Shtypi i Dites

[King_Arthur]

Institucionet e pavarura: më shumë lekë nga qeveria për 2008-ën

Pasi u miratua mbrëmë në parim në Parlament projektbuxheti i vitit 2008, ka vazhduar diskutimi në Komisionin e Ligjeve. Gjatë ditës së djeshme është marrë në shqyrtim projektbuxheti për disa institucione të pavarura kushtetuese. Përkatësisht janë diskutuar fondet e dhëna nga qeveria për Komisionin Qendror të Zgjedhjeve, Avokatin e Popullit, Komisionin e Shërbimit Civil dhe Shkollën e Magjistraturës. Çlirim Gjata, në cilësinë e kryetarit të KQZ-së, ka kërkuar që të ketë një rritje të buxhetit për këtë institucion. Sipas Gjatës, “buxheti për vitin 2008-të kap shifrën e 114,2 milionë lekëve, nga të cilat 65% i kalojnë fondit të pagave të administratës, 17,5 % fondit të shpenzimeve për mallra dhe një pjesë e mirë për investime, prandaj ne kërkojmë një rritje prej 12 milionë lekësh”, ka përfunduar ai. Rritje të fondit ka kërkuar edhe institucioni i Avokatit të Popullit, që përfaqësohej nga sekretari i këtij institucioni. Sipas tij, buxheti duhet të rritet në masën 7,8 milionë lekë. Ai ka argumentuar se “ky institucion ka parashikuar një serë investimesh si në sektorin e pagave ashtu edhe në shtimin e bazës materiale dhe një sërë investimesh të tjera, të cilat nuk mund të arrihen me buxhetin e paraqitur nga qeveria”, ka përfunduar ai. Të njëjtën kërkesë për rritje fondesh kanë paraqitur edhe përfaqësuesit e Shkollës së Magjistraturës. Më të kënaqur me buxhetin e paraqitur nga qeveria ishte Komisioni i Shërbimit Civil, i cili përfaqësohej nga sekretari i përgjithshëm, Genc Tafaj, i cili nuk ka kërkuar rritje të fondeve që parashikon buxheti.

[King_Arthur]

Skenari i opozitës kundër “Berishës”

Nëse “ëndrra” opozitare e zgjedhjeve të parakohshme nuk u arrit me çështjen e Presidentit, opozita ka ndërmend ta bëjë këtë me vota në Parlament dhe me protesta në rrugë. Janë dy skenarë që diskutohen në tavolinën e opozitës për të larguar të djathtën nga pushteti. Ilir Meta në një tryezë politike paralajmëroi strukturat e LSI-së që të ishin gati për zgjedhje të parakohshme. Kësaj thirrjeje brenda ditës iu bashkua dhe kryetari i PS-së, Edi Rama, në një takim që zhvilloi në Berat. Por realisht, sa janë mundësitë për të shkuar në zgjedhje të parakohshme. Duke parë logjikën e numrave dhe qëndrimin e luhatur të opozitës, në këtë pikë për shumëkënd mundësitë janë të pakta. Por ndryshe mendohet në selinë rozë.
Mocioni ndaj Berishës
Burime nga Grupi Parlamentar i Partisë Socialiste bëjnë të ditur se, shumë shpejt do të ndërmerret një nismë për mocion mosbesimi ndaj qeverisë “Berisha” dhe në veçanti kundrejt kryeministrit Sali Berisha. Duke shpresuar në krizën brenda së djathtës, por dhe pakënaqësitë e deputetëve të PD-së, e majta synon detyrojë Berishën të tërhiqet me anë të numrave në Parlament. Dhe, hapi i parë është hedhur, kryetarja e Grupit Parlamentar të PS-së, Valentina Leskaj, deklaroi dje se opozita do të kërkojë një mocion për debat me kryeministrin Berisha, në lidhje me raportin e BE-së. Por ky do të jetë vetëm hapi parë i opozitës. Burime nga grupi parlamentar i selisë rozë bëjnë të ditur se, së shpejti opozita do të kërkojë një mocion votëbesimi në Parlament ndaj kryeministrit Berisha. Opozita shpreson që në këtë rast të shfrytëzojë pakënaqësitë në mes deputetëve të mazhorancës. Ndërkohë që opozita ka dështuar më parë në tentativat e saj në shkarkimin e kryetares së Kuvendit, Jozefina Topalli.
Deklaratat
Ka qenë gjithmonë Skënder Gjinushi ai që i ka kërkuar me ngulm opozitës që të bëjë të pamundurën për zgjedhje të parakohshme. Kryetari i PSD-së, i cili ka ndjekur gjithmonë linjën e ashpër ndaj mazhorancës së djathtë, nuk ka reshtur kurrë së kërkuari zgjedhje të parakohshme. Në momentin e dorëheqjes së ministrit të Drejtësisë, Gjinushi i është rikthyer idesë së tij për një mocion shkarkimi për kryeministrin Berisha, duke e cilësuar si momentin më të favorshëm për një kërkesë të tillë. Sipas tij, situata e krijuar dhe një mocion për shkarkimin e kryeministrit kërkon një unifikim të votave të opozitës në Kuvend me një pjesë të mazhorancës. Ndërkohë që, Ilir Meta, në një takim me strukturat e LSI-së i ka paralajmëruar këto të fundit që të jenë gati për zgjedhje të parakohshme. “Unë mendoj se përgjegjësia jonë është që të përgatitemi për sfidën elektorale, jo thjesht në 2009-n, por edhe sikur ajo të jetë më pranë, sepse zhvillimet janë tërësisht të mundshme që të zhvillohen dhe në mënyrë të papritur”, ka deklaruar Meta. Edhe shefi i selisë rozë, Edi Rama, është shprehur në njëjtin sinkron me Metën dhe Gjinushin. Rama u ka bërë thirrje strukturave të jenë të gatshme për të përballuar edhe një proces elektoral të paparashikuar. “Siç po qeveris mazhoranca, zgjedhjet do të jenë jo në vitin 2009, por në vitin 2008”, deklaroi Rama në Berat.

Mocioni ndaj Berishës

Një mocion për rrëzimin e qeverisë “Berisha”. Ky është skenari i parë dhe që është vënë në zbatim nga opozita. Duke shfrytëzuar krizën e koalicionit të djathtë, e majta është duke përgatitur një mocion ndaj qeverisë “Berisha”. Dje, kryetarja e Grupit të PS-së, Valentina Leskaj, ka deklaruar se do të kërkojë një mocion për debat me kryeministrin Berisha, në lidhje me raportin e BE-së. Por ky do të jetë vetëm hapi parë i opozitës. Pas këtij veprimi opozita do të kërkojë një mocion votëbesimi në Parlament ndaj kryeministrit Berisha. Por gjasat janë që duke shfrytëzuar largimin e Rusmalit, kundërshtimin e Spartak Ngjelës dhe të disa deputetëve të tjerë të djathtë, opozita do të mund të vendosë në pozitë të vështirë me anë të numrave qeverinë “Berisha”.

Protestat

Skenari i dytë i opozitës janë protestat në rrugë. Dy javë më parë, nënkryetari i Grupit Parlamentar të PS-së, Erion Braçe, deklaroi se e majta do të nisë protestat në shesh kundër qeverisë “Berisha”. Por kjo deklaratë e Braçes u duk e parakohshme edhe për vetë kryetarin e PS-së, Edi Rama. Ndërkohë që një skenar i tillë, sipas burimeve nga PS-ja, është lënë për në fund. Kur të jenë provuar të gjitha mundësitë e votimeve parlamentare, atëherë opozita do t’u drejtohet shesheve me protestat paqësore. Gjithsesi, ky skenar jo shumë i ri në politikën shqiptare, mund të realizohet gjatë muajve të parë të vitit 2008.

[DarkAngel]

Vatikani: Shqipëria të integrohet sa më shpejt në strukturat atlantike
(07.12.2007)
Papa Benedikti XVI dhe sekretari i Selisë së Shenjtë, Bertone i kanë shprehur dje presidentit Topi admirimin e tyre për harmoninë dhe tolerancën fetare në Shqipëri, duke e cilësuar atë si një premisë mjaft pozitive për proceset integruese, në rrugën drejt ri-integrimit në Perëndim. Ati i Shenjtë pranoi ftesën për të vizituar Shqipërinë, ndërkohë që shprehu mirëkuptim për shugurimin e një kardinali shqiptar.


Papa Benedikti XVI shprehu dje mbështetjen e tij për përpjekjet integruese të Shqipërisë dhe vlerësoi forcimin e institucioneve demokratike dhe shtetit të së drejtës, duke përshëndetur gjithashtu edhe bashkëjetesën e harmoninë ndër-fetare që karakterizon popullin shqiptar. Këto vlerësime, Ati i Shenjtë, Papa Benedikti XVI i bëri gjatë takimit të zhvilluar me Presidentin Bamir Topi, i cili po zhvillon një vizitë në Selinë e Shenjtë në Vatikan. Në këtë vizitë zoti Topi shoqërohet nga Zonja e Parë, Teuta Topi, dy vajzat, Nada dhe Etida, si edhe nga delegacioni zyrtar, në përbërje të të cilit janë edhe deputetët e Kuvendit të Shqipërisë, Tritan Shehu, Nikollë Lesi, Pal Dajçi dhe Frrok Gjini. Në takimin e zhvilluar, Ati i Shenjtë theksoi lidhjet jo vetëm gjeografike, por edhe historike e kulturore të Shqipërisë me familjen europiane, aspiratën e saj për t’u bërë pjesë edhe institucionalisht e kësaj familjeje dhe uroi që kjo aspiratë e kahershme e popullit tonë të përmbushet sa më shpejt. Kreu i Shtetit shqiptar, pasi vlerësoi marrëdhëniet e hershme dhe shumë të mira të Shqipërisë me Selinë e Shenjtë, shprehu mirënjohjen për ndihmesën e vyer dhe rolin që Vatikani ka luajtur për ringjalljen shpirtërore, morale dhe edukuese të popullit shqiptar, si edhe në mënyrë të veçantë për lumturimin e Nënë Terezës, kësaj shqiptareje të madhe, humanizmi i shenjtë i së cilës njihet dhe vlerësohet anembanë botës, duke
e shndërruar në një simbol të bamirësisë, mikpritjes dhe sakrificës shqiptare. Presidenti Topi vuri në pah harmoninë dhe tolerancën fetare që mbizotëron në vendin tonë në marrëdhëniet mes tri besimeve të ndryshme, duke theksuar rëndësinë e inkurajimit të bashkëbisedimit dhe mirëkuptimit midis feve, si pjesë e dialogut mes qytetërimeve. Gjithashtu, presidenti Topi, pasi informoi Atin e Shenjtë për angazhimin dhe seriozitetin e Shqipërisë në përmbushjen e aspiratave të saj integruese në strukturat euro-atlantike, si edhe për reformat e thella të ndërmarra në këtë drejtim, nënvizoi rolin moderues të Shqipërisë dhe faktorit shqiptar në interes të paqes dhe qëndrueshmërisë së rajonit të Ballkanit. Në këtë aspekt, zoti Topi u ndal
në rëndësinë e zgjidhjes sa më të shpejtë të çështjes së Kosovës dhe fitimit të pavarësisë së merituar të saj, për të vendosur përfundimisht paqen dhe qetësinë në Ballkan dhe për ta orientuar atë drejt integrimit në familjen e madhe europiane. Presidenti Topi, në emër edhe të mbarë popullit shqiptar, e ftoi Atin e Shenjtë, Papën Benedikt XVI, që të vizitojë vendin tonë, ftesë e cila u mirëprit me kënaqësi dhe mori përgjigje pozitive nga Shenjtëria e Tij për t’u zhvilluar në një moment të përshtatshëm të axhendës së tij. Kreu i shtetit ka zhvillaur po dje një takim me Sekretarin e Shtetit të Vatikanit, Kardinalin Bertone, ku Topi shprehu sërish mirënjohjen dhe vlerësimin
për rolin e Selisë së Shenjtë në zhvillimin e marrëdhënieve shumë të mira me Shqipërinë, në inkurajimin e rizgjimit shpirtëror të popullit shqiptar, arsimimin e tij dhe ndihmesat humanitare e shëndetësore, theksoi shembullin e rrallë të vendit tonë, ku harmonia dhe toleranca ndërfetare mbizotërojnë marrëdhëniet mes tri feve që praktikohen në Shqipëri, por edhe në Kosovë. Topi i përsëriti Kardinalit Bertone ftesën drejtuar Atit të Shenjtë për të vizituar Shqipërinë, duke marrë një përgjigje pozitive, që ajo do të realizohet në një kohë të përshtatshme.
Pas të ndjerit Koliqi, Topi kërkon shugurimin e një tjetër Kardinali shqiptar/Presidenti shprehu gjithashtu edhe kërkesën për shqyrtimin e mundësisë për të patur një tjetër Kardinal shqiptar, pas të ndjerit Kardinal Koliqi. Në fund të vizitës së tij zyrtare dyditore në Selinë e Shenjtë, Presidenti Topi u takua dhe pati një bisedë të ngrohtë e tepër miqësore edhe me Imzot Vinçenco Palian të Komunitetit të Sant Edixhios, kontributi i të cilit për krijimin e kushteve të lirisë fetare dhe demokracisë, si dhe ndihmesa humanitare e shëndetësore, kanë qenë shumë të ndjeshme në Shqipëri, Kosovë, Maqedoni, etj., që nga viti 1990.

[DarkAngel]

Gejts-Braun, mesazhe urimi me rastin e 95-vjetorit të Ushtrisë Shqiptare
(07.12.2007)
Me rastin e 95 vjetorit të krijimit të Forcave të Armatosura, Sekretari amerikan i Mbrojtjes, Robert Gates dhe Sekretari britanik i Mbrojtjes, Des Broëne, vlerësuan marrëdhëniet shumë të mira dhe bashkëpunimin e ngushtë midis vendeve të tyre, SHBA-së dhe Britanisë së Madhe, me Shqipërinë dhe Forcat e Armatosura shqiptare. Burim\e pranë Ministrisë së Mbrojtjes bënë të ditur dje se Sekretarët Gates dhe Broëne, nëpërmjet mesazheve të urimit, dërguar ministrit të Mbrotjes, Fatmir Mediu, kanë përcjellë urimet për FA shqiptare, me rastin e 95 vjetorit të krijimit të tyre. Gjithashtu, ata kanë uruar ministrin Mediu edhe për 95-vjetorin e Ditës së Pavarësisë të Shqipërisë. Me rastin e 95-vjetorit të Forcave të Armatosura, ministri Mediu ka marrë mesazhe urimi edhe nga shumë homologë të tij të vendeve anëtare të NATO-s dhe vendeve të tjera partnere, si dhe nga Komandat e Aleancës së Atlantikut të Veriut.

[DarkAngel]

Oketa kundër Ballës: Kartat e reja të Identitetit do të prodhohen sipas afatit të parashikuar
(07.12.2007)
Zëvendëskryeministri Gazmend Oketa iu përgjigj dje në seancë plenare në Kuvendin e Shqipërisë kritikave të deputetit të Partisë Socialiste, Taulant Balla, ndaj projektit të qeverisë për kartat e identitetit. Gjatë diskutimeve jashtë rendit të ditës, deputeti socialist Balla u shpreh kritik për vonesat në prodhimin e kartave të identitetit. Në përgjigje të deklaratave të tilla, numri 2 i qeverisë deklaroi se për realizimin e këtij projekti, që është një nga më të rëndësishmit për qeverinë shqiptare, është shpallur tashmë tenderi ndërkombëtar për prodhimin e kartave, i publikuar në një nga mediat më prestigjioze, duke mundësuar prodhimin e tyre para zhvillimit të zgjedhjeve të përgjithshme parlamentare në vitin 2009. Madje, ai shtoi se kompanitë e interesuara për këtë ofertë po ashtu janë ndër më prestigjiozet në fushën e prodhimit të këtij dokumenti.

[DarkAngel]

Berisha: SKZHI, dokument bazë për realizimin e projekteve madhore, integrimit në BE dhe NATO
(07.12.2007)
Kryeministri Sali Berisha e konsideroi Strategjinë Kombëtare për Zhvillim dhe Integrim si dokumentin themelor të zhvillimit dhe realizimit të projekteve të mëdha të vendit, integrimit në Bashkimin Europian dhe në NATO. Komiteti i Planifikimit të Strategjive diskutoi dje nën drejtimin e Kryeministrit Berisha, Strategjinë Kombëtare për Zhvillim dhe Integrim (SKZHI). “Strategjia synon përshtatjen e ‘acquis commnautaire’, të domosdoshme që Shqipëria dhe shqiptarët të integrohen në BE, të standardeve europiane të zhvillimit ekonomik dhe social të vendit në përputhje me normat, parimet dhe kriteret e përcaktuara nga BE-ja,” u shpreh Kryeministri. Sipas tij, SKZHI përbën dokumentin themelor edhe
për projektin e konsolidimit në Shqipëri të standardeve të Kopenhagenit, që në thelbin e tyre kanë funksionimin e shtetit ligjor. Strategjia Kombëtare për Zhvillim dhe Integrim përbën një transformim të dokumentit të mëparshëm të Strategjisë Kombëtare për Zhvillim Ekonomik dhe Social, e hartuar në filozofinë e Bankës Botërore e që udhëhiqej nga parimi i zhvillimit dhe i luftës kundër varfërisë. “SKZHI e përshtat plotësisht dokumentin e mëparshëm me kërkesat dhe prioritet e partneritetit evropian, Marrëveshjes së Stabilizim Asociimit, si dhe me detyrimet që dalin pas fitimit nga ana e Shqipërisë të statusit të kandidatit dhe zbatimit të marrëveshjes së aderimit të plotë të vendit në BE”, tha Kryeministri. Berisha theksoi se kjo Strategji do të shërbejë në vitet e ardhshme si dokument bazë për të gjitha ligjet, vendimet dhe reformat që do të ndërmerren. Më këtë rast, Kryeministri Berisha shprehu falënderimet për të gjithë ekipin e ekspertëve, shqiptarë dhe të huaj, që punuan për hartimin e Strategjisë, shoqërinë civile, botën akademike dhe median për rolin dhe kontributin e tyre gjatë diskutimit të
saj me grupet e interesit.

[DarkAngel]

Rumania e Turqia konfirmojnë votën e saj “pro” anëtarësimit të Shqipërisë në NATO
(07.12.2007)
Shqipëria do të mbështetet nga Rumania në rrugën drejt integrimit në NATO, ku gjatë samitit të Bukureshtit si vend pritës do të shprehë votën e saj pro anëtarësimit të vendit tonë në NATO. Ministri rumun i Mbrojtjes, Teodor Melescanu i pritur në një takim nga ministri i Mbrojtjes Fatmir Mediu, ka theksuar se Rumania e ka dhënë tashmë votën e saj pro anëtarësimit të Shqipërisë në NATO, por njëkohësisht kërkohet të ketë një unanimitet ose një shumicë e madhe votash edhe brenda strukturave të NATO-s. Ai ka vënë në dukje se Rumania vlerëson bashkëpunimin dypalësh ndërmjet dy vendeve dhe njëkohësisht e konsideron atë edhe si një mbështetje për Shqipërinë në përpjekjet e saj për anëtarësim në NATO. “Duke pasur parasysh se Rumania është vend pritës për Samitin e Bukureshtit që do të mbahet vitin e ardhshëm, ne mbështesim fuqishëm idenë e zgjerimit të aleancës, si dhe paraqesim ftesën dhe ndihmën tonë që tre vendet e Kartës së Adriatikut: Shqipëria, Maqedonia dhe Kroacia të bëhen anëtare të plota të NATO-s. Gjithashtu në mbështesim dhënien e sinjaleve të qarta për anëtarësimin e vendeve të tjera në këtë strukturë, duke përfshirë Serbinë, Malin e Zi dhe vendet e tjera të rajonit”, nënvizoi Melescanu. Gjithashtu, ministri rumun shprehu dëshirën që zgjerimi të jetë plotësisht i mundshëm për vendet e Kartës së Adriatikut dhe për këtë Rumania si vend pritës, po merr të gjitha masat që objektivat të realizohen me sukses.
Erdogan-Topallit: Të impresionuar nga përparimet e Shqipërisë/Kryetarja e Kuvendit në kuadër të vizitës së saj në Turqi është takuar dje me Kryeministrin turk Recep Tayyip Erdogan të cilin e ka informuar për zhvillimet më të fundit në vendin tone. Kryeministri Erdogan shprehu kënaqësinë për përparimin e Shqipërisë drejt integrimit Europian dhe Euro-Atlantik. “Kam ndjekur më shumë vëmendje reformat e ndërmarra nga Kryeministri Berisha dhe qeveria e tij”, tha Kryeministri Erdogan, duke shtuar se “vlerësimin për këto reforma ne e deklarojmë kudo në takimet
tona të rëndësishme”. “Ju shprehim mbështetjen tonë të pafund dhe ju përgëzojmë për hapat e rëndësishme që keni bërë në një kohë shumë të shkurtër. Ne falënderojmë Kryeministrin tuaj për mbështetjen që u ka
dhënë investimeve turke në Shqipëri, dhe besojmë në rritjen e nivelit të bashkëpunimit ekonomik”, tha ai. Bashkëbiseduesit vlerësuan trefıshımin e vëllimit të shkëmbimit ekonomik dhe ranë dakord për rritjen e këtij vëllimi edhe më tej. Kryetarja e Kuvendit, pasi e falënderoi Kryeministrin turk për fjalët shumë pozitive dhe vlerësuese në drejtim të reformave të ndërmarra nga shteti shqiptar, tha se Shqipëria sheh me admirim ecurinë dhe hapat e ndërmarra nga qeveria turke në të gjitha fushat. Ndërsa, Kryeministri
turk, Recep Tayyip Erdogan, i është përgjigjur pozitivisht ftesës së Kryeministrit Sali Berisha për të zhvilluar një vizitë zyrtare në vendin tonë. Sipas burimeve zyrtare nga Kuvendi konfirmohet se kreu i qeverisë turke, gjatë takimit me Kryeparlamentaren Jozefina Topalli premtoi se brenda tremujorit të parë të vitit të ardhshëm do të vijë me kënaqësi për një vizitë zyrtare në Tiranë.

[DarkAngel]

Shqipëria kërkon Shengen
(05.12.2007)
Berisha: Qeveria ka përqendruar investimet në tërësi në fushën e transporteve



"Jemi të gatshëm që të krijojmë me të gjitha shtetet e rajonit një Shengen Rajonal". Garancia dhe kërkesa është bërë dje nga ministri i Punëve Publike, Transportit dhe Telekomunikacionit, Sokol Olldashi gjatë punimeve të takimit të SEETO-s, në Tiranë.
Në këtë kontekst, ministri Olldashi i bëri një apel përfaqësuesve të lartë të delegacioneve pjesëmarrëse, që të jenë vendet e SEETO-s, një model për krijimin e Shengenit Rajonal dhe le të jete transporti ai që do të udhëheqë këtë integrim. Një studim i kryer nga Sekretariati i Korridorit te 8-të, demonstron në mënyrë të qartë se trafiku tranzit Trans-Ballkanik (me origjinë dhe destinacion jashtë Ballkanit) do të ketë një avantazh në kosto, nëse do përdoret Korridori i VIII dhe Porti i Durrësit. Kështu u shpreh ministri i PPTT, Sokol Olldashi, dje në takimin e SEETO-s, që zhvilloi punimet në Tiranë. Sipas ministrit Olldashi, studimet rajonale në fushën e transportit, po japin projeksione optimiste për trafikun në infrastrukturën e rrjetit kryesor në territorin tonë, Korridorit të 8-të, korridorin Veri-Jug e gjithashtu në drejtimin e Aksit Rrugor 7, Durrës-Morinë (route 7-te e Rrjetit Kryesor) që mund të konsiderohet degë ose zgjatim i të dy korridoreve paneuropiane. Duke vlerësuar të gjitha analizat e mësipërme, ministri Olldashi theksoi se synohet që transporti të zhvillohet mbi bazat e një rritje të kërkesave të tregut pa marrë parasysh faktorë pengues "barrierat jo-fizike". Për transportin e pasagjerëve, Olldashi vuri theksin se akoma vazhdon të mbeten problem kufizimet në marrjen e vizave. Ndërsa për transportin e mallrave, ministri kërkoi më tepër lehtësira për plotësimin e dokumentacionit dhe zbatimin e proçedurave doganore, eliminimin e kontrolleve të zgjatura, rritjen e nivelit të kualifikimit të personelit dhe përmirësimin e infrastrukturës. Sipas një sondazhi të kryer me operatorët e transportit rrugor të Maqedonisë, Bullgarisë e Turqisë , tha ministri Olldashi, vihet re se pjesa më e madhe e tyre, i konsiderojnë këto dukuri si faktorë kryesorë ndikues për të zgjedhur për tranzitim itinerare shumë më të gjata. Ministri i PPTT theksoi se Qeveria Shqiptare ka marrë masa konkrete në këtë drejtim për të krijuar më shumë lehtësira në transport, duke mbështetur fuqimisht edhe programin e "soft meseures" të Planit Shumëvjeçar të SEETO. Olldashi, vlerësoi dje takimin e tretë të Ministrave të Transportit të Vendeve të Evropës Jug-Lindore, anëtare në SEETO, që zhvilloi punimet në Tiranë, si një ngjarje të rëndësishme që krijon një tjetër shans për të diskutuar mbi problemet dhe zgjidhjet e përbashkëta në fushën e transportit. "Qeveria Shqiptare, - tha ministri Olldashi,- ka përcaktuar synimet kryesore të politikës së saj të transportit Planin Kombëtar të Transportit, i cili është përgatitur në bashkëpunim edhe me partnerët e saj të jashtëm (Komuniteti Europian, Banka Botërore, Fondi Monetar Ndërkombëtar, etj) dhe ka si objektiv krijimin e një rrjeti transporti pa ndërprerje dhe bllokime, që do të sigurojë zhvillimin e një zone unike ekonomike, do të rriste volumin e trafikut të mallrave, do e vendoste transportin në shërbim të të gjithëve dhe do të ndihmonte bashkëpunimin e brendshëm dhe tregun kombëtar të punës." Ky fakt, theksoi ministri Olladashi, dëshmohet edhe nga përqindja e lartë e investimeve në këtë rrjet, ku synohet zbutja e prapambetjes të gjendjes aktuale, rritja e impaktit të drejtpërdrejt në lëvizjen e popullsisë dhe aksesin ndaj transportit për zona të ndryshme të vendit, rritjen e standardit të jetesës duke mundësuar shërbimet mjekësore, arsimore dhe kulturore për të gjitha shtresat e popullsisë si dhe nxitjen e zhvillimit të biznesit të vogël dhe të mesëm. Qeveria Shqiptare, tha ministri Olldashi, në politikat e saj po implementon një sërë masash për përmbushjen e detyrimeve ndaj Procesit të Stabilizim-Asociimit, për realizimin e objektivit strategjik integrimin me Bashkimin Evropian. Sipas një programi të përcaktuar po realizohet përfarimi legjislativ i kornizës ligjore të transportit me Rregullat dhe Standardet Ndërkombëtare, duke i dhënë prioritet atyre që kanë të bëjnë me sigurinë në transport dhe qarkullimin e mjeteve, sidomos për transportin e mallrave të rrezikshme si dhe krijimin e lehtësirave në kalimet kufitare. "Qeveria e Shqipërisë siç përmendet edhe në Raport - Progresin e BE luan një rol aktiv në Implementimin e Memorandumit të Mirëkuptimit për zhvillimin e Rrjetit Kryesor të Transportit për Evropën Jug-lindore, duke e konsideruar atë si një instrument të rëndësishëm në integrimin e vendeve të kësaj zone në përputhje me qëllimet e Procesit të Stabilizim-Asociimit. Kjo dëshmohet edhe me politikën liberalizuese dhe frymën e bashkëpunimit që ajo zbaton me vendet e rajonit"-tha ministri Olldashi. Kryeministri Berisha përshëndeti dje takimin e tretë vjetor të Observatorit të Transportit të Evropës Juglindore (SEETO), i cili po zhvillon punimet në Tiranë. Në fjalën e tij Kryeministri Berisha evidentoi rëndësinë e ndërtimit të korridoreve në rajonin e Evropës Juglindore, duke nënvizuar se ky rajon është përcaktuar në deklaratën e Selanikut si rajon me të ardhme të sigurt evropiane. Kryeministri vlerësoi se qeveria shqiptare për shkak të trashëgimisë dhe nevojave shumë të mëdha në infrastrukturë ka përqendruar investimet në tërësi në fushën e transportit. “Ne po punojmë për aksin Veri-Jug, aks jashtëzakonisht i rëndësishëm veçanërisht për fluksin turistik gjithnjë në rritje në të gjithë bregun e Adriatikut dhe Jonit. Është në ndërtim e sipër aksi Durrës-Morinë-Prishtinë që ndoshta mund të zgjatet deri Nish, i cili është një aks jashtëzakonisht i rëndësishëm për rajonin. Ndërtimi i këtij aksi me ndonjë degëzim shndërron portet shqiptare në porte të rëndësishme të rajonit”, u shpreh Kryeministri Berisha. Gjithashtu Kryeministri Berisha theksoi se qeveria shqiptare po studion të gjitha mundësitë e zgjerimit të porteve aktuale apo ndërtimit të porteve të reja në mënyrë që rajoni i Kosovës, Serbisë Jugore dhe Maqedonisë, por edhe një pjesë e Bullgarisë të mund të përdorin për transport portet shqiptare. Projekte të tjera transporti, vijoi më tej Kryeministri, janë rruga që lidh Bllatën me Tiranën, e cila shkurton rreth 100 km distancën Shkup-Tiranë. Duke u ndalur në mundësitë e tjera të transportit, Kryeministri Berisha theksoi se është bërë e domosdoshme një qëndrim i ri ndaj sistemit hekurudhor rajonal. “Sistemi hekurudhor rajonal ka një rëndësi të madhe për shkak të rritjes së vëllimit të shkëmbimeve tregtare. Ky sistem mezi funksionon për shkak se lidhja mes Shqipërisë dhe Maqedonisë, mungon sikurse mungon edhe lidhja mes Maqedonisë dhe Bullgarisë”, nënvizoi Kryeministri Berisha. Në këtë kontekst, Kryeministri Berisha shprehu vendosmërinë e qeverisë shqiptare për të ndërtuar deri në kufirin me Maqedoninë, segmentin hekurudhor, ndërsa uroi që edhe vendet mike, Maqedonia dhe Bullgaria do të bëjnë pjesën e tyre në mënyrë që të krijohet një lidhje e gjerë hekurudhore. Një rëndësi të veçantë gjatë fjalës së tij Kryeministri Berisha i kushtoi Korridorit 8-të, të cilin e konsideroi si një korridor jashtëzakonisht të rëndësishëm për rajonin. “Korridori 8 bashkon disa vende dhe është një nga rrugët më të fuqishme të transportit nga Lindja drejt Perëndimit”, u shpreh Kryeministri Berisha, duke e vënë theksin në përparësimin e Korridorit 8-të, qoftë edhe me bashkëfinancim nga vendet që përshkohen nga ky korridor. “Shpresoj që Korridori 8 të rikthehet me përparësi në axhendën e korridoreve të mëdha evropiane, sikurse Shqipëria është e gatshme të luajë rolin e saj me bashkëfinancim në ndërtimin e segmenteve të këtij korridori që kalojnë nëpër Shqipëri”, vlerësoi Kryeministri Berisha. Gjithashtu Kryeministri nënvizoi se në misionin e Observatorit të Ministrave të Transportit të Europës Juglindore është edhe reduktimi i barrierave burokratike dhe kohës së qëndrimit në pikat doganore. Kryeministri theksoi se Shqipëria e konsideron bashkëpunimin në kuadër të këtij observatori si mjaft të rëndësishëm. Vendet anëtare të këtij organizmi janë Shqipëria, Maqedonia, Kosova, Kroacia, Bosnjë – Hercegovina, Serbia dhe Mali i Zi. Takimi i Tiranës është vazhdim i takimit të Brukselit, ku me firmosjen e rezolutës së përbashkët, vendet pjesëmarrëse merrnin përsipër mbështetjen e zhvillimit të rrjetit hekurudhor, i cili në gjithë rajonin është mjaft i prapambetur, në krahasim me llojet e tjera të transportit. Observatori i Transportit për Evropën Jug-Lindore është një organizëm rajonal, i cili udhëhiqet dhe menaxhohet nga Bashkimi Evropian, me qëllim arritjen graduale të standardeve evropiane për t’u integruar në BE. Në datat 27-28 qershor u mbajt mbledhja e radhës e Komitetit drejtues të SEETO-së, në të cilën u vendos që Shqipëria të kryesojë këtë Komitet për dy vitet e ardhshme.