Boks,Visoka: Do t’ia thyej hundët sllovakut!

Boksieri i njohur prishtinas, Xhavit Visoka është duke u përgatitur në Velipojë të Shqipërisë për duelin profesionist që do të zhvillojë më 28 gusht kundërt boksierit sllovak, Tamas Kovacs. Ky duel zhvillohet për titullin PBU (Professional Boxing Union) dhe aktualisht ka zgjuar vëmendje të madhe edhe në mediet sllovake, por edhe ndër dashamirët e këtij sporti. Visoka thotë se do t’u tregojë sllovakëve se kush është zemra e shqiptarit dhe si boksohet në ring. Atë fare nuk e pengon që do të jetë mysafir në palestrën e sportit “Sala” të Sllovakisë, por premton fitore. “Kovacs është boksier i mirë, i cili ka 17 fitore dhe asnjë humbje. Në fakt është dy herë kampion interkontinental. Premtoj se humbjen e parë do t’ia shkaktoj unë”, tha Visoka.

Boksieri prishtinas tha se për tre rundet do ta shtrijë përtokë boksierin sllovak. “Boksieri sllovak, i njohur me nofkën ‘Tomi Kid’, do ta shohë se kush është Xhavit Visoka. Para disa ditëve në mediet sllovake Kovasc ka deklaruar se ai për gjashtë runde do të më hedhë në dysheme. Unë atij ia bëj me dije se qysh në raundin e tretë do t’ia thyej hundët dhe do ta rrëzoj përtokë. Ai pas raundit të tretë mund ta shohë veten në spital, ndërsa unë do të shkoj dhe do të pushoj në krevat, si kampion”, tha ai.

Visoka deri më tash në profesionalizëm ka shënuar gjashtë fitore dhe ka pësuar një humbje, ndërsa rivali i tij pos që ka shënuar 17 fitore, 11 prej tyre i ka me nokaut.

“Në Velipojë përgatitem intensivisht për të qenë sa më i gatshëm për sfidën e 28 gushtit. U kam bërë oferta shumë trajnerëve që të punojnë me mua, por për shkaqe objektive nuk mundën të jenë pjesë imja. Edhe Aziz Salihu ka qenë i ngarkuar, pasi është duke u përgatitur për filmin dokumentar dhe s’ka pasur mundësi të më bashkohet për të më ndihmuar në përgatitje. Në Velipojë kushtet janë të mira për punë, ndërsa sparing bëj me një boksier nga Shkodra”, deklaroi Visoka.

Kompania “Fortesa” sponsorizon përgatitjet e Visokës, duke i mundësuar kushte ideale për punë.

Visoka si asnjëherë më parë është optimist dhe llogarit fitore, të cilën do t’ua dedikojë të gjithë shqiptarëve e në veçanti do të jetë një fitore e posaçme edhe për shtetin tonë, Republikën e Kosovës. (botasot)