Ministri i Drejtesise shpërthen kundër gjyqtarëve: Ka praktika korruptive

[King_Arthur]

http://img230.imageshack.us/img230/4018/alibeajspahiuzt6.jpg


Alibeaj dhe Spahiu, në garë për të akuzuar gjyqtarët

Drejtuesit më të lartë të drejtësisë nuk i kanë kursyer akuzat dhe kritikat ndaj trupës së gjyqtarëve të kryeqytetit dje gjatë analizës vjetore të punës së këtyre institucioneve. Ministri i Drejtësisë, Alibeaj, ka qenë më i ashpri dhe më i drejtpërdrejti në këto akuza. Duke iu referuar një raporti të Bankës Botërore për zhvillimin gjatë viteve 2005-2007, të titulluar "Doing business" (Të bësh biznes), ai ka deklaruar se sistemi gjyqësor konsiderohet pengues i zhvillimit ekonomik në Shqipëri. "Ka vendime në Gjykatën e Apelit Tiranë që rrinë në sirtarin e gjyqtarëve 7 muaj e 23 ditë pa u zbardhur dhe mund të thoni çfarë të doni, por afati maksimal për t‘i dhënë një vendimi arsyetimin e duhur është 30 ditë", ka thënë Alibeaj, duke shigjetuar hapur gjyqtarët e Gjykatës së Apelit. Duke u bazuar në përllogaritjet e tij ministri ka dalë në konkluzionin se janë 600 çështje vendimet e së cilave nuk arsyetohen në afat. "Ju nuk duhet t‘i detyroni shqiptarët që të vdesin në sallat e gjyqeve për shkak të lodhjes, ju nuk duhet t‘i detyroni që edhe pa të drejtë të marrin armët dhe të qëllojnë ndaj gjyqtarëve, keni analizuar ndonjëherë pse ndodhin këto", ka thelluar akuzat e tij Alibeaj. Duke ndryshuar shënjestër, ai ka vijuar me kritikat në drejtim të Gjykatës së Shkallës së Parë në kryeqytet: "Shkoni dhe shikoni në Gjykatën e Tiranës sa kërkesa për dorëheqje ka. Praktika të qarta manipulative dhe korruptive, për të zhvatur padrejtësisht. Ju mungon transparenca, profesionalizmi ose nuk bëni asgjë për të treguar se i keni ato".

Pothuajse në të njëjtën linjë, por me një gjuhë më të butë është shprehur edhe Kreshnik Spahiu. "Nuk mund të lihen jashtë fokusit të KLD-së, shqetësimet lidhur me fraksionime të ndjeshme brenda trupës gjyqësore të Gjykatës së Tiranës, të cilat në disa raste marrin përmasa të tilla sa krijojnë konfrontime me drejtuesit, me anëtarët e trupit gjykues dhe ndonjëherë përçohen deri te palët, konfliktet e të cilëve shqyrtohen nga këto kolegje gjyqësore". Ka deklaruar nënkryetari i KLD-së. Sipas tij, gjyqtari, ashtu siç ka të drejtë të pretendojë autoritet nga publiku, duhet të japë shembull përpara publikut se respekton autoritetin që kanë ndaj tij ligji dhe subjektet që me ligj kanë raporte të detyrës me të, qoftë ky kolegu i seksionit ku ai gjykon, apo kryetari i gjykatës.

Por edhe reagimi i gjyqtarëve nuk ka munguar. Disa prej tyre duke marrë fjalën në analizë kanë kërkuar veçanërisht nga ministri i Drejtësisë që kur të akuzojë ta bëjë këtë gjë me emrat konkretë, duke eliminuar hedhjen e fajit mbi të gjithë gjyqtarët. Rrahman Qinami, gjyqtar i Gjykatës së Apelit tha se "është e vërtetë që gjyqësori ka problemet e veta, por nuk është mirë që të përbaltet figura e gjyqtarit". Ai ka theksuar se edhe kontrollet ndaj punës së gjyqtarëve duhen bërë për të gjithë dhe jo për gjyqtarë të caktuar sipas preferencave të politikës. Gjithsesi, Qinami nuk ka lënë pa shigjetuar edhe kolegët e tij, kur u ka kujtuar atyre ndarjen në dy shoqata. Ai e ka konsideruar një turp faktin që gjyqtarët nuk janë të bashkuar në një zë, të ndarë në dy shoqata. Duke përfituar nga ky moment, Qinami u ka bërë thirrje edhe dy drejtuesve të gjyqësorit, që të mos i politizojnë shoqatat e gjyqtarëve sipas interesave të tyre. Ndërsa gjyqtari i Gjykatës së Tiranës, Gjin Gjoni, ka kërkuar që të përcaktohen kriteret e punës së kryetarëve të gjykatave, pasi ata kur duan hynë në short, sipas preferencave. Sipas Gjonit ka probleme në ndarjen e kolegjeve penale, ku arrin deri aty sa të ketë edhe përçarje në caktimin e tyre dhe po ashtu ka mungesë transparence në hedhjen e shortit.