Medvedev pritet të lançojë “de-Stalinizimin” e Rusisë.

[Rori]

Presidenti rus, Medvedev do të lançojë një “de-stalinizim” të ri të vendit në përpjekje për t’u rikujtuar rusëve krimet monstruoze të kryera nga diktatori sovjetik. Roli i Stalinit në historinë e Rusisë do të ripreket gjatë takimit që Medvedev ka parashikuar të zhvillojë në janar me të dërguarin e tij të ri për çështjet e të drejtave të njeriut, Mikail Fedotov dhe aktivistë të tjerë të të drejtave të njeriut. Fushata, sipas një gazete ruse, do të bazohet në deklasifikimin e të gjitha arkivave sekrete sovjetike. Programi do të përfshijë gjithashtu edhe kërkime të kampeve të mbetura të epokës së Stalinit, si dhe vendosjen e monumenteve të reja për nder të atyre që u vranë nga regjimi. Përfaqësuesit e grupeve të të drejtave të njeriut do t’i kërkojnë Medvedevit që të japë një vlerësim ligjor dhe politik për krimet e regjimit totalitarist. Medvedev, në kundërshtim me qëndrimin e Putinit, që është Kryeministri i vendit, e cilësoi Bashkimin Sovjetik një regjim totalitar që shtypi të drejtat e njeriut. Në një intervistë të dhënë në maj, ai deklaroi se krimet e Stalinit të kryera gjatë kohës së luftës nuk mund të falen kurrë. “Bashkimi Sovjetik ishte një shtet shumë i ndërlikuar dhe nuk mund të konsiderohet veçse totalitar”. Ka deklaruar Medvedev në atë kohë. Si Medvedev, ashtu edhe Putin, deri në atë moment kishin dhënë shumë pak vlerësime në lidhje me Bashkimin Sovjetik, duke u përqendruar më shumë në arritjet e tij. Sipas gazetës, Medvedev është duke e shndërruar “de-Stalinizimin” në një temë qendrore të qëndrimit të tij në Kremlin.