KLD: Ku ndahemi me politiken

[King_Arthur]

15/02/2008
Alibeaj bllokon Spahiun. Pika me e nxehte, emerimi i kryegjyqtareve

Këshilli i Lartë i Drejtësisë e ka konsideruar projektligjin mbi organizimin e pushtetit gjyqësor si një betejë pjesërisht të fituar. Në një komunikim me median, drejtoresha juridike e KLD-së, Ana Shkëmbi, është shprehur se këshilli vlerëson projektligjin në pjesën më të madhe të tij. Institucioni që drejton gjyqësorin kërkoi nga Kuvendi që në ligjin e ri ai të ketë më shumë kompetenca. Megjithëse kjo kërkesë është mirëkuptuar në parim, ministri i Drejtësisë, Enkelejd Alibeaj, tentoi "t‘u vërë fre" orekseve të KLD-së, duke theksuar se duhet një balancim i pushteteve mes ekzekutivit, pra Ministrisë së Drejtësisë dhe KLD-së. Megjithatë, Kuvendi miratoi projektligjin për gjyqësorin, por nuk përcaktoi kompetencat në lidhje me kontrollin në gjykatat. "Projektligji nuk ka zgjidhur dualitetin mes dy inspektorateve, atij pranë Ministrisë së Drejtësisë dhe Këshillit të Lartë të Drejtësisë, çështja mbetet ende e hapur përpara ligjit", tha Shkëmbi. Sipas saj, KLD-ja e konsideron projektligjin mbi organizimin e pushtetit gjyqësor të shqyrtuar nga Komisioni i Çështjeve Ligjore si një betejë pjesërisht të fituar dhe përshëndet nismën e këtij komisioni për të parashtruar përpara Kuvendit, përmirësime të cilat i shërbejnë ndjeshëm një sistemi gjyqësor të pavarur, të mbrojtur dhe profesional. Më pas ajo analizoi juridikisht vendimin e Kuvendit, duke argumentuar se "KLD-ja vlerëson parashikimin në këtë projektligj të dy burimeve të përfshirjes në gjykatat e rretheve gjyqësore të shtetasve të cilët kanë kryer shkollën e Magjistraturës apo që kanë qenë më parë në ushtrimin e detyrës së gjyqtarit. Ndryshe nga projekti i qeverisë, një parashikim i tillë, nuk hermetizon sistemin gjyqësor dhe ka vënë standarde për përzgjedhjen e kandidatëve me përgatitje të lartë profesionale". Ajo tha se këshilli vlerëson qëndrimin e komisionit ndaj pozicionit të kryetarëve të gjykatave, kriteret e përzgjedhjes për të cilët, procedura, koha e qëndrimit në detyrë dhe kompetencat, janë në përqasje me disa nga sugjerimet që janë paraqitur nga KLD-ja. "Vëmë në dukje përcaktimin në këtë projektligj të mandatit katërvjeçar të ushtrimit të funksionit drejtues, i cili plotëson vakumin aktual ligjor dhe që është në koherencë me shqetësimin disamujor të Këshillit të Lartë të Drejtësisë, si dhe me vendimin e marrë në mbledhjen e fundit të tij. Gjithashtu, është për t‘u përshëndetur marrja në konsideratë e propozimeve të KLD-së mbi konceptin e karrierës gjyqësore", tha drejtoresha juridike. Ajo sqaroi se komisioni parlamentar pranoi pjesërisht kërkesën e Këshillit të Lartë të Drejtësisë, ku me dy dispozita specifike parashikohet rritja e pagave të gjyqtarëve, e lidhur kjo me periudhën e shërbimit të tyre në detyrë. "Ky parashikim, tha ajo, ka marrë pjesërisht në konsideratë sugjerimet që KKLD-ja ka paraqitur në komision". Më tej deklaroi se ndryshe nga projekti i prezantuar para Komisionit të Ligjeve nga ekzekutivi, emërimi i kryetarëve të gjykatave nuk është nismë e ministrit të Drejtësisë, por ekskluzivitet i Këshillit të Lartë të Drejtësisë mbi bazën e një konkurrimi të ndershëm, transparent dhe profesional. "Në mënyrë specifike, vlerësohet parashikimi i qartë dhe i kategorizuar i shkeljeve disiplinore, i cili duke parashikuar raste specifike të këtyre shkeljeve, shmang mundësinë e subjektivizmit në rast procedimi disiplinor, duke lehtësuar procesin e shqyrtimit të procedimeve disiplinore nga ana e Këshillit të Lartë të Drejtësisë" tha Shkëmbi.
gazeta shqip