Shqipëria sot ndaj Luksemburgut për fitoren e parë në grup

TIRANË- Ndeshja e mbrëmjes së sotme ndaj Luksemburgut në orën 20:15 në stadiumin kombëtar “Qemal Stafa” është një ndër takimet që kombëtarja shqiptare është e detyruar ta fitojë, çka e bën sfidën më të vështirë në grupin D për Shqipërinë.
Ndaj Luksemburgut, që renditet i 117-ti në renditjen e FIFA-s, trajneri Kuzhe ka vendosur të hedhë në fushë një formacion sulmues, me skemë 4-3-1-2. Në mbrojtje do të luajnë Curri, Cana, Dallku dhe Lila, ndërsa mesfusha përbëhet nga Bulku, Agolli në të majtë, Muzaka në të djathtë dhe Skela në rolin e organizatorit. Ndërsa në sulm pritet të aktivizohet dyshja Salihi-Bogdani.
Çmimet e biletave për ndeshjen Shqipëri-Luksemburg do të jenë disi më të larta se ndeshjet miqësore. Një biletë në tribunën kryesore kushton 5 mijë lekë, ndërsa një biletë tek tribuna D2 kushton 1 mijë lekë. Tribunat D1 dhe D3 kanë çmimin 700 lekë, ndërsa çmimi i një bilete në tribunat C dhe E është 200 lekë.
Takimi do të drejtohet nga një treshe gjyqtarësh nga Sllovakia, me kryesor Richard Trutz, i cili është një arbitër me pak eksperiencë në arenën nderkombëtare. Ai nuk ka drejtuar asnjëherë, as Shqipërinë dhe as Luksemburgun, madje as klubet e këtyre vendeve në arenën ndërkombëtare.

(BalkanWeb)