçari Ten Kate në gazetën holandeze “Algemeen Dagblad”. “Terri dëshironte një seancë stërvitore shumë më intensive, ndërsa unë gjykova që nuk ishte rasti për të bërë diçka të tillë vetëm një ditë përpara finales. Eshtë e vërtetë që u thanë disa fjalë më shumë, por këtu në Angli kjo është diçka normale. Për më tepër, jemi të dy njerëz impulsivë, por të dy zotërojmë një respekt të ndërsjelltë ndaj njëri﷓tjetrit”.

[King_Arthur]

Hoze Murinjo: Dua ta "vras" Çelsin

Hose Mourinjo ka paralajmëruar Çelsin se synon ta "vrasë" kur të rikthehet aktiv si trajner. Ish-drejtuesi i stolit të bluve konfirmon dashurinë që ka për klubin, të cilin e drejtoi për më shumë se tre vjet, përpara se të largohej në mënyrë të bujshme në shtator 2007. Gjithsesi, portugezi kërkon deri në dëshpërim të përballet me këtë skuadër në edicionin e ardhshëm të Ligës së Kampioneve dhe t‘i eliminojë. "Shpresoj të luaj kundër tyre në edicionin e ri të Championsit", tha tekniku luzitan. "Nëse do t‘i kem kundërshtarë në aktivitetin më të rëndësishëm evropian, dua t‘i ‘vras‘, ky është mesazhi im". Murinjo është zëvendësuar nga Avram Grant, i cili fillimisht ishte punësuar në "Stemford Brixh" si drejtor sportiv. Ai refuzoi të shprehte një mendim për izraelitin, duke thënë: "Nuk ndiej asgjë për të, ndiej shumë për klubin, por jo personalisht për Grant. Çelsi vazhdon të jetë pjesë e imja, është një klub që do ta kem përgjithmonë në zemër. Edhe pasi u largova, nuk thashë asnjëherë një fjalë të keqe për klubin dhe kjo nuk ka për të ndodhur as në të ardhmen". Largimi i Murinjos vazhdon të mbetet mister, edhe pse sipas zërave shkak u bënë marrëdhëniet e tensionuara me pronarin Roman Abramoviç. Megjithatë, portugezi zbuloi se ende vazhdon të mbajë kontakte me manjatin rus. "Më duket se javën e kaluar fola me drejtuesit e klubit, tha ai. Bisedova me z.Abramoviç dhe (shefin ekzekutiv) Pitër Kenion, pasi ne vazhdojmë të mbajmë kontakte. Po u thosha se i uroj të gjithë të mirat, suksese dhe që të fitojnë gjithmonë".

Murinjo vazhdon të stërvitet 20 minuta në ditë, vrapime dhe muskuj barku. Asnjë sekondë më shumë. Pjesën tjetër të kohës e kalon me familjen, ndërsa gjatë fundjavës ulet përpara televizorit dhe shikon ndeshjet. Rikthimin si trajner e sheh vetëm vitin e ardhshëm. "Momentalisht nuk kam dëshirë të kthehem në stol, sepse po studioj. Do jem i gatshëm vitin e ardhshëm, pohoi ai. E ardhmja? Në Itali ose në Spanjë. Më pas duhet të kthehem në Angli dhe në fund ta mbyll karrierën si trajner i kombëtares portugeze".


Vesi

Murinjo ka një arkiv personal ku ruan skemat, skedat e lojtarëve dhe shënimet e punës që prej ditës së parë që ka drejtuar një skuadër

[King_Arthur]

08/03/2008
Murinjo, mes Realit dhe kthimit te Çelsi

Mediat spanjolle publikojnë hipotezat e transferimit te skuadra madrilene

Hoze Murinjo mund të jetë trajneri i ardhshëm i Realit të Madridit. Hipoteza e transferimit të bujshëm të trajnerit portugez ka qarkulluar dje në të gjitha mediat spanjolle, të cilat janë të bindura se gjermani Shuster do të largohet nga madrilenët në fundin e këtij sezoni. "Marca" dhe "El Mundo Deportivo" kanë bërë të qartë se Kalderon dhe Mijatoviç kanë humbur besimin te trajneri i cili premtoi lojë të bukur dhe trofe, por skuadra që tani është jashtë Ligës së Kampioneve dhe rrezikon edhe kampionatin, ku diferenca me Barcelonën nuk është shumë e madhe. Sipas mediave spanjolle, Hoze Murinjo është kandidati më i përshtatshëm për këtë marrë drejtimin e këtij ekipi, ndonëse kohët e fundit është lakuar edhe emri i Karlo Ançelotit.

Vetë drejtuesit e Realit të Madridit kanë replikuar shumë shpejt, duke përgënjeshtruar gjithçka në faqen e internetit të klubit. "Informacioni i paraqitur nga disa media rreth të ardhmes së Bernd Shuster është i pavërtetë dhe i gabuar. Klubi ka besim të plotë te z. Bernd Shuster, i cili nuk ka nevojë të sigurohet për një gjë të tillë. Është përgjegjësia e tifozëve të Real Madridit për të gjykuar sjelljen e shtypit që publikon gënjeshtra të kësaj natyre, qëllimi i të cilave është vetëm të prishin harmoninë dhe të sjellin frymën e mosmarrëveshjes, e cila nuk përfaqëson realitetin aktual në skuadër", shkruhej në deklaratën e bërë nga klubi madrilen.

Por nëse në Spanjë të gjithë lakojnë emrin e Murinjos, ky i fundit duket se vazhdon të jetë shumë i lidhur me skuadrën e Çelsit, duke mos refuzuar hipotezën e kthimit përsëri në Londër. Në një intervistë për "The Sun", Murinjo ka bërë të qartë se do të pranonte të kthehej te kjo skuadër, edhe pse u largua mes polemikave. "Po, pse jo. Do të dëshiroja shumë që ta bëja një gjë të tillë. Javën e kaluar po flisja me Roman Abramoviç dhe me Piter Kenion, me të cilët jam në kontakt të vazhdueshëm. Ne kemi marrëdhënie shumë të mira dhe e vërteta është se kontrata mes nesh është ndërprerë me marrëveshje. A mund të kthehem një ditë te Çelsi? Pse jo! Unë mendoj se kjo skuadër është pjesë e jetës sime. Do ta kisha të pamundur të kthehesha në Angli dhe të merrja drejtimin e një skuadre tjetër", u shpreh trajneri portugez.