Kombëtarja Shqiptare

[King_Arthur]

Ketu Do Vihen Lajme Dhe Informacione Të Ndryshme RReth Kombëtares Shqiptare



Lojtaret e Ekipit Kombetar:

Portjeret: ARIAN BEQAJ, ISLI HIDI, ILION LIKA

Mbrojtesit: BLERIM RRUSTEMI, ELVIN BEQIRI, NEVIL DEDE, LORIK CANA, ARMEND DALLKU, ERION XHAFA, KRISTI VANGJELI, DEBATIK CURRI

Mesfushoret: KLODIAN DURO, ERVIN SKELA, DEVI MUKA, EDVIN MURATI, ALTIN LALA, JAHMIR HYKA, ERVIN BULKU, ALTIN HAXHI

Sulmuesit: ERION BOGDANI, EDMOND KAPLLANI, ALBAN BUSHI, HAMDI SALIHI, BESART BERISHA, BEKIM KASTRATI

[King_Arthur]

“Nuk duam të dëmtojmë Kombëtaren shqiptare”

Kreu i institucionit kosovar të futbollit ka thënë se ai dhe stafi i tij do të tregohen tepër të matur në këtë pikë, pasi nuk duan që të bëhen shkaktarë për dobësimin e përfaqësueses shqiptare, apo nxitës të një konflikti të mundshëm mes FFK-së dhe FSHF-së. “Së pari, falënderoj presidentin Duka për mesazhin e urimit që më kishte dërguar dhe shpresoj që të kem një bashkëpunim sa më të frytshëm me të, u shpreh Vokrri për “Panorama”. Po projektojmë një takim sa më të shpejtë me të dhe shpresojmë që kjo të realizohet. Duam që FSHF të na mbështesë maksimalisht në objektivat tona për anëtarësimin e FFK-së në UEFA e FIFA dhe kemi bindjen se kjo gjë do të realizohet”.
Kombëtarja shqiptare
Vokrri ka thënë se do të respektojë vullnetin e lojtarëve dhe se nuk do të ndërhyjë në vendimet që do të marrin futbollistët nga trojet e Kosovës, të cilët aktualisht luajnë me përfaqësuesen shqiptare. “A do të më vinte keq nëse ata do të zgjidhnin përfundimisht Shqipërinë? Sigurisht që po. Do të isha hipokrit nëse them të kundërtën, pasi dihet që ata janë futbollistë të shkëlqyer dhe çdokush do të donte t’i kishte në skuadrën e tij të zemrës. Megjithatë, kjo nuk do të thotë se FFK apo zyrtarët e saj do të ndikojnë në zgjedhjen që ata do të bëjnë. Ne do të respektojmë vullnetin e tyre dhe kurrsesi nuk do të ushtrojmë asnjë lloj presioni. Nuk duam që të dëmtojmë Shqipërinë, duke tentuar t’i bindim lojtarët nga Kosova që të largohen. Ne do të jemi asnjanës dhe do të lëmë gjithçka në dorën e tyre. Për këtë çështje kam ndërmend të bisedoj edhe me presidentin e FSHF-së Duka, i cili deri tani na ka ndihmuar gjithnjë në arenën ndërkombëtare. Nuk duam të krijojmë konflikte, sepse tani më shumë se kurrë na duhen marrëdhënie sa më të mira dhe mbështetje reciproke”.

[King_Arthur]

Ari Han drejt Selanikut, vizitë surprizë Vangjelit

Mbrojtësi i Kombëtares shqiptare nuk ka qenë në dijeni të vizitës së trajnerit, por është ndjerë tepër i kënaqur nga interesimi i tij duke thënë se kjo është një surprizë e bukur. “Nuk e dija që trajneri i Kombëtares do të vinte të më takonte, ka rrëfyer Vangjeli për ‘Panorama’. Vizita e tij më ngre moralin në këtë periudhë të vështirë që po kaloj, sepse u bë disa kohë që nuk luaj rregullisht. Një gjë e tillë është minus për çdo futbollist, kur vjen puna për në kombëtare, por fakti që trajneri Han do vijë të më takojë, tregon se është i interesuar për mua dhe njëkohësisht se më vlerëson. Sinqerisht, më bëhet qejfi që do të kem një takim me të dhe do të përpiqem që t’ia shpërblej konsideratën që ka me një punë sa më të mirë kur të grumbullohem me përfaqësuesen”.
Situata te klubi
Kristi Vangjeli debutoi me përfaqësuesen shqiptare gjatë kohës që kuqezinjtë drejtoheshin nga Bariç. Atëherë ai ishte titullar i padiskutueshëm te Aris dhe gëzonte një formë shumë të mirë, gjë që e tregoi më pas edhe në ndeshjet me Kombëtaren. Aktualisht, ai e ka humbur vendin e titullarit në formacionin e Arisit, kjo për shkak se edhe trajneri serb Bajeviç nuk është përpjekur t’ia bëjë të lehta gjërat, sepse gjithnjë i ka vënë në dispozicion shumë pak hapësira. “Futbolli është i paparashikueshëm. Mund të jesh në formë të mirë dhe të qëndrosh në stol. Kjo periudhë ka qenë plot dritëhije, por unë shpresoj se gjërat do të përmirësohem. Nuk kam se çfarë të them në adresë të trajnerit Bajeviç, pasi është ai që i bën zgjedhjet dhe unë nuk kam se çfarë të bëj”, ka thënë Vangjeli. Gjatë merkatos së janarit, 23-vjeçari shqiptar ka pasur oferta nga disa klube të tjera greke, por ai ka preferuar të qëndrojë te Aris.

[King_Arthur]

Curri: Me Shqipërinë deri në Botërorin e 2010

“Kombëtarja shqiptare po përgatitet për eliminatoret e Botërorit ‘Afrika 2010’. Sigurisht, që ne do të jemi pjesë e Kombëtares shqiptare edhe për këtë edicion, ndërsa se çfarë do të bëhet më pas, do të bisedojmë të gjithë së bashku dhe do të marrim vendimin e duhur. Për momentin është ende herët, sepse Kosova në këto eliminatore nuk merr pjesë dhe do të ishte e palogjikshme të braktisim Kombëtaren shqiptare”, ka thënë Curri për të përditshmen kosovare “Kosova Sot”. Curri është shprehur optimist se Kosova do të anëtarësohet shumë shpejt në organizmat ndërkombëtare dhe futbolli kosovar po ashtu. “Mendoj se pas formimit të shtetit në Kosovë do të ketë zhvillime pozitive edhe në futboll. Ka shumë talente, por deri tani kanë munguar kushtet. Sigurisht, që pas zgjedhjes së Vokrrit, do të ecin punët më mirë dhe FFK-ja do të marrë edhe donacione nga UEFA e FIFA, çka do të rrisë edhe cilësinë në kampionatin e Kosovës dhe në përgjithësi në futbollin kosovar”, është shprehur Curri.

[King_Arthur]

Brigel: Kosovarët? Jo e ndershme të largohen

Në të kaluarën futbollistët janë shprehur gjithnjë të rezervuar kur janë përballur me pyetje që kanë të bëjnë me këtë temë, duke përsëritur vazhdimisht se ishte herët për përgjigje të sakta, por sot një “driblim” i tillë nuk vlen më, pasi herët apo vonë ata do të japin një përgjigje përfundimtare për zgjedhjen që do të bëjnë.
Deklarata
Ish-trajneri i Kombëtares shqiptare, Hans Peter Brigel, në një intervistë për “Panorama” ka thënë se lojtarët nga Kosova që kanë veshur deri tani fanellën kuqezi duhet të qëndrojnë, pasi nuk është e ndershme të ikin. “Pavarësia e Kosovës ishte një eveniment që pritej prej kohësh dhe unë jam i bindur se kjo ishte rruga e drejtë që duhej ndjekur. Më bëhet qejfi për të gjithë shqiptarët, sepse e di që kjo është një ngjarje e madhe dhe shumë e rëndësishme për ju, është shprehur tekniku gjerman. Kombëtarja shqiptare? Unë mendoj se lojtarët nga trojet e Kosovës nuk duhet të largohen. Nuk do të ishte e ndershme. Ata gjithnjë janë trajtuar si të barabartë dhe nëse kanë qenë ndër më të mirët, njëkohësisht kanë qenë edhe ndër më të vlerësuarit dhe unë jam dëshmitar i kësaj që po them”.
Eksperienca
Sipas ish-trajnerit të Shqipërisë edhe kosovarët janë shqiptarë. “Nga eksperienca që unë pata në Shqipëri mund të them se asnjëherë nuk ka pasur dallime mes futbollistëve të Kombëtares, jo vetëm nga stafi teknik, por edhe nga drejtuesit e Federatës dhe mendoj se nuk do të ishte e ndershme që ata të largoheshin. Njerëzit e FSHF-së kishin shumë besim tek ata dhe nëse pas largimit tim, numri i lojtarëve nga Kosova në përfaqësuesen e Shqipërisë është shtuar, kjo do të thotë se Federata shqiptare ka pasur besim të plotë. Unë kam përshtypjen se nuk do të largohen. Në fund të fundit, edhe kosovarët janë shqiptarë, apo jo?”, ka nënvizuar Brigel. Tekniku gjerman ka pohuar se do të jetë një minus për Kombëtaren shqiptare fakti që shumë talente nga trojet e Kosovës nuk do të jenë më në dispozicion të Shqipërisë. “Ky po që mund të konsiderohet një problem, megjithatë kjo do të thotë se Federata shqiptare do t’u japë më tepër prioritet lojtarëve nga Shqipëria”, ka thënë tekniku gjerman.

Zhega
Medin Zhega, ish-trajneri i përfaqësueses kuqezi ka shprehur bindjen disa ditë më parë se lojtarët kosovarë do të qëndrojnë me Shqipërinë, deri pas eliminatoreve të Botërorit 2010. “Unë besoj se Lorik Cana, Armend Dallku dhe Debatik Curri do të luajnë edhe këtë edicion me Shqipërinë, pasi Kombëtarja e Kosovës do kohë të përgatitet”, ka thënë tekniku.

Strategjia
Ish-tekniku i Prishtinës, Kujtim Shala, mund të jetë trajneri i ardhshëm i Kombëtares së Kosovës. “Nëse përfaqësuesja kosovare më besohet mua, atëherë unë do të bëj të pamundurën që të ndërpres ‘rrjedhjen’ e talenteve kosovare në përfaqësuese të tjera, sepse na nevojitet një Kombëtare e fortë”, ka thënë Shala. Ai ka raporte shumë të mira me kryetarin e FFK-së, Fadil Vokrrin.

Lorik Cana
“Është një ditë speciale. Sinqerisht ishte e vështirë të përqendrohesha në lojë, kisha kaq shumë kënaqësi dhe emocione. Kishim shekuj që e prisnim atë. Unë jam ekstremisht i lumtur. Dua të falënderoj Francën që na ka mbështetur, unë jam shumë i mallëngjyer”, deklaroi kapiteni i Olimpikut të Marsejës, Lorik Cana, cituar nga faqja sportive franceze, football.fr.

[King_Arthur]

Kosovarët kuqezinj në delir: Nuk na besohet, na duket si ëndërr

“Jam shumë i emocionuar. Kemi lindur me këtë ëndërr dhe jetonim çdo ditë me të. Tani që u shpall Pavarësia e Kosovës nuk më mbetet gjë tjetër veçse ta festoj këtë ditë dhe t’iu uroj të gjithë shqiptarëve begati në të ardhmen”, ka thënë Besnik Hasi për “Panorama”. Pyetjet për të ardhmen e Kombëtares shqiptare do të ishin të pavenda në një ditë si ajo e djeshmja për cilindo kosovar. Besnik Hasi ka qenë duke festuar me disa nga të afërmit e tij në Belgjikë, madje gjatë gjithë kohës ka marrë telefonata të vazhdueshme edhe nga media belge, por interesant është fakti që asnjë prej shokëve të tij, me të cilët ka luajtur në Kombëtaren shqiptare, nuk i kishte telefonuar për ta uruar. “Kam marrë mbi dyqind telefonata sot nga të afërm dhe gazetarë të cilët më kanë uruar. Shokët në Kombëtare? Në fakt deri tani (ora 18.20) nuk më ka telefonuar asnjëri prej tyre, por unë vazhdoj të jem në pritje. Nuk besoj se Igli Tare do të harrojë. Ai gjithnjë është i përpiktë dhe do të më telefonojë”, ka thënë Hasi. Shumë i lumtur ka qenë edhe portieri i Kombëtares shqiptare, Arjan Beqaj, i cili ka thënë se ajo e djeshmja ishte një ditë historike për Kosovën. “Kosova dhe qytetarët e saj e prisnin prej dekadash këtë ditë. Shumë prej tyre janë ndarë nga kjo botë pa iu realizuar kjo ëndërr, ndërsa shumë të tjerë kanë dhënë jetën që të vinte kjo ditë. Jam i emocionuar dhe shumë i lumtur. Nuk ka asnjë kosovar që të mos ketë menduar për këtë ditë dhe tani që ajo erdhi, më duket sikur jam në ëndërr. Gjithë populli shqiptar e meritonte një ditë të tillë dhe jam shumë i lumtur që Kosova tashmë do të jetë e pavarur”, ka thënë gardiani i përfaqësueses kuqezi në për “Panorama”.

[King_Arthur]

Cana: Pavarësia më bën krenar

Ai ka thënë për median franceze se ndihet i lumtur, sepse u realizua ëndrra e të gjithë shqiptarëve. “Eshtë një gjë që më bën shumë krenar, më jep shumë kënaqësi, sepse ne e kemi pritur me shekuj. Kjo pavarësi duhet të na shërbejë për të ecur përpara. Unë jam i lumtur për familjen time që është atje. Njerëzit e meritojnë. Unë jam shumë krenar për arritjen e Pavarësisë”, ka thënë Cana. Lojtari ka thënë se do të donte që të ishte në Kosovë ditën e shpalljes së Pavarësisë, por për shkak të impenjimeve shumë të rëndësishme me Marsejën, nuk mundi që të udhëtonte drejt Prishtinës. “Unë do të kisha dashur të isha atje të dielën, por ka disa gjëra të rëndësishme që më presin me Marsejën”, ka thënë futbollisti.

[King_Arthur]

Hani synon të bëjë për vete “senatorët”

Tekniku holandez pasi ka mbërritur dje në Tiranë ka pohuar se turneu i tij që nisi me vizitën që i bëri Canës pak ditë më parë, ka për qëllim jo vetëm që të vëzhgojë nga afër lojtarët, por edhe për të biseduar me ta, me qëllim që të krijojë marrëdhënie sa më të mira. “Çfarë biseduam me Canën? Këto janë gjëra që nuk bëhen publike. Qëllimi i turneut tim nuk është vetëm që unë të vëzhgoj lojtarët, por edhe të bisedoj me ta për gjëra personale. Unë e di që shqiptarët dinë të luajnë futboll, por një trajner ka nevojë edhe për të biseduar me lojtarët e tij”, ka thënë Han. Kjo është një taktikë të cilën tekniku i Shqipërisë nuk e ka praktikuar në skuadrat e tjera Kombëtare ku ka punuar. Ndoshta kjo iniciativë e tij ka të bëjë me faktin se ai është njohur me situatën në përfaqësuesen shqiptare dhe e di mirë se si iku paraardhësi i tij Oto Bariç. Hani ka për detyrë të rikthejë disiplinën në radhët e kuqezinjve, por këtë nuk mund ta realizojë pa pasur mbështetjen e disa prej senatorëve të grupit si Cana, Lala, Bogdani apo Skela. Ndoshta kjo është arsyeja e vërtetë e turit që ka ndërmarrë tekniku holandez.
Të rinjtë
Trajneri i Kombëtares ka parë vetëm një pjesë të derbit të kryeqytetit Dinamo-Tirana dhe burime pranë tij bënë të ditur se tekniku është larguar në pushim të ndeshjes nga stadiumi për shkak se ishte shumë ftohtë në “Selman Stërmasi”. Niveli i 45’ minutave të para të ndeshjes duket se nuk i ka bërë aspak përshtypje trajnerit. Megjithatë tekniku ka thënë se ndodhet në Tiranë për të parë disa futbollistë të rinj, të cilët mund t’i shërbejnë përfaqësueses shqiptare në të ardhmen. “Kam ardhur në Shqipëri për të parë dy ndeshje të kampionatit shqiptar – ka thënë Han – Dua të shoh nga afër disa lojtarë të kampionatit vendas, të cilët mendoj se mund t’i duhen Shqipërisë në të ardhmen. Do të bisedoj edhe me drejtuesit e FSHF-së për planet tona dhe për dy miqësoret e ardhshme që kemi planifikuar. Kemi shumë punë për të bërë, ndaj edhe kam ardhur këtu”. Kjo është vizita e dytë e Ari Hanit në Shqipëri, pas asaj të fillimit të janarit, kur ai erdhi për të nënshkruar kontratën me Federatën Shqiptare të Futbollit.

[King_Arthur]

Delegacioni i Federatës Kosovare të Futbollit, takim zyrtar në Presidencë

FFK dhe FSHF, gati krijimi i Komisionit Koordinues të Bashkëpunimit, për pranimin e Kosovës në arenën ndërkombëtare

Delegacioni i Federatës Kosovare të Futbollit, i kryesuar nga kreu i këtij institucioni, Fadil Vokrri, do të zhvillojë një takim zyrtar me Presidentin e Shqipërisë, Bamir Topi. Lajmi është bërë i ditur në sajtin e Presidentit të Republikës, që ka konfirmuar se pritja do të bëhet sot në orën 10:30 në Presidencë. Kreu i shtetit shqiptar njihet si një person shumë i pasionuar me sportin e top-këmbës dhe kjo pritje nuk duket e rastësishme.

Përfaqësuesit e Federatës Kosovare kanë mbërritur të hënën në Tiranë për një takim zyrtar me drejtues të lartë të Federatës Shqiptare të Futbollit. Aty është diskutuar gjerësisht për strategjitë e bashkëpunimit ndërmjet FFK-së dhe FSHF-së në të ardhmen. Tema kryesore ka qenë ndihma që institucioni shqiptar do t‘i japë Federatës Kosovare, për të ndërtuar strukturat e nevojshme për pranimin në FIFA dhe UEFA. "FSHF dhe FFK vërejnë me kënaqësi se marrëdhëniet mes tyre kanë qenë dhe janë vëllazërore, të ngushta dhe të shkëlqyera", citohej në deklaratën për shtyp të dy federatave. "Këto marrëdhënie dhe fryma e lartë e bashkëpunimit janë vënë re edhe në takimin e parë mes delegacioneve të nivelit të lartë. Është vënë re një përputhje e shkëlqyer e ideve dhe e strategjive që do të ndërtohen në të ardhmen në të mirën e futbollit. FSHF është e angazhuar për ta ndihmuar FFK-në në të gjitha drejtimet, derisa ajo të arrijë të ingranohet si anëtare me të drejta të plota në FIFA dhe UEFA". Aty është vendosur të krijohet një Komision Koordinues Bashkëpunimi, i cili do të drejtohet nga sekretarët e përgjithshëm Arben Bici (FSHF) dhe Heroll Saliu (FFK). Në fund të takimit është organizuar një konferencë e përbashkët për shtyp, ku nuk ka munguar interesimi rreth të ardhmes së lojtarëve kosovarë që luajnë me Shqipërinë. "Kjo nuk ishte tema e takimit që u zhvillua sot në federatë. Kryesore në këto momente është që FSHF të jetë afër FFK-së, ashtu sikurse na e kanë lënë detyrë edhe FIFA e UEFA, në mënyrë që të ndihmojmë Federatën e Kosovës për të ndërtuar struktura sipas standardeve të kërkuara", tha Duka. "Në bazë të eksperiencës mendoj se nëse çështja e pranimit do të shkojë për miratim në Kongresin e FIFA-s, nuk do të ketë asnjë votë kundër njohjes së saj". Vokrri theksoi se gjithçka do jetë në dorë të lojtarëve, pa asnjë lloj presioni: "Kur të vijë momenti do të diskutojmë me zotin Duka dhe Komitetin Ekzekutiv të FSHF-së për të marrë një vendim në të mirë të të dyja kombëtareve. Ne sigurojmë se nuk do të ndërhyjmë në dëshirat e futbollistëve. Synimi ynë nuk është që të përforcojmë Kombëtaren e Kosovës dhe të dobësojmë atë të Shqipërisë. Do të punojmë që si Shqipëria, ashtu edhe Kosova, të kenë dy kombëtare të forta".

[King_Arthur]

"Pas 10-15 vjetësh mund të kualifikohemi"

Alban Bushi flet për shanset e Shqipërisë për të luajtur në një aktivitet madhor

Alban Bushi ndryshon temë. Edhe pse përflitet se do të jetë jashtë kombëtares në miqësoren me Moldavinë më 26 mars (lista zyrtare do të publikohet sot ose nesër), sulmuesi vazhdon të ndihet pjesë e kuqezinjve. 34-vjeçari ka folur për shanset e Shqipërisë për t‘u kualifikuar në një kompeticion madhor, kampionat botëror apo evropian. Edhe pse përpara çdo aktiviteti në vend "thuren" ëndrra për shanset që përfaqësuesja ka për të luajtur përkrah skuadrave më të mëdha, Bushi nuk kërkon të shkëputet nga realiteti. Sipas tij, Shqipërisë do t‘i duhet të presë edhe 10-15 vjet për t‘u kualifikuar. "Edhe për 10-15 vitet e ardhshme, kombëtarja shqiptare nuk do të mund të dalë e para ose e dyta në grup, duhet të jemi realist", ka deklaruar Bushi për të përditshmen kosovare "Express". Për sulmuesin, arsyet kryesore për këtë pritje relativisht të gjatë janë infrastruktura e dobët dhe puna e pakët që bëhet me talentet e reja. Të njëjtat shqetësime që e kanë frenuar futbollin tonë të çajë edhe në nivel klubesh.

Në këtë prizëm, Bushi mendon se largimi i trajnerit Oto Bariç nga drejtimi i skuadrës është një humbje e madhe. Gjithsesi, ai ka vlerësuar holandezin Ari Han, si një trajner të madh. "Me ikjen e Bariçit, Shqipëria është në minus. Ai skuadrën e ndërtoi nga themeli, e përforcoi me lojtarë të rinj dhe në ekip u krijua konkurrenca në çdo repart. Nëse dikush mungonte, atëherë kishte gjithmonë një zëvendësues të denjë për të. Ndërsa në kohën e Brigelit, Shqipëria kishte vetëm një 11-she", vazhdoi më tej sulmuesi i Apolon Kallamariasë në elitën e futbollit grek. "Për sa i përket Ari Han, mendoj se është trajner i madh dhe besoj se në Kombëtare do të sjellë filozofinë e vet, sikurse kanë bërë edhe trajnerët e mëparshëm".

34-vjeçari ka folur edhe rreth situatës që po kalon klubi i tij, që momentalisht ndodhet në zonën e rënies nga kategoria: renditet e 14-ta me 20 pikë të grumbulluara në 22 takime. Bushi beson se në fund të sezonit Kallamaria do ta sigurojë mbijetesën: "Unë jam shumë i sigurt se deri në fund të sezonit, skuadra e Kallamarias do ta sigurojë mbijetesën në elitën e futbollit grek". Në fund, golashënuesi më i mirë i të gjitha kohërave në kombëtare (14 gola në 68 ndeshje) ka lavdëruar edhe mesfushorin kosovar, Përparim Hetemaj, i cili është bërë pjesë e ekipit nga Thesaloniki gjatë merkatos së janarit. "Me ardhjen e Përparim Hetemajt, skuadra është përforcuar shumë, e sidomos në sulm. Ai është një talent i madh dhe besoj se do ta ndihmojë skuadrën për të mbijetuar në ligë", përfundoi "Loku".

[King_Arthur]

7/3/2008

Igli Tare, 4 gola në miqësore

Igli Tare vazhdon të konfirmojë momentin e shkëlqyer fizik që po kalon. Ish-kapiteni i kombëtares ka shënuar katër gola në miqësoren që Lacio ka fituar 13-0 me amatorët e Tor de Çençi. Në këtë mënyrë sulmuesi, i cili është aktivizuar në pjesën e dytë me skuadrën e rezervave, ka vënë në vështirësi trajnerin Delio Rosi, duke "prenotuar" disa minuta lojë në sfidën e të dielës kundër Livornos së Erjon Bogdanit. Ky takim do të jetë edhe një "derbi" mes shqiptarëve që militojnë në Serinë A, edhe pse të dy sulmuesit pritet të jenë vetëm në stolin e rezervave. Pak ditë më parë, Tare është vlerësuar maksimalisht nga tifozët lacialë për shpirtin luftarak dhe për faktin që asnjëherë nuk ka bërë polemika, pavarësisht aktivizimit me pikatore.

[sabah]

Futboll-Kombëtarja shqiptare e 97-ta në renditjen e FIFA-s

TIRANË - Kombëtarja shqiptare e futbollit ka zbritur në renditjen mujore të FIFA-s (shkurt 2010), duke u pozicionuar në vendin e 97-të (336 pikë), një pozicion më të ulët se janari i vitit 2009 (vendi i 96-të).
Në fakt, Kombëtarja nuk luajti asnjë ndeshje gjatë muajit janar, (përveç grumbullimit të zhvilluar në Antalja (Turqi) dhe dy miqësoreve me ekipet turke), të cilat nuk ndërhyjnënë këtë renditje, ndaj zbritja me një vend është më shumë si llogaritje e rezultateve dhe takimeve të vendeve të tjera, kryesisht ato afrikane, të cilat morën pjesë në Kupën e Afrikës.
Duke bërë një krahasim të shpejtë me shkurtin 2009, kur renditeshim në vendin e 79-të, renditja e shkurtit të sivjetëm (vendi i 97-të) tregon regresin që ka pësuar Kombëtarja A (e drejtuar vitin e kaluar nga holandezi Arie Haan dhe kroati Josip Kuzhe).
Gjithsesi, renditja brenda zonës së UEFA-s nuk ka ndryshuar duke qenë sërish në vendin e 42-të, vetëm 4 ditë nga hedhja e shortit të eliminatoreve të Kampionatit Europian 2012, short që do të hidhet më 7 shkurt, në Varshavë të Polonisë, ku Shqipëria ndodhet në vazon e 5-të.
Ndeshja e parë ndërkombëtare e këtij viti për kuqezinjtë është miqësorja kundër Irlandës së Veriut, e programuar për tu luajtur “Qemal Stafa”, më 3 mars 2010.
Irlanda e Veriut renditet në vendin e 40-të në renditjen e FIFA-s dhe të 23-n në klasifikimin brenda 53 federatave që aderojnë në UEFA.
Renditja botërore kryesohet sërish nga Spanja me 1627 pikë), e ndjekur nga Brazili me 1568 pikë dhe Hollanda me 1288 pikë.
Në dhjetë vendet e para janë dhe Italia (1209 pikë), Portugalia (1176 pikë), Gjermania (1173 pikë), Franca (1117 pikë), Argentina (1082 pikë), Anglia (1076 pikë) dhe Egjipti (1069 pikë), e cila ka ngjitur 14 pozicione pasi fitoi Kupën e Afrikës.

Renditjet e Kombëtares shqiptare në muajin shkurt

Muaji Viti Pozicioni
Shkurt 2010 96
Shkurt 2009 79
Shkurt 2008 73
Shkurt 2007 87

(BalkanWeb)[IMG][/IMG]

[sabah]

Kristi Vangjeli duket se ndihet në ambientin e tij natyral në Kupat e Europës. Pas paraqitjes mbresëlënëse kundër Diego Forlanit në ndeshjen e fituar 1-0 me Atletikon e Madridit (më 16 shtator), mbrojtësi shqiptar ka shkëlqyer edhe në sfidën që Arisi i Selanikut ka luajtur të enjten përballë Bajern Leverkusenit.

Paraqitja e tij ndaj gjermanëve në Grupin B të Europa League, është vlerësuar si një “recital”. Gjatë sfidës në stadiumin “Kleanthis Vikelidis”, Vangjeli i “detyroi” komentatorët dhe gazetarët që gjatë lojës ta cilësonin 10 herë si lojtarin më të mirë, ndërsa në fund ai u përzgjodh edhe si “MVP” (Lojtari më i vlefshëm) i të gjithë 90-minutëshit.

“Trajneri vendosi edhe një herë që në ndeshjet europiane ta aktivizonte Vangjelin në krahun e djathtë të mbrojtjes dhe vazhdon të mos pendohet për këtë zgjedhje teknike. Në çdo moment, mbrojtësi shqiptar arriti që të neutralizonte të gjitha tentativat sulmuese të kundërshtarëve në krahun e tij”, ishte vlerësimi i mediave greke.

Arisi, i drejtuar nga Hektor Raul Kuper, mori një barazim shumë të vlefshëm 0-0 përballë Leverkusenit, ekipit më në formë në Bundesligën gjermane, ndërsa tashmë mban vendin e dytë në grup me 4 pikë në dy ndeshje. Ndeshja u zhvillua me ritëm të lartë dhe sulme nga të dyja skuadrat, por ajo që ra më tepër në sy ishte se i gjithë stadiumi thërriste në kor emrin e Vangjelit dhe të atdheut të tij. “Einai trelos o albanos” (shqiptari është i çmendur), duke u shprehur të mahnitur për lojën e 25-vjeçarit, ndërsa të gjithë të pranishmit i kanë dhuruar kuqeziut brohoritje dhe duartrokitje në fund të ndeshjes. “Dëshiroj t’i falënderoj të gjithë tifozët për mbështetjen që treguan ndaj meje.

Duartrokitjet e tyre më japin edhe më tepër forcë për të vazhduar në këtë rrugë”, deklaroi Vangjeli. “Gjatë gjithë këtyre viteve që aktivizohem me Arisin, mbështetja e fansave nuk më ka munguar. Për mua është një ëndërr që luaj në ekipin që dua, dëshiroj të qëndroj sa më gjatë këtu dhe të jap gjithçka për këtë skuadër”.

Me impenjimin dhe paraqitjet e tij të mira, Vangjeli ka rifituar besimin e trajnerit Kuper dhe stafit teknik, që në fillim të sezonit menduan ta largonin nga Arisi i Selanikut. “Unë bëj vetëm detyrën time: punoj dhe jap maksimumin kur trajneri vendos të më aktivizojë. Ajo që ka më tepër rëndësi është se tashmë kam gjetur ritmin, por gjithashtu kam fituar edhe besim në vetvete pas çdo ndeshjeje. Pikësëpari shpresoj që të mos pësoj asnjë dëmtim, në mënyrë që të jap më të mirën për skuadrën, ashtu si kam bërë gjatë 10 viteve që luaj me Arisin”.